1Mo ni kakua ni galu, na Kalou;
mo ni kakua ni tiko lo, mo ni kakua ni tiko wale, na Kalou!
2Raica, era sa ue na nomuni meca;
Ka ra sa viavialevu ko ira era sa cati kemuni.
3Era sa buki kedra vere na nomuni tamata,
ka bose vakaca e na vukudra na tamata ko ni sa vakaruruga.
4Era sa kaya, “Me da mai vakawabokotaki ira me ra kakua ni dua na matanitu;
me kakua ni nanumi tale na yaca i Isireli.”
5Ni ra sa lomavata me ra bose vata;
era sa veiyalayalati me ra saqati kemuni—
6na veivalelaca i Itomi kei Isimeli,
kei Moapi kei ira na Akiri,
7kei Kipali, kei Amoni, kei Amaleki,
na kai Filisitia kei ira na kai Taia;
8Sa duavata talega kei ira ko Asiria;
era sa vukea na luve i Loti. Sela
9 Dvei 4.6-22; 7.1-23 Mo ni cakacaka vei ira me vaka vei ira na kai Mitiani,
me vaka vei Sisera, kei Japini, mai na uciwai ko Kisoni,
10era a rusa mai Edoa,
ka ra sa yaco me vaka na de-ni-manumanu e na vanua.
11 Dvei 7.25; 8.12 Mo ni cakava na nodra turaga me ra vakataki Orepi, kei Siepi,
ia na nodra turaga kecega me vakataki Sepa kei Salimuna,
12ko iratou ka kaya, “Tou taura me nodatou
na veika e nona na Kalou.”
13Noqu Kalou, mo ni vakayacori ira me ra vaka na covulaca,
me ra vaka na vu-ni-sila e na mata ni cagi.
14Me vaka sa tavuna na veikau na bukawaqa,
ka sa vakacaudreva na veiulunivanua na yameyame ni bukawaqa,
15mo ni vakacacani ira vakakina e na nomuni cava
ka vakadomobulataki ira e na nomuni cava levu.
16Mo ni vakamaduataka vakalevu na matadra,
me ra qarava kina na yacamuni, Jiova.
17Me ra vakamaduataki ka taqaya tikoga;
Ia me ra vakamaduataki, ka kawaboko.
18Me ra kila ko ira na tamata ni sai kemuni na yacamuni ga ko JIOVA,
sa cecere sara duaduaga e vuravura taucoko.
Who We AreWhat We EelieveWhat We Do
2025 by iamachristian.org,Inc All rights reserved.
