1 Samuela 19 - Ai Vola Tabu (Vakadewa Makawa Vakavoutaki 2021)（FRV21）

Sa Vakasaurarataki Tevita ko Saula

1A sa vosa vei Jonacani na luvena ko Saula, vei ira kece talega na nona tamata, me ra vakamatei Tevita.

2Ia sa vinakati Tevita vakalevu ko Jonacani, na luve i Saula, a sa tukuna vei Tevita ko Jonacani, ka vaka ne, “Sa vinakata tiko ko Saula na tamaqu me vakamatei iko. Ia mo qarauni iko mada e na mataka, ka tiko ga e na dua na tikina vuni, ka mo vunitaki iko.

3Au na lako yani me keirau la'ki tu vata kei tamaqu e na were ko sa tiko kina, ka'u na tukuni iko vei tamaqu. Ia kevaka au raica rawa e dua na ka, ka'u na tukuna vei iko.”

4A sa tukuna na ka vinaka e na vuku i Tevita ko Jonacani kivei Saula na tamana, ka kaya vua, “Me kakua ni kitaka na ka ca ko koya na tui vei Tevita, na nona tamata, ni sa sega ni kitaka e dua na ka ca vei iko ko koya, ka ni sa vinaka sara na nona i valavala vei iko;

5ni sa bolea sara na mate ko koya ka sa la'ki vakamatei koya na kai Filisitia, ka sa cakava ko Jiova na veivakabulai levu vei ira kecega na Isireli. Ko a raica, ka marau kina. E na vuku ni cava ko sa via cakava na ka ca vua na tamata sa sega ni cala, ka mo vakamatei Tevita walega?”

6A sa vakarorogo ko Saula ki na vosa i Jonacani. A sa bubului ko Saula, “Me vaka sa bula ko Jiova, ena sega ni vakamatei ko koya.”

7A sa kacivi Tevita ko Jonacani, ka tukuna vua ko Jonacani na ka kecega oqo. A sa kauti Tevita vei Saula ko Jonacani, a sa dautiko vata kaya ko koya, me vaka eliu.

Sa Vukei Tevita ko Mikali me Dro Tani mai vei Saula

8A sa ia tale nai valu. A sa lako yani ko Tevita ka vala kei ira na kai Filisitia, ka mokuti ira e na veiraravui levu, ka ra sa dro tani sara mai vua.

9A sa curumi Saula na yalo ca mai vei Jiova, ni sa tiko e nona vale ko koya, ka sa taura e ligana na nona moto. A sa qiriqiri tiko ko Tevita.

10Sa qai segata ko Saula me cokai Tevita me veituituitaki koya kei na lalaga e na moto; ia sa lako lo yani ko koya mai vei Saula, ka sa cokataka na moto ki na lalaga ko koya. A sa dro bula ko Tevita e na bogi ko ya.

11 Same 59 A sa tala yani ko Saula eso na tamata ki na vale i Tevita, me vakatawai koya, ka me ratou vakamatei koya e na mataka lailai. Ia sa tukuna vei Tevita ko Mikali na watina, ka kaya, “Kevaka ko sa sega ni vakabulai iko e na bogi edaidai, ko na vakamatei ni mataka.”

12A sa tukuci Tevita sobu ko Mikali mai na katuba lailai e cake; a sa lako yani ko koya, ka dro, ka sa bula.

13A sa kauta ko Mikali e dua na matakau, ka vakotora e nai mocemoce, ka sa kauta nai lokoloko vutika ni me kame kenai lokoloko, ka tutuvitaka e na dua nai tutuvi.

14Ia ni sa tala ko Saula eso na tamata me kauti Tevita, sa kaya na yalewa, “Sa tauvi mate ko koya.”

15A sa talai iratou na tamata ko Saula me la'ki raici Tevita, ka kaya, “Dou kauti koya cake mai vei au e nai mocemoce, me'u vakamatei koya.”

16A ratou sa lako mai na tamata, ka raica, sa no e dua na matakau e nai mocemoce, a sa dua nai lokoloko vutika ni me sa nona i lokoloko.

17A sa kaya vei Mikali ko Saula, “A cava ko sa vakaisini au kina vakaoqo, ka tala yani na noqu meca me bula ko koya?” A sa kaya vei Saula ko Mikali, “Sa kaya vei au ko koya, ‘Mo laivi au mada me'u lako; me'u vakamatei iko mei cavai?’ ”

Dro ki Rama ko Tevita kivei Samuela

18A sa dro ko Tevita, ka bula, ka lako kivei Samuela ki Rama, ka tukuna vua na ka kecega ka cakava vua ko Saula. A rau sa lako kei Samuela me rau tiko mai Naioci.

19A sa tukuni vei Saula, ka vaka ne, “Raica, sa tiko mai Naioci e Rama ko Tevita.”

20A sa tala ko Saula eso na tamata me tauri Tevita. Ia ni ratou sa raica nai vavakoso parofita ni sa parofisai tiko, ka sa tiko ko Samuela ni sa lesi me liutaki ira, a sa curumi iratou na tamata i Saula na Yalo ni Kalou ka ratou sa parofisai talega ko iratou.

21Ni sa tukuni oqo vei Saula, a sa tala eso tale na tamata, ka ratou sa parofisai talega ko iratou. A sa tala vakatolu eso na tamata ko Saula, a ratou sa parofisai talega ko iratou.

22A sa qai lako talega ki Rama ko koya, ka yaco ki nai keli-wai levu mai Seku. A sa taro ko koya, ka vaka ne, “Sa evei beka ko Samuela kei Tevita?” A sa kaya e dua, “Raica, erau sa tiko mai Naioci e Rama.”

23A sa lako yani kina ko koya ki Naioci mai Rama. A sa curumi koya talega na Yalo ni Kalou, ka sa lako yani ko koya ka parofisai lako, ka yaco sara ki Naioci mai Rama.

241Samu 10.11,12A sa luvata talega ko koya na nona i sulu, ka parofisai talega ko koya e na mata i Samuela, a sa koto luvawale e na siga taucoko ko ya kei na bogi taucoko ko ya. O koya oqo sa kainaki kina, “Sa bau dua talega vei ira na parofita ko Saula?”