1A noqu rarama kei na noqu i vakabula ko Jiova;
ko cei me'u rerevaka?
A kaukauwa ni noqu bula ko Jiova;
me'u taqaya e na vuku i cei?
2Ni ra sa lako vakaivalu mai vei au na tamata ca
kei na noqu meca—
me ra kania na lewequ,
era na tarabe ga ka bale.
3Kevaka era sa mai tuvai valu vei au na mataivalu e le vuqa,
ena sega ni rere na yaloqu;
kevaka sa yaco vei au nai valu,
ka'u na yalodei ga me vakakina.
4E dua na ka ka'u sa gadreva vei Jiova,
oqori ga ka'u na segata tiko;
me'u tiko e na vale i Jiova
e na veisiga kecega ni noqu bula,
me'u vakaraica na lagilagi i Jiova,
ka vakatarotaro tiko e na nona vale-ni-soro.
5Ni na vunitaki au e na nona vale
e na gauna ni rarawa;
ena vunitaki au e na yasana vuni e na nona valelaca;
ena vakaturi au ko koya ki na dela ni vatu.
6Ena qai laveti cake na uluqu
me cecere cake vei ira na noqu meca era sa vakavolivoliti au;
ia ka'u na vakacabora nai madrali ni marau
e na nona valelaca;
ka'u na sere, io, ka'u na seretaka na vakavinavinaka vei Jiova.
7Ni rogoci au, Jiova, ni sa rogo na noqu tagi,
ni lomani au talega, ka vosa mai vei au.
8Ni kemuni a kaya, “Dou vakasaqara na mataqu,”
Sa kaya vei kemuni na yaloqu,
“A matamuni, i Jiova, ka'u sa vakasaqara.”
9Ni kakua ni vunia na matamuni vei au.
Kakua ni biuta tani na nomuni tamata e na nomuni cudru,
koi kemuni ga na noqu dauniveivuke.
Kakua ni vakatalai au tani, se laivi au,
oi kemuni na Kalou na noqu i vakabula!
10Ni sa laivi au na tamaqu kei na tinaqu,
ia ena qai keveti au cake ko Jiova.
11Ni vakavulici au, i Jiova, e na nomuni sala,
ka tuberi au e na sala dodonu
e na vukudra na noqu meca.
12Ni kakua ni soli au ki na nodra vakatulewa na noqu meca,
ni sa tucake vei au ko ira na dauveibeitaki vakailasu,
kei ira era sa cavuta tiko na vakacaca.
13Kevaka ka'u a sega ni vakadinata
me'u raica na yalovinaka i Jiova e na vanua ni bula,
ke sa qai waicala na yaloqu.
14Mo waraki Jiova;
gumatua, ena qai vakataudeitaka na yalomu ko koya;
io, mo waraki Jiova ga!
Who We AreWhat We EelieveWhat We Do
2025 by iamachristian.org,Inc All rights reserved.
