Vakatekivu 30 - Ai Vola Tabu (Vakadewa Makawa Vakavoutaki 2021)（FRV21）

1Ia ni sa raica ko Raijeli ni sa sega ni vakaluveni rawa vei Jekope, sa qai vuvutaki Lia na tuakana. A sa kaya vei Jekope, “Solia mada vei au na gone, de'u qai mate!”

2A sa cudru vakalevu sara vei Raijeli ko Jekope, ka sa kaya, “Koi au beka nai sosomi ni Kalou, ko koya sa lewa mo kakua ni vakaluveni?”

3A sa kaya ko koya, “Oqo na noqu vada ko Pila; mo curu vua, ka me vakasucu gone ko koya e na vukuqu, ka me'u vakaivakawa talega mai vua.”

4A sa soli Pila na nona vada me watina; a sa mocera ko Jekope.

5A sa kunekune ko Pila, ka vakasucuma na gonetagane na luve i Jekope.

6A sa kaya ko Raijeli, “Sa lewa e na vukuqu na Kalou, ka sa rogoca na noqu vosa, ka sa solia vei au e dua na gonetagane”; ka sa vakayacani koya kina ko Tani.

7A sa kunekune tale ko Pila na vada i Raijeli, a sa vakasucuma nai karua ni luvedrau kei Jekope.

8A sa kaya ko Raijeli, “E na veimulomulo levu ka'u sa veimulomulo kina kei tuakaqu, ia ka'u sa gumatua”; ka sa vakayacani koya kina ko Navitalai.

9Ia ni sa kunea ko Lia ni sa cegu ni vakasucu, sa kauti Silipa na nona vada, ka sa solia vei Jekope me watina.

10A sa vakasucuma e dua na luvedrau tagane kei Jekope ko Silipa na vada i Lia.

11A sa kaya ko Lia, “Sa dua na ka vinaka!” ka sa vakayacani koya kina ko Kata.

12A sa vakasucuma nai karua ni luve i Jekope ko Silipa na vada i Lia.

13A sa kaya ko Lia, “Sa marau dina koi au! Era na vakatokai au na yalewa me ko marau”; ka sa vakayacani koya kina ko Aseri.

14A sa lako voli yani ko Rupeni e nai tabayabaki sa tamusuki kina na witi, a sa kunea eso na tuta mai na veico, a sa kauta mai kivei Lia na tinana. A sa kaya vei Lia ko Raijeli, “Yalo vinaka mo solia mada vei au eso na tuta nei luvemu.”

15Ia sa kaya vua ko koya, “E se lailai beka na nomu kauta tani vei au na watiqu? Ko sa via kauta tani talega na nona tuta na luvequ, oi?” A sa kaya ko Raijeli, “Ia mo drau na moce vata kaya e na bogi oqo ka me noqu na nona tuta na luvemu.”

16Ni sa lesu mai veikau ko Jekope e na yakavi, a sa la'ki tavaki koya ko Lia, ka kaya, “Ko na mai moceri au; ni'u sa saumi iko oti mai na nona tuta na luvequ.” A sa moce kaya ko koya e na bogi ko ya.

17A sa rogoci Lia na Kalou, a sa kunekune ko koya, ka sa vakasucuma na kenai kalima ni luvedrau tagane kei Jekope.

18A sa kaya ko Lia, “Sa solia vei au na Kalou na ka ka'u a sauma, ni'u a solia na noqu vada vua na watiqu.” A sa vakayacani koya ko Isakari.

19A sa kunekune tale ko Lia, ka sa vakasucuma na kenai kaono ni luvedrau tagane kei Jekope.

20A sa kaya ko Lia, “Sa solia vei au na Kalou nai loloma vinaka; sa na qai rokovi au oqo na watiqu, ka ni'u sa vakasucuma e le ono na luvena tagane”; ka sa vakayacani koya kina ko Sevuloni.

21Ia e muri, sa vakasucuma e dua na luvena yalewa, a sa vakayacani koya ko Taina.

22Sa qai nanumi Raijeli na Kalou, ka sa rogoci koya na Kalou, ka vakatara me vakaluveni.

23A sa kunekune ko koya ka vakasucuma e dua na luvena tagane, ka sa kaya, “Sa kauta tani na noqu madua na Kalou”;

24ka sa vakayacani koya ko Josefa, ni sa kaya, “Me kuria tale vei au e dua na luvequ tagane ko Jiova!”

