1A sa lako ki Sikemi ko Reopoama, ni ra sa lako mai ko ira kecega na Isireli ki Sikemi me buli koya me tui.
2Ia ni sa rogoca ko Jeropoama na luve i Nipati (ni sa tiko ga mai Ijipita, ni sa dro eliu mai na mata i Solomoni na tui), sa qai lesu mai Ijipita ko Jeropoama.
3A ra sa talaki vua me lako mai; ka ra sa qai lako, ko Jeropoama kei ira kecega na Isireli, ka vosa vei Reopoama, ka kaya,
4“O tamamuni sa vakabibitaka na neimami tavi. Ia oqo, mo ni vakamamadataka na cakacaka rarawa i tamamuni, kei nai tavi bibi sa lesia vei keimami ko koya, ka keimami na qai qaravi kemuni.”
5A sa kaya vei ira ko koya, “Dou lako mada ga ka me bogi tolu, dou qai lako tale mai vei au.” A ra sa lako tani na tamata.
6A sa bose vata ko Reopoama na tui, kei ira na qase ka tu e na mata i Solomoni na tamana ni sa bula tiko ko koya, a sa kaya ko koya, “Dou lewa mada se cava me'u kaya vei ira na tamata oqo?”
7A ra sa kaya vua, “Kevaka ko na yalololoma vei ira na tamata oqo, ka vakayalovinakataki ira, ka vosataka vei ira na vosa vinaka, era na qai qaravi kemuni ka tawa mudu.”
8Ia sa biuta ko koya na nodra lewa na qase, na ka era sa tukuna vua, ka bose vata kei ira na cauravou era tubu vata kaya, era dautu e matana.
9A sa kaya vei ira ko koya, “A cava dou sa lewa me da vosataka vei ira na tamata oqo, ko ira ka vosa mai vei au, ka kaya, ‘Mo ni vakamamadataka nai tavi ka lesia vei keimami ko tamamuni’?”
10A ra sa kaya vua ko ira na cauravou era tubu vata kaya, “Mo vosa vakaoqo vei ira na tamata era a vosa vei kemuni, ka kaya, ‘Sa vakabibitaka na neimami tavi ko tamamuni, ia mo ni vakamamadataka vei keimami’; mo ni vosa vakaoqo vei ira, ‘A noqu i qaqalo lailai ena levu cake, ka lailai na tolo i tamaqu.
11Ia oqo, sa bibi nai tavi sa lesia vei kemudou ko tamaqu, ia ka'u na vakaikuritaka na nomudou i tavi. Sa vakanakuitataki kemudou ko tamaqu e na dali, ia koi au ka'u na vakanakuitataki kemudou e na kuita sa buki.’ ”
12A ra sa tale mai ko Jeropoama kei ira kecega na tamata kivei Reopoama e na kenai katolu ni siga, me vaka ka kaya eliu na tui, ni sa kaya, “Dou lako tale mai vei au e nai katolu ni siga.”
13A sa vosa vakaukauwa ko koya na tui vei ira, ka biuta na nodra lewa na qase ko Reopoama na tui,
14ka vosa vei ira me vaka na nodra lewa na cauravou, ka vaka, “Sa vakabibitaka na nomudou i tavi ko tamaqu, ia ka'u na vakaikuritaka. Sa vakanakuitataki kemudou ko tamaqu e na dali, ia koi au ka'u na vakanakuitataki kemudou e na kuita sa buki.”
15A sa sega ni vakarorogo na tui vei ira na tamata; ni sa vu vua na Kalou na ka oqo, me vakayacora na nona vosa ka vosataka ko Jiova e na gusu i Eaija, na kai Sailo, kivei Jeropoama na luve i Nipati.
16 2Samu 20.1 Ia ni sa raica ko ira kecega na Isireli ni sa sega ni rogoci ira ko koya na tui, era sa qai vosa vua na tui ko ira na tamata, ka kaya,
“Keimami sai votavota vata vakaevei kei Tevita?
Ka sa sega na neimami votavota vata kei koya na luve i Jese.
Dou lako ki na nomudou veivale laca, koi kemudou yadua na Isireli!
Ia oqo, mo qarauna na nomu vale, Tevita.”
A ra sa lako kecega na Isireli ki na nodra veivale laca.
17Ia ko ira na Isireli era tiko e na veikoro i Juta, sa turaga vei ira ko Reopoama.
18A sa talai Atorami ko Reopoama na tui, ko koya ka lewa nai vakacavacava; a ra sa vakaviriki koya e na vatu ko ira na Isireli, a sa mate ko koya. A sa kusarawa kina ko Reopoama na tui me vodoka na nona qiqi-ni-valu, me dro ki Jerusalemi.
19A ra sa vuki tani kina ko ira na Isireli mai na vale i Tevita ka yacova na siga oqo.
Who We AreWhat We EelieveWhat We Do
2025 by iamachristian.org,Inc All rights reserved.
