2 Veigauna 18 - Ai Vola Tabu (Vakadewa Makawa Vakavoutaki 2021)（FRV21）

Sa Parofisaitaka na Druka ko Maikaia

1A sa ka levu na nona i yau ko Josefati, ka sa dokai vakalevu, ka sa vakawati ki na vuvale i Eapi.

2Ia ni sa oti eso na yabaki sa lako sobu ko koya kivei Eapi mai Samaria. A sa vakamatea ko Eapi e levu na sipi kei na bulumakau me kena, me kedra talega era tiko vata kaya, ka sa cikevi koya me lako ki Remoci-kiliati.

3A sa kaya ko Eapi na tui Isireli kivei Josefati na tui Juta, “O na lako vata kei au ki Remoci-kiliati, se segai?” A sa qai kaya vua, “Koi kedaru vata ga; sa duavata ga na nodaru tamata; ia keimami na duavata kei iko e nai valu.”

4A sa kaya vua na tui Isireli ko Josefati, “Mo taroga mada na vosa i Jiova edaidai.”

5A sa vakasoqoni ira vata kina na tui Isireli, na parofita era le va na drau na tamata, ka sa kaya vei ira, “Me keimami lako ki Remoci-kiliati me ia nai valu, se me'u kakua?” A ra sa kaya, “Ni lako ga, ka na solia na Kalou kivei koya na tui.”

6A sa kaya ko Josefati, “Sa sega beka ni tiko eke e dua tale na parofita i Jiova, me daru taroga vua?”

7A sa kaya vei Josefati ko koya na tui Isireli, “Sa dua tale na tamata, eda tarogi Jiova rawa kina. Ia ka'u sa cati koya, ni sa sega ni parofisaitaka na ka vinaka e na vukuqu, sa parofisaitaka tikoga na ka ca, ko koya ko Maikaia na luve i Imila.” Ka sa kaya ko Josefati, “Me kakua ni kaya vaka ko ya ko koya na tui.”

8Sa qai kaciva e dua na turaga na tui Isireli, ka kaya, “Me kusarawa mai ko Maikaia na luve i Imila.”

9A rau sa dui tiko e nona i tikotiko vakaturaga, na tui Isireli kei Josefati na tui Juta, e na rara ni samu sila mai na matamata-ni-koro mai Samaria, a rau sa vakaisulu vakaturaga; a ra sa ia tiko na parofisai e matadrau ko ira kecega na parofita.

10A sa cakava ko Setekaia na luve i Kinana eso nai leu vakamanumanu e na kaukamea; a sa kaya, “Sa vosa vakaoqo ko Jiova, O na cumuti ira na kai Siria e na veika oqo, ka me ra vakaoti laivi.”

11Ka ra sa parofisai vakakina ko ira kecega na parofita, ka kaya, “Mo lako cake ki Remoci-kiliati, ka mo gumatua; ka na solia ko Jiova ki na ligana na tui.”

12A sa kaya vei Maikaia na tamata ka la'ki kaciva, “Raica, sa tautauvata na nodra vosa na parofita, ka ni ra tukuna ga na ka vinaka vua na tui. Ia me tautauvata mada na nomu vosa kei na nona vosa e dua vei ira, ka mo cavuta na ka vinaka.”

13A sa kaya ko Maikaia, “Me vaka sa bula ko Jiova, na ka sa kaya vei au ko Jiova, oqori ga ka'u na vosataka.”

14Ia ni sa lako mai ko koya vua na tui, sa kaya vei koya na tui, “I Maikaia, me keimami lako ki Remoci-kiliati me vala, se me'u kakua?” A sa kaya ko koya, “Ni lako cake, ka mo ni gumatua; ia era na soli ki na ligamuni.”

15A sa kaya vua na tui, “Me'u vakabubuluitaki iko vakavica, mo cavuta vei au e na yaca i Jiova na ka dina?”

16Tiko 27.17; Isi 34.5; Maciu 9.36; Mari 6.34A sa kaya ko koya, “Au a raici ira kecega na Isireli, ka ra dui se e na veiulunivanua, me vaka na sipi sa sega na nodra i vakatawa. Ka sa kaya ko Jiova, ‘Sa sega na nodra turaga ko ira oqo; me ra dui lesu e na vakacegu ki na nona vale.’ ”

17A sa kaya vei Josefati na tui Isireli, “Au a sega li ni kaya vei iko, ni na sega ni parofisaitaka ko koya na ka vinaka e na vukuqu, na ka ca ga?”

