Vakarua 18 - Ai Vola Tabu (Vakadewa Makawa Vakavoutaki 2021)（FRV21）

Na Nodra i Votavota na Bete kei na Livai

1“Ko ira na bete na Livai, io ko ira kece na yavusa i Livai, ena sega na nodra tikina se nodra i votavota vata kei ira na Isireli. Me ra kania ga na ka sa vakacabori vei Jiova e na bukawaqa, kei na nona i votavota.

2Tiko 18.20Era na sega kina ni votai e na kedra maliwa na wekadra; ko Jiova ga sa nodra i votavota, me vaka ka kaya vei ira.

3Ia sa dodonu me nodra na bete mai vei ira na tamata, mai vei ira era vakacabora nai soro, se na bulumakau se na sipi; me ra solia vua na bete na tabana, kei na baluna ruarua, kei na kato ni kena.

4Ai sevu ni nomuni sila, na nomuni waini, kei na nomuni waiwai, kei na vutika ni sipi sa koti taumada, mo ni solia vei koya.

5Ni sa digitaki koya ko Jiova na nomuni Kalou mai na nomuni yavusa kecega, me tu me ia na veiqaravi e na yaca i Jiova, ko koya kei ira na luvena ka sega ni mudu.

6“Ia kevaka sa na lako mai e dua na Livai mai na dua na nomuni koro e Isireli taucoko, sa tiko vulagi kina ko koya, ka sa lako mai ni sa gu sara na lomana ki na yasana sa digitaka ko Jiova,

7ena qai ia na veiqaravi e na yaca i Jiova na nona Kalou, me vakataki ira kecega na Livai na wekana era sa dautu e na mata i Jiova.

8Ena tautauvata na kedrai votavota me ra kania, ia ena kenai kuri talega vei ira yadua nai voli ni ka mai vei ira na nona qase.

Vakatabui nai Valavala Vakasisila ni Veimatanitu Tani

9“Ni kemuni sa yaco ki na vanua sa solia vei kemuni ko Jiova na nomuni Kalou, mo ni kakua ni muria na nodra i valavala vakasisila na veimatanitu ko ya.

10Vsoro 19.26; Lako 22.18Me kakua ni kune vei kemuni e dua me vakacabora na luvena tagane se na luvena yalewa e loma ni bukawaqa, se dua na daurairai, se dua sa daudigitaka na siga eso, se dua sa dauia na parofisai e na gata, se dua sa daucakaisausau,

11Vsoro 19.31se dua sa lawaki, se dua sa taroga na daucurumi, se dua na dauveinita, se dua sa taroga na tamata sa mate.

12Ni ra sa tamata vakasisila vei Jiova ko ira kecega era sa kitaka na veika oqo. E na vuku talega ni veika vakasisila oqo sa vakasevi ira tani e matamuni ko Jiova na nomuni Kalou.

13Maciu 5.48Mo ni yalodina sara vei Jiova na nomuni Kalou.

14Ni ra sa vakarorogo vei ira era daudigitaka na siga eso, kei ira na daurairai, ko ira na veimatanitu ko ni na taukena. Ia koi kemuni, sa sega ni laivi kemuni ko Jiova na nomuni Kalou mo ni vakakina.

A Parofita Vou me Vakataki Mosese

15 Caka 3.22; 7.37 “Ena vakatubura vei kemuni ko Jiova na nomuni Kalou e dua na parofita me vakataki au mai na kemuni maliwa, mai vei ira na wekamuni; mo ni na vakarorogo vei koya;

16oqo me vaka na ka ko ni a kerea vei Jiova na nomuni Kalou mai Orepi e na siga ni soqoni vata, e na nomu a kaya, ‘Me'u kakua ni rogoca tale na domo i Jiova na noqu Kalou, me'u kakua talega ni raica tale na bukawaqa levu oqo, de'u mate kina.’

17A sa kaya vei au ko Jiova, ‘Sa ka dodonu na ka era sa kaya.

18Au na vakatubura vei ira e dua na parofita mai vei ira na wekadra, me vakataki iko. Ia ka'u na vakacuruma na noqu vosa ki na gusuna, ia ena tukuna vei ira na ka kecega ka'u na vakarota vei koya.

19Caka 3.23Ia na tamata sa na sega ni vakarorogo ki na noqu vosa sa na tukuna ko koya e na yacaqu, au na tarogi koya kina.

20Ia na parofita sa doudou me cavuta e dua na vosa e na yacaqu, na ka ka'u sa sega ni vakarota vua me vosataka, se sa vosa e na yaca ni kalou tani eso, ena mate ga na parofita ko ya.’

21Ia de ko ni kaya e lomamuni, ‘Keitou na kila vakaevei na vosa sa sega ni cavuta ko Jiova?’

22Ni kevaka sa vosa e dua na parofita e na yaca i Jiova, ia sa sega ni yaco na ka, se basika vakaidina, sa qai sega ni cavuta na ka ko ya ko Jiova. Sa cavuta ga me vaka na ka sa nanuma na parofita; mo kakua ni rerevaki koya kina.