Aisea 46 - Ai Vola Tabu (Vakadewa Makawa Vakavoutaki 2021)（FRV21）

Na Veikalou ni Papiloni

1Sa cuva sobu ko Peli, sa vakalairoro ko Nipo;

a kedrau matakau sa toka e na daku ni manumanu, kei na daku ni bulumakau;

sa vakavodoki tu na nomudou i kaukau,

sai colacola bibi ki na manumanu sa oca.

2Erau sa vakalairoro, erau sa cuva sobu vata;

erau sa sega ni vakabula rawa nai colacola bibi,

a rau sa kau vakabobula lako koi rau.

3“Dou vakarorogo mai vei au, na vale i Jekope,

kei kemudou kece na vo-ni-bula e na vale i Isireli;

koi kemudou ka'u sa keveta voli mai na kete,

ka roqota voli mai na gauna dou sa sucu kina;

4ia ka'u sai koyakoya tikoga ka yacova na gauna dou na qase kina;

ka'u na keveti kemudou mo dou sa sika mada ga.

Ka'u a bulia, ia ka'u na ia tikoga na veikeveti, kei na veiroqoti,

ka'u na ia talega na veivakabulai.

5“Ko cei dou na vakatauvatanitaki au vata me keirau tautauvata,

ka biuti keirau vata, me keirau veiucui?

6Ko ira era dausova vakailoa na koula mai na taga,

ka vakarautaka na siliva e na kenai vakarau—

era sa sauma na matai ni koula, ka sa cakava ko koya me kalou;

era sa qai cuva sobu ka qarava!

7Era sa vakataqara ki domodra, ka ra colata voli,

era sa viritura e na kenai tutu, ka sa tu ga e kea;

ena sega ni veitosoyaki rawa mai na kenai tutu.

Kevaka e dua sa na kaci vua, ena sega ni rogo mai

se vakabulai koya mai na nona leqa.

8“Dou nanuma oqo ka mo dou tudei ga,

dou vakasara ki na lomamudou, koi kemudou na dauvuki tani,

9dou daunanuma na ka makawa eliu;

ni sai au na Kalou, ka sa sega tale e dua;

sai au ga na Kalou, ka sa sega e dua me keirau tautauvata kaya,

10ka'u sa dautukuna na kenai vakataotioti mai na kenai vakatekivu

kei na gauna eliu na veika era se bera ni caka;

ka'u a kaya, ‘Na noqu lewa ena tu ga,

ia na ka kece ka'u sa vinakata ka'u na cakava ga,’

11ka'u sa kaciva na ikeli mai na tokalau,

kei na tamata sa na vakayacora na noqu i naki, mai na vanua yawa.

Ka'u sa cavuta, ka'u na vakayacora talega;

ka'u sa nakita, ka'u na cakava talega.

12“Dou vakarorogo vei au, koi kemudou sa yalokaukauwa,

ka sa veiyawaki kei na cakacaka dodonu:

13Au sa kauta voleka mai na noqu cakacaka dodonu,

ena sega ni yawa;

kei na veivakabulai ka'u sa ia, ena sega ni berabera;

ia ka'u na tauca na bula mai Saioni me nodra na Isireli na noqu lagilagi.”