Same 114 - Ai Vola Tabu (Vakadewa Makawa Vakavoutaki 2021)（FRV21）

Na Lagilagi ni Kalou e na nodra Lako Yani na Isireli

1 Lako 12.51 Ni sa lako tani mai Ijipita ko ira na Isireli,

na vale i Jekope mai vei ira na tamata sa duatani na nodra i vosavosa,

2sa yaco me nona yasana tabu ko Juta,

ka nona matanitu ko Isireli.

3 Lako 14.21; Josua 3.16 Sa kunea na wasawasa, ka sa dro;

sa vakalesui ki cake ko Joritani.

4Sa rika voli na veiulunivanua me vaka na sipi tagane,

kei na ulu-ni-koro lalai me vaka na luve ni sipi.

5A cava ka manati iko, na wasawasa, ni ko a dro?

Se ko iko, Joritani, ni ko a vakalesui ki cake?

6Se koi kemudou na ulunivanua, ni dou a rika voli me vaka na sipi tagane?

Kei kemudou na ulu-ni-koro lalai, me vaka na luve ni sipi?

7Mo sautaninini, ko iko vuravura, e na mata ni Turaga,

e na mata ni Kalou i Jekope,

8 Lako 17.1-7; Tiko 20.2-13 o koya ka vukica na vatu me drano,

kei na vatu kaukauwa sara mei vurevure ni wai.