18Sa kaya tale ko koya, “O koya oqo, mo ni rogoca kina na vosa i Jiova: Au a raici Jiova, ni sa tiko e nona i tikotiko vakaturaga, ka ra sa tiko voleka vua e nai matau kei nai mawi ko ira kecega na lewe i lomalagi.

19A sa kaya ko Jiova, ‘O cei ena temaki Eapi na tui Isireli, me lako cake me bale mai Remoci-kiliati?’ A sa vosa e dua ka vaka, ka sa vosa e dua tale ka vaka,

20ka sa lako mai e dua na yalo, ka la'ki tu e na mata i Jiova, ka kaya, ‘Oi au ga, ka'u na temaki koya.’ Ka sa kaya vua ko Jiova, ‘E na sala cava?’

21A sa kaya ko koya, ‘Au na lako yani, ia ka'u na yalo lasulasu e na gusudra kecega na nona parofita.’ A sa kaya ko koya, O na temaki koya, ka ko na rawai koya talega; mo lako yani, ka kitaka vakakina.

22Ia oqo, raica sa vakacuruma ko Jiova na yalo lasulasu e na gusudra na nomuni parofita oqo, a sa vosataka na ka ca ko Jiova, me yacovi kemuni.”

23A sa toro mai ko Setekaia na luve i Kinana, ka sabici Maikaia e baluna, ka sa kaya, “A sala cava ka lako tani kina vei au na Yalo i Jiova me vosa vei iko?”

24Ka sa kaya ko Maikaia, “Raica, ko na kunea e na siga ko ya ko na curu kina ki loma ni loqi, mo vunitaki iko.”

25A sa kaya na tui Isireli, “Dou kauti Maikaia tale kivei Emoni, na turaga ni koro, kei Joasa na luve ni tui;

26ka kaya, ‘Sa vosa vakaoqo na tui, Drau biuta na tamata oqo ki na valeniveivesu, ka vakani koya e na madrai ni veivakararawataki, kei na wai ni veivakararawataki, ka me'u tale vakacegu mada mai.’ ”

27A sa kaya ko Maikaia, “Kevaka ko ni na lesu vakaidina mai e na vakacegu, sa qai sega ni vosa e gusuqu ko Jiova.” Ka sa kaya, “Ni rogoca mada, koi kemuni kecega na tamata.”

Na Vakadrukai kei na Mate i Eapi

28A rau sa lako cake ki Remoci-kiliati, na tui Isireli kei Josefati na tui Juta.

29A sa kaya vei Josefati na tui Isireli, “Au na liatamata tani koi au, ka lako ki nai valu; ia mo vakaisulutaki iko e na nomu i sulu ga.” A sa liatamata tani na tui Isireli, ka rau a lako ki nai valu.

30Ia sa vakarota ko koya na tui Siria vei ira na nona turaga ni qiqi-ni-valu, ka kaya, “Dou kakua ni veivala kaya e dua e lailai, se dua e levu, vei koya duaduaga na tui Isireli.”

31Ia ni ra sa raici Josefati ko ira na turaga ni qiqi-ni-valu, era kaya, “Oqori ga na tui Isireli.” A ra sa vakavolivoliti koya me veivala kaya. A sa qoqolou ko Josefati, ka sa vukei koya ko Jiova; a sa vakavuna na Kalou me ra lako tani mai vua.

32Ia ni ra sa raica ko ira na turaga ni qiqi-ni-valu ni sa sega ni tui Isireli ko koya, era sa lesu ki muri, me kakua ni vakasavi koya.

33A sa dua na tamata sa kaloca vakailoa ga na dakai, ka vanai koya na tui Isireli e na tikina sa veiuturi kina na nona i sulu ni valu. A sa kaya ko koya vua sa vakacici ose ni nona qiqi-ni-valu, “Mo vakalesuya na ligamu, ka kauti au tani mai nai valu, ni'u sa mavoa.”

34A sa tubu cake na katakata ni i valu e na siga ko ya, ka sa vakaukauwataki koya na tui Isireli me duri rawa tiko e na nona qiqi-ni-valu, me vala kei ira na kai Siria, ka yacova na yakavi. Ka sa mate ko koya ni sa vakarau dromu na mata-ni-siga.