Same 52 - Ai Vola Tabu (Vakadewa Makawa Vakavoutaki 2021)（FRV21）

Na Nodra Lewai na Tamata CaVua nai liuliu ni sere; a Masikili. A Same i Tevita ni sa lako mai ko Toeki na kai Itomi vei Saula ka kaya vua, “Sa lako mai ko Tevita ki na vale i Eiimeleki.”

1A cava ko sa vakalevulevui iko kina e na ca,

o iko na tamata qaqa?

A yalololoma ni Kalou sa sega ni mudu rawa.

2Sa vu ni ca tiko na yamemu,

sa vaka nai toro gata,

sa cakacaka vakaveivakaisini.

3O sa vinakata na ka ca, ka cata na ka vinaka,

o sa vinakata ni ko vosa lasu, ka cata ni ko vosa dodonu. Sela

4Ko sa vinakata na vosa kata kecega,

kei na gusu dauveivakaisini.

5Ia na Kalou, ena vakarusai iko mo sega ni bula tale;

ena tauri iko, ka cavuti iko laivi mai na nomu i tikotiko;

ka cavuti iko tani mai na vanua ni bula. Sela

6A ra na raica na yalododonu, ka ra na rere,

ka ra na dredrevaki koya ka kaya,

7“Raica, oqo na tamata sa sega ni vakararavi

vua na Kalou me nona kaukauwa,

ia sa vakararavi ga ki na levu ni nona i yau,

ka vakaukauwataki koya e na nona i valavala ca.”

8Ia koi au, ka'u sa vaka na olive bulabula

e na vale ni Kalou.

Au sa vakararavi tikoga ki na loloma ni Kalou

ka sega ni mudu.

9Ena sega ni oti na noqu vakavinavinaka vei kemuni

e na vuku ni ka kemuni a cakava.

Ka'u na qarava tiko na yacamuni

ni sa vinaka oqo e matadra na nomuni tamata yalosavasava.