1 Samuela 3 - Ai Vola Tabu (Vakadewa Makawa Vakavoutaki 2021)（FRV21）

Na Kacivi nei Samuela kei na Cakacaka Vakaparofita

1Ia na gone ko Samuela, sa qaravi Jiova e na mata i Ilai. Ia sa ka talei na vosa i Jiova e na gauna ko ya; sa sega so na raivotu.

2Ia e na siga ko ya ni sa davo koto ko Ilai e na nona tikina, ia sa matabuawa mai, me sega ni rai rawa;

3ia sa sega ni boko na cina ni Kalou, a sa davo koto ko Samuela e na vale i Jiova sa tu kina na kato ni Kalou.

4Sa qai kacivi Samuela ko Jiova, ka sa kaya ko koya, “Koi au oqo!”

5ka cici yani ko koya vei Ilai, ka kaya, “Koi au ga oqo, ni ko a kacivi au.” Ia sa kaya ko koya, “Au a sega ni kaci; mo la'ki davo tale.” A sa lako ka davo koto.

6A sa kaci tale ko Jiova, “I Samuela!” ka sa tucake ko Samuela, ka lako vei Ilai, ka kaya, “Koi au ga oqo, ni ko a kacivi au.” Ia sa kaya ko koya, “Au a sega ni kaci, na luvequ; mo la'ki davo tale.”

7Ia sa sega mada ni kilai Jiova ko Samuela, ka sa sega mada ni vakatakilai vua na vosa i Jiova.

8A sa kacivi Samuela tale ko Jiova, e nai katolu ni gauna. A sa tucake ko koya, ka lako vei Ilai, ka kaya, “Koi au ga oqo, ni ko a kacivi au.” Sa qai kila ko Ilai ni sai Jiova sa kaciva na gone.

9A sa kaya kina vei Samuela ko Ilai, “Mo la'ki davo; ia kevaka sa na kacivi iko ko koya, mo kaya, ‘Mo ni vosa mai, i Jiova, ni'u sa vakarorogo na nomuni tamata.’ ” A sa lako ko Samuela, ka davo sobu e na nona tikina.

10A sa lako mai ko Jiova, ka tu, ka kaci me vaka eliu, “I Samuela! I Samuela!” A sa kaya ko Samuela, “Mo ni vosa mai, ni'u sa vakarorogo na nomuni tamata.”

11A sa kaya vei Samuela ko Jiova, “Raica, ka'u na cakava e dua na ka e Isireli ena qasikanunu ruarua kina na daligadra na tamata yadua era na rogoca.

12E na siga ko ya, ka'u na vakayacora vei Ilai na ka kecega ka'u sa tukuna oti e na vukudra na nona lewe-ni-vuvale, ia ni'u sa vakatekivuna ka'u na vakaotia talega.

13Ni'u sa tukuna oti vua ni'u na lewai ira na nona lewe-ni-vuvale ka sega ni mudu, e na vuku ni valavala ca sa kila ko koya; ni sa vakasisilataki rau koi rau na luvena, ka sa sega ni tarovi rau ko koya.

14O koya oqo ka'u sa bubului kina e na vukudra na lewe-ni-vuvale i Ilai, ni na sega ni buluti na nodra i valavala ca na lewe-ni-vuvale i Ilai, ka sega ni mudu, sa segai e nai soro se nai madrali.”

15A sa davo koto ko Samuela, ka mataka mai; a sa qai dolava nai sogo ni vale i Jiova. A sa rere ko Samuela ni vakatakila na raivotu vei Ilai.

16Ia sa kacivi Samuela ko Ilai, ka kaya, “I Samuela, na luvequ.” A sa kaya ko koya, “Koi au ga oqo.”

17A sa kaya ko koya, “A cava na vosa ka vosataka vei iko ko Jiova? Mo kakua mada ni vunia vei au. Me cakacaka vakakina vei iko na Kalou, ka vakaikuritaka, kevaka ko sa vunia vei au e dua na ka e na ka kecega ka vosataka vei iko ko koya.”

18A sa tukuna vua ko Samuela na ka kecega, ka sega na ka e vunia vua. A sa kaya ko koya, “Sai koya ga ko Jiova; me cakava ga ko koya na ka e vinaka vua.”

19A sa tubu ko Samuela, a sa tiko vata kaya ko Jiova, ka sega ni laiva e dua na nona vosa me lutu ki na qele.

20A sa kila ko ira kecega na Isireli, mai Tani ka yacovi Peri-sepa, ni sa vakadinadinataki tu ko Samuela me parofita i Jiova.

21A sa rairai tale mai Sailo ko Jiova, ni sa vakatakilai koya ko Jiova vei Samuela mai Sailo e na vosa i Jiova.