1 Samuela 18 - Ai Vola Tabu (Vakadewa Makawa Vakavoutaki 2021)（FRV21）

Na Veidinadinati i Jonacani kei Tevita

1Ia ni sa vosa oti ko koya kivei Saula, sa kabita na yalo i Tevita na yalo i Jonacani, ka sa lomani koya ko Jonacani me vaka sa lomana na yalona.

2A sa kauti koya ko Saula e na siga ko ya, ka sega ni laivi koya me lesu tale ki na vale nei tamana.

3Erau sa qai veiyalayalati ko Jonacani kei Tevita, ni sa lomani koya me vaka sa lomana na yalona.

4A sa luvata tani ko Jonacani na nona kote sa daramaka voli, ka sa solia vei Tevita, kei na nona i sulu, kei na nona i seleiwau talega, kei na nona dakaititi, kei na nona i vau-ni-sulu.

5A sa daulako yani ko Tevita ki na yasana kecega sa talai koya kina ko Saula, ka sai valavala vakavuku tiko; a sa lesi koya ko Saula me lewai ira na tamata i valu, ka sa vinaka vei ira kecega na tamata, kivei ira talega era qaravi Saula.

E Vuvutaki Tevita ko Saula

6Ia ni ra sa lesu tiko ki na nodra i tikotiko, ni sa lesu mai ko Tevita e na vakamatei ira na kai Filisitia, era sa lako mai na yalewa mai na nodra koro kecega na Isireli, ka ra lagalaga sere ka meke tiko, me ra la'ki tavaki Saula na tui, ka vakatibereli kei na api ni ra sa reki tiko.

71Samu 21.11; 29.5A ra sa veisausau ko ira na yalewa ni sa qiriqiri tiko, ka vaka,

“Sa vakamatei ira na veiudolu ko Saula,

kei Tevita na veiudolu vakatini.”

8A sa cudru vakalevu ko Saula, ni sa ca vua na vosa ko ya; a sa kaya ko koya, “Era sa cavuta vei Tevita na veiudolu vakatini, ka ra sa cavuta vei au na veiudolu walega; ia sa qai vo beka ga me nona na matanitu?”

9A sa rai vakatani vei Tevita ko Saula mai na siga ko ya.

Sa Sasaga ko Saula me Vakamatei Tevita

10Ia e na siga ka tarava, sa dua na yalo ca sa curumi Saula mai vua na Kalou, ka sa vosavosa ko koya e loma ni vale ni sa qiriqiri tiko ko Tevita e na ligana, me vaka sa daukitaka e na veisiga. A sa taura e ligana ko Saula na nona moto;

11ka sa cokataka na moto ko Saula, ni sa kaya e lomana, “Au na cokai Tevita me veituituitaki kei na lalaga.” Ia sa leve vakarua ko Tevita ka dro tani vua.

12A sa rerevaki Tevita ko Saula ni sa tiko vata kei koya ko Jiova, ka sa lako tani mai vei Saula.

13E na ka oqo sa biuti koya vakatikitiki kina ko Saula, me kakua ni rau tiko vata kaya, ka sa lesi koya me turaga-ni-valu ni dua na udolu na tamata. A sa daulako yani ka daulako mai ko koya e na matadra na tamata.

14A sa rawata vakavinaka na ka kecega sa qarava ko Tevita, ni sa tiko vata kei koya ko Jiova.

15Ia ni sa raica ko Saula ni sa rawata vakavinaka na veika e qarava ko koya, sa daurerevaki koya kina.

16Ia sa lomani Tevita ko ira kecega na Isireli kei ira na Juta, ni sa dauveiliutaki vinaka ko koya e matadra.

Tauri Mikali ko Tevita me Watina

17A sa kaya vei Tevita ko Saula, “Oqo na luvequ yalewa ka ulumatua, ko Merapi. Au na soli koya vei iko me watimu. Ia mo tamata qaqa mada ga e na vukuqu, ka dauvala e nai valu i Jiova.” Ni sa kaya e lomana ko Saula, “Me kakua ni ravuti koya na ligaqu, ia me qai ravuti koya ga na ligadra na kai Filisitia.”

18Ka sa kaya vei Saula ko Tevita, “O cei koi au, ka ocei ko ira na wekaqu, se na vale i tamaqu e Isireli, me'u na vugona kina na tui?”

19Ia e na gauna sa dodonu me musuki kina vei Tevita ko Merapi na luve i Saula, sa qai soli ga me wati Atirieli na kai Miola.

20Ia oqo, a sa dauvinakati Tevita ko Mikali na luve i Saula. A sa tukuni oqo vei Saula, ka sa vinaka vua na ka ko ya.

21A sa kaya e lomana ko Saula, “Au na musuki koya vua, me coriti koya, ka me tarai koya na ligadra na kai Filisitia.” A sa kaya kina vei Tevita ko Saula e nai karua ni gauna, “O sa na vugoqu edaidai.”

22A sa vakarota ko Saula vei ira era qaravi koya, “Dou vosa lo ga vei Tevita, ka kaya, ‘Raica, sa marautaki iko na tui, ka ra sa lomani iko ko ira kece na nona tamata. Ia mo vakadonuya mo na vugona na tui.’ ”

23A ra sa tukuna na vosa oqo na tamata i Saula kivei Tevita. A sa kaya ko Tevita, “E kenai rairai ni vaka me ka wale beka vei kemudou me'u vugona na tui, ni'u sa tamata wale ka dravudravua?”

24A ra sa tukuna vei Saula ko ira na nona tamata, ka kaya, “Sa vosa ko Tevita me vaka na vosa oqo.”

25A sa qai kaya ko Saula, “Dou kaya vakaoqo vei Tevita, ‘Sa sega ni vinakata na tui nai yau e na vuku ni kenai voli na watimu, ia sa gadreva ga me dua na drau na vusodra na kai Filisitia, ka me cudruvi kina na kena meca na tui.’ ” Ia sa nanuma ga ko Saula me rawa ni vakamatei Tevita ko ira na kai Filisitia.

26Ia ni ra sa tukuna na ka oqo vei Tevita ko ira na nona tamata, sa qai lomavinaka ko Tevita me vugona na tui. Ni se bera ga ni oti na gauna lokuci,

27sa qai cavu tu ko Tevita ka lako yani, ko koya kei ira na nona tamata, ka mokuta e le rua na drau vei ira na kai Filisitia. A sa kauta mai ko Tevita na vusodra, ka wilika vakaoti vua na tui, me vugona kina na tui. Ia ko Saula sa qai solia vua na luvena ko Mikali me watina.

28Ia ni sa raica ko Saula ka kila ni sa tiko vata kei Tevita ko Jiova, ka sa vinakati koya ko Mikali na luve i Saula,

29a sa levu cake na nona rerevaki Tevita ko Saula. O koya oqo sa meca i Tevita tikoga kina ko Saula.

30Era sa qai lako yani na nodra turaga-ni-valu na kai Filisitia me ia nai valu; ia ni ra sa daulako yani, sa dau rawata vakalevu duaduaga na ka ko Tevita vei ira kecega era qaravi Saula, ka sa rogo vakalevu na yacana.