Same 86 - Ai Vola Tabu (Vakadewa Makawa Vakavoutaki 2021)（FRV21）

A Masu ni Kere Veivuke A Masu i Tevita.

1Mo ni vakalakala mai na daligamuni, Jiova, mo ni rogoci au,

ni'u sa rarawa ka dravudravua.

2Mo ni maroroya na yaloqu, ni'u sa yalododonu;

oi kemuni na noqu Kalou,

mo ni vakabula na nomuni tamata sa vakararavi vei kemuni.

3Mo ni yalololoma mai vei au, kemuni na Turaga,

ni'u sa tagi vei kemuni e na veisiga.

4Mo ni vakamarautaka na yalona na nomuni tamata,

ni'u sa vagolea cake vei kemuni na Turaga, na yaloqu.

5Ni kemuni sa Turaga dauyalovinaka, ka dauveivosoti;

ka dau levu na nomuni loloma vei ira kecega era tagi vei kemuni.

6Mo ni vaqara daligamuni mai, Jiova, ki na noqu masu;

ka vakarorogo ki na domo ni noqu kerekere.

7E na siga ka'u rarawa kina ka'u na masuti kemuni,

ni kemuni na vosa mai vei au.

8Sa sega e dua vei ira na kalou sa vakataki kemuni na Turaga,

ka sa sega na cakacaka me tautauvata kei na nomuni cakacaka.

9 Vtaki 15.4 Na veimatanitu kecega ko ni a cakava era na lako

mai ka soro vei kemuni na Turaga,

ka ra na vakarokorokotaka na yacamuni.

10Ni sai kemuni ka levu, ka sa cakava na ka e veivakurabuitaki;

sai kemuni duaduaga na Kalou.

11Mo ni vakavulici au, Jiova, e nomuni sala,

au na muria na nomuni vosa dina;

mo ni vakaduavatataka na lomaqu me rerevaka na yacamuni.

12Au na vakavinavinaka vei kemuni na Turaga na noqu Kalou, e na yaloqu taucoko,

au na vakarokorokotaka na yacamuni ka sega ni mudu.

13Ni sa ka levu na nomuni loloma vei au;

ko ni sa vakabula talega na yaloqu mai na titobu kei Eli.

14Kemuni na Kalou, era sa tucake mai vei au na tamata viavialevu;

ka ra sa segata na yaloqu nai soqosoqo ni tamata dauivalavala vakaukauwa,

ka sega ni nanumi kemuni me tu e matadra.

15Ia sai kemuni na Turaga, na Kalou sa dauyalololoma ka daulomasoli,

sa dauvosota vakadede, ka dauyalovinaka ka daudina.

16Mo ni golevi au mai, ka lomani au;

mo ni solia na nomuni kaukauwa vua na nomuni tamata;

ka vakabula na luvena na nomuni vada.

17Me caka mada vei au e dua nai vakatakilakila ni loloma;

me ra raica ko ira era cati au, ka madua kina,

ni kemuni sa vukei au, Jiova, ka sa vakacegui au.