Jope 36 - Ai Vola Tabu (Vakadewa Makawa Vakavoutaki 2021)（FRV21）

Sa Vakacerecereya ko Ilaiu na Vinaka ni Kalou

1A sa tomana na nona vosa ko Ilaiu, ka kaya:

2“Mo vosoti au mada vakalailai, ka'u na vakatakila vei iko,

ni sa vo tiko me'u tukuna e dua na ka e na vukuna na Kalou.

3Au na kauta vakayawa mai na noqu vuku,

ka'u na okata ni sa yalododonu na noqu Dauveibuli.

4Ni sa sega vakaidina ni lasu na noqu vosa;

o koya sa tiko vata kei iko, sa vinaka duaduaga na nona vuku.

5“Raica, sa kaukauwa na Kalou ka sa sega ni beca e dua;

sa ka levu sara na nona kaukauwa ni yalomatua.

6Sa sega ni maroroi ira me ra bula tiko nai valavala ca,

ka sa ia na ka dodonu vei ira na dravudravua.

7Sa sega ni vagolea tani na matana mai vei ira na yalododonu,

ia kivei ira na tui e nai tikotiko vakaturaga

sa vakataudeitaki ira tiko ka tawa mudu, ka ra sa vakalevulevui.

8Ia ke sa vauci e na sinucodo

ka vesuki e nai vau ni rarawa,

9e na qai vakatakila vei ira na nodra cakacaka

kei na nodra i valavala ca, ni ra sai valavala viavialevu.

10Sa dolava na daligadra me ra vakatavulici

ka sa vakarota vei ira me ra saumaki mai na ca.

11Kevaka era vakarorogo ka qaravi koya,

era na vakaotia na nodra siga ni ra tiko vinaka,

kei na nodra yabaki ni ra marau tiko.

12Ia kevaka era sa sega ni vakarorogo, era na rusa e nai seleiwau,

ka mate e na leca-i-ka.

13“Ko ira sa sega ni kila na Kalou era sa binia tiko na cudru;

era sa sega ni tagi vua ni sa vauci ira.

14Era mate dole ni ra se tabagone,

ka tini koso na nodra bula e na madua.

15Sa vakabula na dravudravua ko koya e na nona rarawa,

ka sa dolava na daligadra ni ra vakasaurarataki.

16Ka sa via kauti iko talega mai na vanua ni rarawa

ki na vanua rabailevu sa sega kina na osooso,

ka sa uro walega na ka sa tuvai tu e na nomu tepeli.

17“Ia ko sa sinai sara e na nodra lewai nai valavala ca;

sa vesuki iko ga na veilewai kei na lewa dodonu.

18Qarauna me kakua ni temaki iko na cudru mo la'ki veivakalialiai kina,

ka kakua ni vakatara na kena levu ni i lavo me vagolei iko tani.

19Ena rogo beka na nomu tagi ni kere veivuke baleta na leqa,

se sasaga e na nomu kaukauwa kece sara?

20Mo kakua ni daugadreva na bogi,

e na gauna era dauyali kina na tamata mai na nodra i tikotiko.

21Mo qarauni iko! Mo kakua ni goleva na ka sa sega ni dodonu;

ni ko sa digitaka oqo ka cata na rarawa.

22Raica, sa laveti na Kalou e na nona kaukauwa;

ia ko cei nai vakatavuvuli sa vakataki koya?

23Ko cei sa lesia na nona i lakolako,

se ko cei me kaya, ‘Ko sa caka cala’?

24“Mo nanuma mo vakacaucautaka na nona cakacaka,

na veika era sa dauseretaka na tamata.

25Era sa vakaraica oqo na kawa tamata kecega;

era sa dikeva vakayawa mai na tamata.

26Raica, sa cecere na Kalou, ia eda sa sega ga ni kilai koya;

sa sega ni kilai rawa nai wiliwili ni nona yabaki.

27Ni sa vakuvuya cake na wai ko koya;

sa tau mai kina na uca me vaka na kena bewabewa,

28sa lutu sobu mai na o

ka miriki ira vakalevu na lewe vuqa.

29Sa dua beka e kila rawa na kena dautete na o,

se na vadugu ni kurukuru e nona vale?

30Raica, sa tevuka ko koya na nona rarama e delana,

ka sa ubia na dreke ni wasawasa.

31Ni sa lewai ira na veivanua e na ka oqo;

sa solia vakalevu na kakana.

32Sa tabonaka na livaliva e na ligana,

ka vakarota me tibika na vanua sa makataka.

33A kena rorogo sa tukutuku e na vukuna,

ka sa tukuna talega na bulumakau na nona cabe cake.