Tubu Cake na Levu ni Manumanu nei Jekope

25Ia ni sa vakasucumi Josefa ko Raijeli, sa qai kaya vei Lepani ko Jekope, “Mo vakatalai au mada yani, ka me'u sa lako ki na noqui tikotiko kei na noqu vanua.

26Mo solia mai vei au na watiqu kei na luvequ, ko iratou ka'u sa qaravi iko kina, ka me'u sa lako; ni ko sa kila vinaka na veiqaravi ka'u sa cakava vei iko.”

27Ia sa kaya vua ko Lepani, “Kevaka ko sa vakadonuya me'u kaya mada oqo, ni'u sa kila rawa mai na kena vakatakilai vei au ni sa vakalougatataki au ko Jiova e na vukumu;

28mo tukuna mada mai vei au na kemui sau, ka'u na solia.”

29A sa kaya vua ko Jekope, “Ko sa kila vinaka nai valavala ni noqu qaravi iko, kei na kena qaravi vinaka na nomu manumanu vei au.

30Ni sa lailai na ka ko taukena ni'u se bera ni lako mai, ia oqo sa qai tubu vakalevu sara; ka sa vakalougatataki iko ko Jiova ni'u sa tiko eke. Ia oqo, ka'u na qai vakarautaka beka ni naica na ka me ra taukena talega na noqu lewe ni vuvale?”

31A sa kaya ko koya, “A cava me'u solia vei iko?” A sa kaya ko Jekope, “E sega ni dua na ka mo solia vei au. Kevaka ga ko na cakava vei au na ka oqo, ka'u na qai vakania ka vakatawa tale na nomu qele ni manumanu:

32mo laivi au me'u na lako e loma ni nomu qele ni manumanu kecega e na siga edaidai, ka kauta tani mai kina na manumanu kecega sa tavukadiridiri se sa tavutonotono, kei na sipi yadua sa loaloa, kei na me sa tavutonotono se sa tavukadiridiri; ia ko ira sa vakaoqo e muri ena kenai sau vei au.

33Ia ena qai rairai vei iko e na gauna mai muri na noqu i valavala dodonu, ni ko sa la'ki raica na qau i sau. Na me kecega sa na kune vei au, ka sa sega ni tavukadiridiri se tavutonotono, se na sipi sa sega ni loaloa se damudamu, sa macala ni sa butakoci.”

34A sa kaya ko Lepani, “Sa vinaka! Me yaco vakakina me vaka na nomu vosa.”

35Ia sa kauta tani ko Lepani e na siga ko ya na me tagane sa volakoso ka tavutonotono, kei na me yalewa sa tavukadiridiri se tavutonotono, oqori kecega sa vulavula vakatikina, kei na sipi loaloa kecega, ka sa solia kivei iratou na luvena.

36A sa lewa me rau veiyawaki kei Jekope na kena yawa e lakovi rawa e na siga e tolu, ka sa vakania ko Jekope na kena vo ni qele ni manumanu i Lepani.

37A sa taura ko Jekope na taba ni popila, kei na taba ni amodi kei na ivi ni papalagi, ka sa karia na kulina vakatikina me rairai na vulavula e na tabanikau.

38Ia na tabanikau sa karia oti, sa viritura e na mata ni qele ni manumanu e nai gunugunu, e na tikina ka lako mai kina na qele ni manumanu me gunu; ni ra daukunekune ni ra lako mai me gunu.

39A sa kunekune na qele ni manumanu e na mata ni tabanikau, a sa vakasucuma na manumanu e vola koso, ka tavukadiridiri, ka tavutonotono.

40A sa wasea tani ko Jekope na lami, a sa vaqara na mata ni sipi vaka ki na vola koso, kei na sipi loaloa kecega e na qele ni manumanu nei Lepani; a sa kauta na nona qele ni manumanu me tiko vakai ira, ka sega ni kauta me tiko kei na manumanu i Lepani.

41A sa yaco ni sa kunekune na manumanu kaukauwa, sa qai viritura na tabanikau ko Jekope e na mata ni manumanu e nai gunugunu ka me ra kunekune e na maliwa ni tabanikau.

42Ia ni sa malumalumu na manumanu, sa sega ni viritura kina; a sa yaco me nei Lepani na ka malumalumu, ka nei Jekope na ka kaukauwa.

43A sa vutuniyau vakalevu sara na tamata ko ya, a sa ka levu na nona manumanu, kei na nona yalewa-bobula, kei na tagane-bobula, kei na kameli, kei na asa.