Taniela 1 - Ai Vola Tabu (Vakadewa Makawa Vakavoutaki 2021)（FRV21）

Sa Rawai Jerusalemi ko Nepukanesa

1 2Tui 24.1; 2Vei 36.5-7 E nai katolu ni yabaki ni lewa i Jioiakimi na tui Juta sa lako mai ko Nepukanesa na tui Papiloni ki Jerusalemi, ka sa buku na kena druadrua.

22Tui 20.17,18; 24.10-16; 2Vei 36.10; Aisea 39.7,8Ia na Turaga sa soli Jioiakimi na tui Juta ki na ligana, ka so nai yaya ni vale ni Kalou. Ka sa kauta ko koya ki na vanua ko Saina ki na nona burekalou, ka sa kauta nai yaya ki na valeniyau ni nona kalou.

Digitaki e Va na Cauravou Gone ni Isireli

3A sa kaya na tui vei Asipinasi na turaga liu ni nona mata, me kauti ira eso na Isireli, ka so era kawa ni tui, ka so era tamata turaga,

4na cauravou sa sega e dua na tikidra e ca, sa matavinaka, ka yalomatua e na vuku kecega, ka daukila-ka, ka lomamacala e na vuli ka, ka tamata e kilikili me mai tu e na vale-ni-tui, ka me ra vakavulici e nai vola kei na vosa ni kai Kalitia.

5A sa lewa na tui me dua na kedrai votavota e na veisiga mai na nona kakana ka dua na medra waini mai na waini sa gunu kina ko koya. Ka me vakani ira tiko ka yabaki tolu, ka oti me ra qai mai tu e na mata ni tui.

6Ka sa so vei iratou mai vei ira na Juta, ko Taniela, kei Enanaia, kei Misaeli, kei Asaraia.

7A sa vakayacani iratou ko koya na turaga liu ni mata: sa vakayacani Taniela ko Pelitisasari, kei Enanaia ko Setareki, kei Misaeli ko Mesake, kei Asaraia ko Apeteniko.

Bese ni Kania na Kakana ni Tui

8A sa lewa oti e lomana ko Taniela me kakua ni vakadukadukalitaki koya e nai votavota ni kakana ni tui, se na waini sa gunuva. A sa kerekere ko koya vua na turaga liu ni mata me kakua ni vakadukadukalitaki koya kina.

9Ia na Kalou sa vagolea na yalona na turaga liu ni mata me vinakati Taniela ka me lomani koya sara.

10A sa kaya vei Taniela na turaga liu ni mata, “Au sa rerevaka na noqu turaga na tui, o koya sa lewa na kemudou kei na memudou. De raica ko koya na matamudou ni sa ca ka vinaka na matadra na cauravou dou sai taba vata; ia dou na qai vu ni noqu cala vua na tui, ka'u sa na mate kina.”

11Sa qai kaya ko Taniela vei Melisa, o koya ka lesia na turaga liu ni mata me vakaraici Taniela, kei Enanaia, kei Misaeli, kei Asaraia,

12“Mo vakatovolei keitou mada na nomu tamata, ka bogi tini; ia me soli ga vei keitou na kakana e tubu e na were me keitou kania, kei na wai ni gunu me keitou gunuva.

13Mo qai raica na mata i keitou, kei na matadra na cauravou era kania nai votavota mai na kakana ni tui, ka me vaka na ka ko sa raica, mo qai lewa vakakina kivei keitou na nomu tamata.”

14A sa vakarorogo vei iratou ko koya e na ka oqo, ka vakatovolei iratou ka bogi tini.

15Ia ka oti na bogi tini, sa rairai na matadratou me vinaka ka vakalewe, ka ca na matadra na cauravou kecega era kania nai votavota mai na kakana ni tui.

16A sa kauta tani ko Melisa na kedratou i votavota ni kakana, kei na medratou waini; ka sa solia vei iratou na kakana ni were.

17Ia sa solia na Kalou vei iratou na cauravou vava oqo na lomavuku kei na kila-ka; ka sa vuku ko Taniela ka sa rawata me tukuna nai balebale ni raivotu kecega kei na tadra.

Eratou sa Kau na Cauravou vei Nepukanesa

18Ia ni sa oti na gauna sa vosa kina na tui me ra kau kina vua, sa qai kauti ira yani na turaga liu ni mata kivei Nepukanesa,

19ka sa veivosaki kei iratou ko koya na tui; ia sa sega na tamata e kune vei ira kecega me tautauvata kei Taniela, kei Enanaia, kei Misaeli, kei Asaraia. O koya oqo eratou sa mai tu kina e na mata ni tui.

20Ia e na kila vakavuku kecega kei na kila-ka sa tarogi iratou kina na tui, ka sa kunei iratou ni ratou vuku vakatini cake vei ira kecega na daucaka mana kei na dauvakarai mata ni lomalagi era tiko e na nona matanitu taucoko.

21A sa tiko ga ko Taniela ka yacova nai matai ni yabaki i Sairusi na tui.