Efeso 1 - Ai Vola Tabu (Vakadewa Makawa Vakavoutaki 2021)（FRV21）

1 Caka 18.19-21; 19.1 Koi au ko Paula, nai apositolo i Karisito Jisu e nai lesilesi ni Kalou,

Kivei ira era sa lotu mai Efeso ka sa yalodina vei Karisito Jisu:

2Me nomudou na loloma kei na vakacegu mai vua na Kalou ko Tamada kei na Turaga ko Jisu Karisito.

Na Veivakalougatataki Vakayalo ena Vuku i Karisito

3Me vakarokorokotaki na Kalou, na Tamai koya na noda Turaga ko Jisu Karisito, o koya sa vakalougatataki keda e na ka ni veivakalougatataki vakayalo kecega e na veiyasana vakalomalagi e na vuku i Karisito,

4me vaka sa digitaki keda eliu e na vukuna, sa qai tauyavutaki e muri ko vuravura, me da yalosavasava ka sega ni cala e matana e na loloma.

5Ni sa lesi keda eliu ko koya me da luvena sa vakabau e na vuku i Jisu Karisito, me vaka na nona lewa vakayalovinaka,

6me dokai kina na kena vinaka ni nona loloma cecere ka soli wale, o koya sa lomani keda kina e na vuku i koya sa Daulomani.

7Kolo 1.14E na vukuna eda sa rawata kina na bula sa voli e na nona dra, io, na vosoti ni noda i valavala ca me vaka na nona loloma levu,

8o koya sa vakalevutaka sara vei keda ko koya e na vuku kei na yalomatua kecega

9ni sa vakatakila vei keda na nona lewa ka vuni tu, me vaka na ka e vinaka vua, ka sa nakita vakai koya ga,

10me yaco kina na ka sa lewa ko koya ni sa oti kecega na gauna sa lokuci me soqona vata na ka kecega vei Karisito, na veika mai lomalagi, kei na veika e vuravura.

11Eda sa caka talega kina me nona i votavota, ni da sa lesi eliu me vaka sa nakita ko koya sa cakava na ka kecega me vaka na nona lewa,

12me dokai kina na nona vinaka e na vuku i keitou, oi keitou sa vakararavi taumada vei Karisito.

13E na vukuna, koi kemudou talega, ni dou sa rogoca eliu na vosa ni vakavuvuli dina, nai tukutuku-vinaka ni nomudou vakabulai, ka vakabauti koya, dou sa dregati kina e na Yalo Tabu ka yalataki,

14o koya nai vakadei ni noda i votavota me yacova na gauna eda sa taukena kina, ka me dokai kina na nona vinaka.

Na Masu i Paula

15E na vuku ni ka oqo koi au talega, ni'u sa rogoca oti na nomudou vakabauta na Turaga ko Jisu, kei na nomudou loloma talega vei ira kecega era sa lotu,

16au sa sega ni mudu ni vakavinavinaka e na vukumudou, ni'u sa cavuti kemudou tiko e na noqu masu.

17Au sa masu vua na Kalou ni noda Turaga ko Jisu Karisito, na Tamada lagilagi, me solia vei kemudou na yalo ni vuku kei nai vakavuvuli macala mo dou kilai koya kina,

18ni sa vakararamataki na mata ni yalomudou, mo dou kila kina nai nuinui sa kacivi kemudou kina ko koya, kei na kena levu ni ukuuku sa taukena ko koya vei ira sa lotu,

19kei na kena levu sara ni nona kaukauwa vei keda sa vakabauta, me vaka sa daucaka yaco e na nona kaukauwa vakaidina,

20Same 110.1sa qisi Karisito kina ko koya, ni sa vakaturi koya cake mai na mate, a sa vakatikora e na ligana i matau e na veiyasana vakalomalagi,

21sa uasivi cake sara vei ira kecega sa liu, kei ira era sa lewa, kei ira sa kaukauwa, kei ira era sa turaga, kei na yaca kecega sa cavuti e na gauna oqo kei na gauna e muri.

22Same 8.6

Kolo 1.18A sa vakamalumalumutaka na ka kecega me tu e ruku ni yavana, a sa lesi koya me lewa na ka kecega e na vuku ni soqosoqo lotu,

23o koya na yagona, sa sinai sara vua sa vakasinaita na ka kecega e na ka kecega.