1 Samuela 16 - Ai Vola Tabu (Vakadewa Makawa Vakavoutaki 2021)（FRV21）

Sa Lumuti ko Tevita me Tui

1A sa kaya vei Samuela ko Jiova, “Sa na bogi vica mada na nomu tagicaki Saula tiko, ni ka'u sa biuti koya me kakua ni nodra tui na Isireli? Mo vakasinaita mada na nomu tavaya e na waiwai, ka lako, au na talai iko vei Jese na kai Peceliema, ni'u sa kunea e dua vei ira na luvena me'u lesia me tui.”

2A sa kaya ko Samuela, “Au na lako vakaevei? Ke sa rogoca ko Saula, ena qai vakamatei au.” A sa kaya ko Jiova, “Mo kauta mada e dua na luve ni bulumakau yalewa, ka kaya, ‘Au sa lako me ia nai soro vei Jiova.’

3Ia mo kacivi Jese ki nai soro, ia ka'u na vakatakila vei iko na ka mo cakava. Ia ko na lumuti koya vei au ko koya ka'u na cavuta vei iko na yacana.”

4A sa kitaka ko Samuela na ka sa kaya ko Jiova, a sa lako yani ki Peceliema. A ra sa lako sautaninini mai na qase ni koro me tavaki koya, ka ra sa kaya, “O sa lako vakavinaka mai, se segai?”

5A sa kaya ko koya, “Vakavinaka ga; au sa lako mai me ia nai soro vei Jiova. Dou vakasavasavataki kemudou, me da lako vata me ia nai soro.” A sa vakarautaki Jese ko koya kei iratou na luvena, ka kacivi iratou ki nai soro.

6Ia ni ratou sa lako mai, sa raici Iliavi ko koya, ka kaya, “Sa tu vakaidina beka e na mata i Jiova na nona lumuti.”

7Ia sa kaya vei Samuela ko Jiova, “Mo kakua ni raica na kenai rairai, se na kena balavu, ni'u sa sega ni digitaki koya. Ni sa sega ni raica ko Jiova me vaka sa raica ko ira na tamata; ni sa raica na ka e sau ko ira na tamata, ia sa raica na yalo ko Jiova.”

8A sa kacivi Epinatapi ko Jese, ka me lako takoso e na mata i Samuela. A sa kaya ko koya, “Oqo talega, sa sega ni digitaka ko Jiova.”

9Sa qai kacivi Sama ko Jese me lako mai. A sa kaya ko koya, “Oqo talega, sa sega ni digitaka ko Jiova.”

10A sa kauti iratou na luvena tagane vituvitu ko Jese me ratou lako takoso e na mata i Samuela. A sa kaya vei Jese ko Samuela, “Sa sega ni digitaki iratou oqo ko Jiova.”

11A sa kaya vei Jese ko Samuela, “Sa ratou tiko kece beka oqo ko iratou na luvemu, se segai?” A sa kaya ko koya, “Sa vo ga e dua, o koya ka gone duadua, ka raica, sa vakatawa sipi tiko ko koya.” A sa kaya vei Jese ko Samuela, “Mo talaka mada e dua me kauti koya mai; ni datou na sega ni tiko sobu ka me lako mada mai ko koya.”

12A sa veitalaki, ka kauti koya mai. A sa damudamu ko koya, ka sa matavinaka, ka vinaka na kenai rairai. A sa kaya ko Jiova, “Mo ia, mo lumuti koya, ni sai koya ga oqo.”

13A sa taura na tavaya waiwai ko Samuela, ka lumuti koya e na kedra maliwa na tuakana. A sa curumi Tevita na Yalo i Jiova mai na siga ko ya. A sa qai ia ko Samuela, ka lako yani ki Rama.

Sa Qiria na Api ko Tevita e na Vuku i Saula

14Ia sa lako tani na Yalo i Jiova mai vei Saula, ka sa dauvakarerei koya e dua na yalo ca mai vei Jiova.

15A ra sa kaya vei Saula ko ira era sa qaravi koya tiko, “Raica oqo, sa dauvakasaurarataki kemuni e dua na yalo ca mai vua na Kalou.

16Ni vosa mada na neitou turaga vei keitou na nomuni tamata sa dautiko e matamuni, me qarai e dua na tamata sa matai sara e na qiri api; ia ni sa yacovi kemuni na yalo ca mai vua na Kalou, ena qiriqiri ko koya e na ligana, ka ko ni na qai vinaka kina.”

17A sa kaya ko Saula vei ira era sa qaravi koya tiko, “Dou qara mada e dua na tamata sa dauqiriqiri vakavinaka, ka kauta mai vei au.”

18A sa vosa mai e dua vei ira na cauravou, ka kaya, “Raica, ka'u sa kunea e dua na luve i Jese na kai Peceliema, sa dauniqiriqiri vinaka, a tamata kaukauwa ka qaqa, kei na tamata i valu, ka vuku e na vosa, a tamata vatukai vinaka, a sa tiko kaya ko Jiova.”

19A sa tala eso na tamata vei Jese ko Saula, ka vaka, “Mo talai Tevita mai vei au, o koya na luvemu ka tiko kei na sipi.”

20A sa kauta ko Jese e dua na asa sa cola madrai ka dua na tavaya waini, ka dua na luve ni me, ka talai Tevita na luvena me kauta vei Saula.

21Ka sa lako mai kivei Saula ko Tevita, ka tu e matana; a sa lomani koya vakalevu, ka sa lesi koya me daucolata na nona i yaragi.

22A sa talaki vei Jese ko Saula, ka kaya, “Me tiko mada ga vei au ko Tevita, ni sa kune loloma e mataqu.”

23Ia ni sa dautarai Saula na yalo ca mai vua na Kalou, sa taura na api ko Tevita, ka qiria e na ligana. A sa dauvakacegu kina ko Saula, ka sa vinaka cake, ka sa daulako tani vua na yalo ca.