Aisea 42 - Ai Vola Tabu (Vakadewa Makawa Vakavoutaki 2021)（FRV21）

Na Dauveiqaravi se i Talatala i Jiova

1 Maciu 3.17; 17.5; Mari 1.11; Luke 3.22; 9.35 Maciu 12.18-21 Raici koya na noqu tamata, ka'u sa tokona;

ko koya ka'u a digitaka, ka'u sa vinakati koya talega e na vu ni lomaqu;

au a solia vua na Yaloqu;

ena vakayacora ko koya na lewa dodonu ki na veimatanitu tani.

2Ena sega ni qoqolou, se kaila,

se tabalaka na domona e na saqata ni koro;

3ena sega ni musuka na gasau sa bibivoro,

se bokoca na wa ni cina sa kubou walega;

ena vakayacora na lewa dodonu e na ka dina.

4Sa sega ni gu ca se yalolailai,

ena vakataudeitaka mada na lewa dodonu e vuravura;

ia era na waraka na nona vunau na veiyanuyanu.

5 Caka 17.24,25 Sa vosa vakaoqo na Kalou ko Jiova,

o koya ka bulia na lomalagi, ka tevuka;

o koya ka tevuka talega na vuravura, kei na ka sa vakatubura;

ko koya sa solia vei ira na tamata e tiko kina na nodra i cegu,

kei na yalodra era sa lako voli kina:

6 Aisea 49.6; Luke 2.32; Caka 13.47; 26.23 “Koi au ko Jiova, ka'u a kacivi iko e na noqu yalododonu,

ka'u na taura na ligamu, ka maroroi iko,

ka soli iko mo vu ni veiyalayalati kei ira na tamata,

mo rarama ki na veimatanitu tani,

7mo dolava na matadra era sa mataboko,

mo kauti ira mai na valeniveivesu era sa vesuki tiko,

kei ira era sa tiko buto mai na vale ni veivakabobulataki.

8Koi au ko Jiova, sai koya oqo na yacaqu;

ia na vakarokoroko me caka vei au ka'u na sega ni solia vua e dua tale,

se na vakavinavinaka me caka vei au ki na matakau ceuceu.

9Raica, na veika sa tukuni makawa sa yaco ga,

ia ka'u sa qai tukuna na veika vovou;

ni se bera ni tubu mai,

ka'u sa tukuna rawa vei kemudou.”

A Sere ni Vakacaucau

10Dou seretaka vei Jiova na sere vou,

na vakavinavinaka vua mai nai yalayala kei vuravura,

koi kemudou talega sa lako sobu ki na wasawasa,

kei na ka kecega sa sinai kina;

na veiyanuyanu, kei ira kecega na lewena.

11Me tabalaka na domodra na vanua dravuisiga kei na kena veikoro;

na veikoro sa tiko kina ko Kitari;

ko ira sa tiko e na uluvatu, me ra ia na sere;

me ra kaikaila mai na dela ni veiulunivanua.

12Me ra ia na vakavinavinaka vei Jiova,

ka vakacaucautaki koya ko ira mai na veiyanuyanu.

13Ena lako yani me vaka na qaqa ko Jiova;

ena vakauqeta na nona yalokatakata me vaka na tamata i valu;

ena kaila ko koya, io, ena qoqolou;

ena gumatua vei ira na nona meca.

Sa Yalataka na Kalou me Vukei Ira na Nona Tamata

14Sa dede na noqu tiko lo;

au a tiko ga, ka'u a dautarovi au;

ia oqo, ka'u na qoqolou me vaka na yalewa sa taratara;

ka'u na vakarusa ka tiloma sara.

15Ka'u na vakalalataka na veiulunivanua kei na veiulu-ni-koro,

ka vakamalaitaka kecega na kedra co;

ka'u na vukica na uciwai me yanuyanu,

ka vakadiva na drano.

16Ka'u na tuberi ira na mataboko e na sala era sa lecava;

ka'u na kauti ira e nai lakolako era sa sega ni kila;

ka'u na vakararamataka na butobuto e matadra,

ka vakadodonutaka na ka sa takelo.

Na ka oqo ka'u na cakava vei ira,

ka sega ni biuti ira.

17Era na vakalesui ki muri, era na madua vakalevu sara—

ko ira era sa vakararavi ki na matakau ceuceu,

ko ira era kaya ki na matakau e vakawaicalataki,

“Koi kemudou na neimami kalou.”

Sa Mataboko ka Didivara ko Isireli

18Koi kemudou na didivara, dou rogoca!

Koi kemudou na mataboko, dou mata cake, mo dou raica!

19Ko cei beka sa mataboko,

ko koya ga na noqu tamata se segai?

Ia ko cei sa didivara

me vakataki koya na noqu tamata ka'u sa tala?

Ko cei sa mataboko me vakataki koya sa dodonu,

ka mataboko me vakataki koya na tamata i Jiova?

20Sa levu na veika ko sa raica, ka sa sega ni ko vakasama kina;

sa basu na daligana, ia ka sa sega ni rogoca ko koya.

21Sa vinakata ko Jiova, e na vuku ni nona yalododonu,

me vakalevulevuya na vunau, ka vakarokorokotaka.

22Ia na kawa tamata oqo era sa kovei ka butakoci;

era sa coriti kecega e nai keli,

ka vunitaki e na valeniveivesu;

era sa tokitaki, ka sa sega e vakabula;

era sa butakoci, ka sa sega e kaya, “Dou vakasuka tale!”

23Ko cei vei kemudou ena vakatudaliga ki na ka oqo,

me vakarorogo ka rogoca e na gauna sa muri mai?

24Ko cei sa soli ira na Jekope me tokitaki,

kei ira na Isireli kivei ira na daubutako?

Ko Jiova, o koya eda sai valavala ca vua, se segai?

Ka ni ra sa bese ni muria na nona sala,

ka ra sa sega ni talairawarawa ki na nona vunau.

25A sa sova kina vei koya na nona cudru katakata,

kei nai valu kaukauwa;

ka sa vakama vakavolivoliti koya, ka sa sega ni kila ko koya;

a sa kati koya, ia sa sega ni vakasara ki na lomana.