Tiko mai na Lekutu 27 - Ai Vola Tabu (Vakadewa Makawa Vakavoutaki 2021)（FRV21）

Vakaro ni Vota Vanua Baleti Iratou na Luvei Solifati Yalewa

1Eratou sa qai lako mai ko iratou na yalewa na luve i Silofati, na luve i Eferi ka tagane, na luve i Kiliati ka tagane, na luve i Mekiri ka tagane, na luve i Manasa ka tagane, e na veiyavusa i Manasa na luve i Josefa. Ia oqo na yacadratou na luvena yalewa: ko Mala, ko Noa, kei Okila, kei Milika, kei Tirisa.

2A ratou sa tu e na mata i Mosese, kei na mata i Iliesa na bete, kei na matadra na turaga kei ira nai soqosoqo taucoko, e na katuba ni vale ni veitavaki, ka ratou kaya,

3“Sa mate na tama i keitou mai na vanua lala, ka sega ni tiko vata kei ira era soqoni vata me vala kei Jiova e nai lawalawa i Kora; sa mate ga e na nona i valavala ca, ka sa sega na luvena tagane.

4Me bokoci laivi e na vuku ni cava na yaca ni tama i keitou mai na nona mataqali, ni sa sega na luvena tagane? Mo ni solia ga vei keitou nai votavota e na kedra maliwa na wekana na tama i keitou.”

5A sa kauta na nodratou leqa ko Mosese me lewa ko Jiova.

6A sa vosa vei Mosese ko Jiova, ka kaya,

7Tiko 36.2“Sa dodonu na nodratou vosa na goneyalewa na luve i Silofati. Mo solia dina ga vei iratou e dua nai votavota me ratou taukena e na kedra maliwa na wekana na tamadratou, ia mo solia vei iratou nai votavota ni tamadratou.

8Ia mo vosa vei ira na Isireli, ka kaya, ‘Kevaka sa mate e dua na tamata, ka sa sega na luvena tagane, dou qai solia na nona i votavota vua na luvena yalewa.

9Ia kevaka sa sega na luvena yalewa, dou solia ga na nona i votavota vei ira na tuakana kei na tacina.

10Ia kevaka sa sega na tuakana se na tacina, dou solia na nona i votavota vei ira na tamana lalai.

11Ia kevaka sa sega na tamana lalai, dou solia na nona i votavota vua na wekana sa wekana dina e nona mataqali, me taukena ko koya. Ia oqo sa kenai lesilesi vei ira na Isireli me ra lewa vakakina, me vaka ka vakarota vei Mosese ko Jiova.’ ”

Lesi ko Josua me Sosomitaki Mosese(Vakarua 31.1-8)

12 Vrua 3.23-27; 32.48-52 A sa kaya vei Mosese ko Jiova, “Mo cabeta na ulunivanua oqo ko Aparimi, ka raica na vanua ka'u sa solia vei ira na Isireli.

13Ia ni ko sa raica oti, ko na qai toki talega vei ira na kai nomu, me vaka ka toki yani ko Eroni na tuakamu,

14ni drau a talaidredre ki na noqu vunau, mai na vanua lala ko Sini, ni drau sa sega ni vakarokorokotaki au mai na wai e matadra nai soqosoqo, ni ra sa veileti.” (Ko ya na wai ko Meripa mai Ketesa e na vanua lala ko Sini.)

15A sa vosa vei Jiova ko Mosese, ka kaya,

16“Me lesia mada ko Jiova na Kalou ni yalodra na tamata kecega e dua na tamata me lewai ira nai soqosoqo,

171Tui 22.17; Isi 34.5; Maciu 9.36; Mari 6.34ka me lako voli e na kedra maliwa, me liutaki ira ko koya ni ra curu yani, ka liutaki ira ni ra sa curu mai; me ra kakua kina ni vaka na sipi sa sega na kedrai vakatawa ko ira nai soqosoqo i Jiova.”

18Lako 24.13A sa kaya vei Mosese ko Jiova, “Mo kauti Josua na luve i Nuni, a tamata sa tiko vua na Yalo Tabu, ka tabaki koya e na ligamu;

19ka vakaturi koya e na mata i Iliesa na bete, kei na matadra nai soqosoqo taucoko; ka vakaroti koya e matadra.

20Ia mo lesi koya me vakataki iko e na ka eso, me ra talairawarawa kina nai soqosoqo taucoko ni Isireli.

21Lako 28.30; 1Samu 14.41; 28.6Ia me dau tu ko koya e na mata i Iliesa na bete, o koya ena taroga e na vukuna vaka na lewa ni Urimi e na mata i Jiova. Era na curu yani e na nona vosa, ka curu mai e na nona vosa, ko koya kei ira kece vata kaya na Isireli, io nai soqosoqo taucoko.”

22A sa kitaka ko Mosese me vaka ka vakarota vua ko Jiova. Ka sa kauti Josua, ka vakatura e na mata i Iliesa na bete, kei na matadra nai soqosoqo taucoko;

23Vrua 31.23a sa tabaka e na ligana, a sa vakaroti koya, me vaka ka vakarota ko Jiova e na gusu i Mosese.