1Kemuni Jiova, me kakua vei keimami, me kakua vei keimami,
ia me soli ga na vakavinavinaka ki na yacamuni,
e na vuku ni nomuni loloma tudei kei na nomuni yalodina.
2A cava me ra kaya kina na veimatanitu,
“Sa evei na nodra Kalou?”
3Ia na noda Kalou sa tiko mai lomalagi;
sa cakava oti na ka kecega sa vinakata ko koya.
4 Same 135.15-18; Vtaki 9.20 Ia na nodra matakau na siliva kei na koula,
na cakacaka ni liga ni tamata.
5Era sa vakagusuna, ia era sa sega ni vosa rawa;
era sa vakamatana, ia era sa sega ni rai rawa.
6Era sa vakadaligana, ia era sa sega ni rogo rawa;
era sa vakaucuna, ia era sa sega ni boi rawa.
7Era sa vakaligana, ia era sa sega ni tara ka rawa;
era sa vakayavana, ia era sega ni lako rawa;
ka ra sa sega talega ni cavuta rawa na vosa
e na nodra i tagitagi.
8Ko ira era buli ira era sa tautauvata ga kei ira;
kei ira kece talega era sa vakararavi vei ira.
9I Isireli, mo vakararavi vei Jiova!
O koya ga na nodra dauniveivuke kei na nodra i sasabai.
10Na vale i Eroni, dou vakararavi vei Jiova!
O koya ga na nodra dauniveivuke kei na nodra i sasabai.
11Oi kemudou sa rerevaki Jiova, dou vakararavi vei Jiova!
O koya ga na nodra dauniveivuke kei na nodra i sasabai.
12Sa daunanumi keda ko Jiova; ena vakalougatataki keda;
ena vakalougatataka na vale i Isireli;
ena vakalougatataka na vale i Eroni;
13 Vtaki 11.18; 19.5 ena vakalougatataki ira era sa rerevaki Jiova,
ko ira na lalai kei ira na lelevu.
14Me vakalewevuqataki kemudou ko Jiova,
oi kemudou kei ira na luvemudou.
15Me vakalougatataki kemudou ko Jiova,
o koya ka bulia na lomalagi kei na vuravura.
16Na lomalagi, io na lomalagi sa nei Jiova,
ia sa solia na vuravura ko koya me nodra na kawa tamata.
17Era sa sega ni vakavinavinaka rawa vei Jiova ko ira na mate,
se ko ira era sa lako sobu ki na vanua ni vakagagalu.
18Ia koi keda ga, eda na vakavinavinaka vei Jiova
mai na gauna oqo ka sega ni mudu.
Dou ia vei Jiova na vakavinavinaka!
Who We AreWhat We EelieveWhat We Do
2025 by iamachristian.org,Inc All rights reserved.
