Roma 14 - Ai Vola Tabu (Vakadewa Makawa Vakavoutaki 2021)（FRV21）

Kakua ni Vakalewa na Wekamu

1 Kolo 2.16 Me baleti koya sa malumalumu na nona vakabauta, dou ciqomi koya, ia me kakua ga ni ia na veiletitaki ni vakasama duidui eso.

2Na nona vakabauta e dua sa rawa kina vua me kania na ka kecega, ia ko koya sa malumalumu sa daukania ga na kakana drau-ni-kau.

3Me kakua ni beci koya sa sega ni kana ko koya sa kana, ia me kakua ni lewai koya sa kana ko koya sa sega ni kana, ni sa ciqomi koya na Kalou.

4O cei ko iko mo vakalewa na nona tamata dauveiqaravi e dua tale? Ena tu ko koya, se bale, vua na nona turaga. Io, ena tudei ga, ni sa rawarawa vua na Kalou me vakataudeitaki koya.

5E dua sa doka e dua na siga ka segai na siga kadua, ka dua tale sa doka na siga kecega. Me dui lewa deivaka na tamata yadua e na lomana.

6O koya sa vakatatabutaka na siga, sa ka ga vua na Turaga na nona vakatatabu. Ia ko koya sa kana, sa ka ni nona vakarokoroko ga vua na Turaga na nona kana, ni sa vakavinavinaka ko koya vua na Kalou; ia ko koya sa sega ni kana, sa ka talega ni vakarokoroko vua na Turaga na nona sega ni kana, ka sa vakavinavinaka ko koya vua na Kalou.

7Eda sa sega ni bula e na vukuda ga, ka da sa sega ni mate e na vukuda ga.

8Kevaka eda sa bula, eda sa bula ga e na vuku ni Turaga, se da mate, eda sa mate ga e na vuku ni Turaga. O koya oqo, se da bula se da mate, eda sa nona ga na Turaga.

9E na vuku ni ka oqo sa mate kina na Karisito ka sa bula tale, me nodra Turaga ko ira era sa mate kei ira era sa bula.

10 2Kori 5.10 Ia ko iko, ko sa vakalewai koya na wekamu e na vuku ni cava? Se ko iko tale, ko sa beci koya na wekamu e na vuku ni cava? Ni da na tu kecega e na mata ni tikotiko ni veilewai ni Kalou.

11Aisea 45.23Ni sa volai,

“Me vaka ni'u sa bula, sa kaya na Turaga, ena tekiduru vei au na duru kecega,

ka vakavinavinaka vua na Kalou na yame kecega.”

12O koya oqo eda na dui vakatusai keda kecega vua na Kalou.

Kakua ni Vakavuna na Nona Bale na Wekamu

13O koya oqo me da qai kakua tale ni dauveivakalewai tiko, ia me vakatulewataki ga me kakua ni dua me cakava e dua na ka me tarabe kina se bale kina na wekana.

14Au sa kila, ka sa vakadinadinataka vei au na Turaga ko Jisu, ni sa sega na ka e dukadukali vakai koya ga; ia vua sa nanuma sa dukadukali na ka, sa qai dukadukali ga vei koya.

15Ni kevaka sa rarawa na lomana na wekamu e na vuku ni kakana, o sa qai sega ni valavala me vaka na loloma. Kakua ni vakatara na kakana ko kania me laki vakacacani koya ka sa mate e na vukuna na Karisito.

16O koya oqo me kakua ni qai cavuti me ka ca na ka dou sa okata me vinaka.

17Ni sa sega ni ka me baleta na kakana se na gunu na matanitu ni Kalou, ia sa baleta ga na yalododonu, kei na vakacegu kei na reki e na Yalo Tabu.

18Ia ko koya sa qaravi Karisito e na veika oqo sa ciqomi mai vua na Kalou ka sa vakadonui e na matadra na tamata.

19O koya oqo me da sasagataka kina na veika e kauta mai na veivinakati kei na tubu cake.

20Kakua ni vakarusa na cakacaka ni Kalou e na vuku ni kakana. E dina ga sa savasava na ka kecega, ia sa sega ni dodonu vua e dua me na vakatarabetaka tale e dua mai na kakana e kania.

21E vinaka mo kakua ni kania na lewe ni manumanu, se gunu waini, se kitaka e dua na ka ena la'ki bale kina na wekamu.

22Na vakabauta sa tu vei iko, me tu mada ga vei iko e na mata ni Kalou. Sa kalougata na tamata sa sega ni beitaki koya e na ka sa vakatara ko koya.

23Ia ko koya sa vakatitiqa e na lewai me cudruvi kevaka sa kana, ni sa sega ni kitaka oqo e na vakabauta. A ka kecega sa sega ni yavutaki e na vakabauta sa okati me valavala ca.