Jope 22 - Ai Vola Tabu (Vakadewa Makawa Vakavoutaki 2021)（FRV21）

Vosa ko Ilivasi: Sa Rui Levu nai Valavala Ca nei Jope

1 Jope 35.6-8 Sa qai vosa ko Ilivasi na kai Temani, ka kaya:

2“E na rawa li ni yaga e dua na tamata vua na Kalou?

E na rawa li ni veiqaravi ki vua na tamata vuku?

3Sa marautaka beka na nomu yalododonu ko Koya sa kaukauwa,

se sa vakaiyau kina ko koya kevaka ko sa vakadodonutaka na nomu sala?

4Sa vunauci iko beka ni ko sa rerevaki koya,

ka ia na veilewai kei iko?

5E sega beka ni ka levu na nomu ca?

Sa sega ni mudu rawa na nomu i valavala ca.

6Ni ko sa taura ga na ka ni veivakadeitaki mai vua na wekamu ka sega na vuna,

ka luvata tani na nodra i sulu era luvawale.

7Ko sa sega ni solia na wai ni gunu vei ira era sa oca,

ka sa bureitaka talega na kakana vei ira era viakana.

8Ko koya na liga kaukauwa sa taukena na vanua,

ka sa tiko kina ko koya sa daudokai.

9Ko sa vakatalai ira tani na yada ka ra sa liga lala,

ka sa musuki na ligadra na luveniyali.

10O koya oqo sa voliti iko kina nai cori,

ka sa vakidroataki iko na rere e veivakidacalataki,

11se na butobuto, mo kakua ni rai rawa kina;

ka sa luvuci iko na wai levu.

12“Sa sega beka ni cecere na Kalou mai lomalagi?

Raica na veikalokalo mai cake sara, ni sa cecere vakaidina!

13Ia ko sa kaya, ‘A cava sara mada e kila na Kalou?

E rawa beka vua me lewa mai na loma ni butobuto loaloa?

14Sa tabonaki koya na o loaloa, ka sa sega ni rai rawa kina,

ka sa lako voli tu e na kabukabu ni lomalagi.’

15Ko na muria tikoga li na sala makawa

era sa daulako kina na tamata ca?

16A sa muduki dole na nodra bula;

ka sa kuitaki laivi na nodra yavu e na waluvu.

17Era sa kaya vua na Kalou, ‘Mo lako tani vei keitou,’

kei na ‘A cava beka me na kitaka vei keitou ko Koya sa Kaukauwa?’

18Ia sa vakasinaita na nodra veivale e na ka vinaka—

ia sa yawa ga vei au na nodra lewa na tamata ca.

19Era sa raica ko ira na yalododonu ka reki kina;

ka sa dredrevaki ira ko koya sa sega ni cala,

20ka sa kaya, ‘Sa muduki vakaidina na neitou meca,

kei na ka sa vo tu vei ira sa vakamai e na bukawaqa.’

21“Mo vakadonuya vata kei na Kalou, ka mo drau veivinakati;

ena yaco kina vei iko na vinaka.

22Mo ciqoma mada na vunau ni gusuna,

ka binia na nona vosa ki lomamu.

23Kevaka ko na lesu mai vei Koya sa Kaukauwa, ko na tarai cake tale;

kevaka ko na vakayawataka nai valavala ca mai na nomu vale-laca,

24kevaka ko na qai vakotora na koula ki na soso,

kei na koula ni Ofa ki na veivatu ni wai drodro,

25ena qai yaco me nomu koula ko Koya sa Kaukauwa

ka me nomu siliva talei talega.

26Ni ko na qai rekitaki Koya sa Kaukauwa

ka ta cake vua na Kalou.

27Ko na qai masu vua, ka na rogoci iko ko koya;

ko na vakayacora talega na ka ko sa yalataka vua.

28Ko na lesia na ka, ia ena vakataudeitaki vei iko,

ka na cilava talega na nomu sala na rarama.

29Ni sa ia na veivakabalei, ko sa kaya, ‘Sa yaco e na vuku ni viavialevu’;

ia sa vakabula na yalomalumalumu ko koya.

30O koya ena vakabulai koya sa cala;

ena vakabulai ko koya ni sa savasava na ligamu.”