1 Samuela 11 - Ai Vola Tabu (Vakadewa Makawa Vakavoutaki 2021)（FRV21）

Sa Vakadrukai Ira na Luve i Amoni ko Saula

1Sa qai lako cake ko Neasi na luve i Amoni, ka la'ki tiko vakaivalu voleka ki Jepesi-kiliati, ka ra sa kaya ko ira kecega na kai Jepesi vei Neasi, “Me da veiyalayalati mada, keimami na qai qaravi iko.”

2Ia sa kaya vei ira ko Neasi na luve i Amoni, “E dua na ka oqo me na vakatautaki kina na noqu veiyalayalati kei kemuni, ko ya me'u leuta tani kece mada na matamuni i matau, ka kauta mai na madua levu vei ira kecega na Isireli.”

3A ra sa kaya vua ko ira na qase ni Jepesi, “Me rube tu mada ga me bogi vitu, ka me keimami tala na tamata eso ki na nodra yasana kecega na Isireli. Ia kevaka sa sega e dua me vakabulai keimami, keimami na qai soli keimami yani vei iko.”

4A ra sa lako mai nai talaki ki Kipea na koro nei Saula, ka ra sa tukuna nai tukutuku oqo vei ira na tamata; a ra sa tabalaka cake na domodra ko ira na tamata kecega, ka tagi.

5Ia oqo, sa muria na qele ni bulumakau ko Saula mai na veiwere. A sa kaya ko Saula, “A cava sa manati ira na tamata, ni ra sa tagi?” A ra sa qai tukuna vua na nodra vosa na kai Jepesi.

6A sa curumi Saula vakaukauwa na Yalo ni Kalou ni sa rogoca na veivosa ko ya, ka sa waqa vakalevu na nona cudru.

7A sa taura ko koya e rua na bulumakau, ka tava vakalailai ka vakauta e na ligadra na tamata eso ki na veiyasana kecega e Isireli, ka kaya, “Ko ira yadua sa sega ni lako mai me muri Saula kei Samuela, ena caka vakakina vakaoqo ki na nodra bulumakau.” A sa kani ira na tamata na rere vei Jiova, ka ra sa lako mai me vaka era le dua ga na tamata.

8A sa wiliki ira ko koya mai Peseki, ni ra sa le tolu na drau na udolu na Isireli, ka ra sa le tolusagavulu na udolu na tamata i Juta.

9A ra sa kaya vei ira na tamata era a talai mai, “Dou la'ki vosa vakaoqo vei ira na kai Jepesi-kiliati: ‘Ni mataka, e na gauna sa katakata mai kina na mata-ni-siga, kemuni na vakabulai.’ ” A ra sa lako nai talaki, ka tukuna vei ira na kai Jepesi, ka ra sa reki.

10A ra sa kaya ko ira na kai Jepesi, “E na mataka keimami na soli keimami yani vei kemuni, ka mo ni qai vakayacora ga vei keimami na ka kecega e vinaka vei kemuni.”

11Ia e na siga tarava sa wasewasei ira na tamata ko Saula me tolu na mataivalu. A ra sa yaco mai vakamataka lailai ni se butobuto na vanua ki na nodra keba na meca, ka mokuti ira na luve i Amoni ka yacova na tu donu ni katakata ni mata-ni-siga. Era sa dui se ko ira na vo-ni-bula, ka sega ni rau bau tu vata e le rua.

12A ra sa kaya vei Samuela na tamata, “O cei ko koya sa kaya, ‘Me tui li vei keda ko Saula?’ Mo ni kauti ira mai na tamata oqori, me keimami vakamatei ira.”

13Ia sa kaya ko Saula, “Ena sega ni dua na tamata me na vakamatei e na siga oqo, ni sa ia na veivakabulai edaidai vei ira na Isireli ko Jiova.”

14A sa kaya vei ira na tamata ko Samuela, “Me da mai lako mada ki Kilikali, ka vakataudeitaka mai kea nai tutu ni veiliutaki vakatui.”

15A ra sa lako na tamata kecega ki Kilikali, ka ra sa buli Saula me tui e na mata i Jiova mai Kilikali. A ra sa vakamatea kina eso nai soro ni veivinakati e na mata i Jiova, ka sa reki vakalevu mai kina ko Saula kei ira kecega na Isireli.