Niemaia 1 - Ai Vola Tabu (Vakadewa Makawa Vakavoutaki 2021)（FRV21）

Sa Masulaki Ira na Nona Tamata ko Niemaia

1A vosa i Niemaia na luve i Akalaia ka tagane. Ia e na vula ko Kisiliu, e na kenai karuasagavulu ni yabaki, ni ka'u a tiko mai Susa e na vale-ni-tui,

2sa lako mai ko Anani, e dua vei ira na wekaqu, ka so vei ira na Juta; ia ka'u a tarogi iratou e na vukudra na Jiu era sa dro bula, ko ira na kena vo vei ira na vakabobulataki, e na vuku talega i Jerusalemi.

3A ratou sa kaya vei au, “Ko ira sa vo vei ira na vakabobulataki mai na yasana ko ya era sa tiko vakaca sara, ka ra sa madua. Sa basuraki sobu talega na bai kei Jerusalemi, ka sa kama e na bukawaqa na kena veimatamata-ni-koro.”

4Ia ni'u sa rogoca na vosa oqo, au sa tiko sobu ka tagi, ka yaso bogi vica, ka lolo, ka masu vua na Kalou ni lomalagi.

5Ka'u sa kaya, “Au sa masuti kemuni, Jiova na Kalou kei lomalagi, na Kalou levu ka rerevaki, sa vakabauta tiko na nomuni vosa ni yalayala kei na yalololoma vei ira era sa lomani kemuni ka vakabauta na nomuni vunau.

6Me rogo mada na daligamuni, ka me yadra na matamuni, mo ni rogoca kina na masumasu ni nomuni tamata, ka'u sa qai cabora e matamuni, e na siga kei na bogi, e na vukudra na Isireli na nomuni tamata, ni'u sa vakatusa talega na nodra i valavala ca na Isireli, keimami sa cakava vei kemuni. Keimami sai valavala ca, koi au kei na vale ni noqu qase.

7Keimami sa cakacaka vakasisila sara vei kemuni, ka sega ni vakabauta nai vakaro, se nai lesilesi, se na lewa, ko ni a vakarota vei Mosese na nomuni tamata.

8Vsoro 26.33Mo ni nanuma mada na vosa ko ni a vakarota vei Mosese na nomuni tamata, ni kemuni a kaya, ‘Kevaka dou sa talaidredre, au na dui vakasevi kemudou yadua ki na veimatanitu;

9Vrua 30.1-5ia kevaka dou na lesu mai vei au, ka vakabauta na noqu i vakaro, ka cakava; kevaka sa vakasevi tani eso vei kemudou ki nai yalayala kei vuravura, au na vakasoqoni ira mai kina, ka kauti ira ki na yasana ka'u sa digitaka me vakatikora kina na yacaqu.’

10Ia ko ira oqo era nomuni tamata kei na lewe ni nomuni matanitu, ko ni a vakabula e na nomuni kaukauwa levu, kei na ligamuni kaukauwa.

11Kemuni na turaga, me vakarorogo mada na daligamuni ki na noqu masumasu na nomuni tamata, kei na nodra masumasu na nomuni tamata, ko ira era via rerevaka na yacamuni. Ia mo ni vakayacora mada na ka e cakava na nomuni tamata e na siga oqo, ka mo ni vakayacora me lomani au na tamata oqo.”

Ni ka'u sa daucaka mena na tui.