Jope 40 - Ai Vola Tabu (Vakadewa Makawa Vakavoutaki 2021)（FRV21）

1A sa vosa vei Jope ko Jiova ka kaya:

2“Ko koya sa veileti kei Koya sa Kaukauwa, ena vakavulici koya beka talega?

Ko koya sa vunauca na Kalou me vosa mada kina.”

Na Vosa i Jope Vua na Kalou

3Sa qai vosa vei Jiova ko Jope, ka kaya:

4“Ni raica mada, ni'u sa ka walega; a cava beka me'u kaya vei kemuni?

Au sa tabonaka ga na gusuqu e na ligaqu.

5Au sa vosa oti vakadua, ka'u na sega ni vosa tale;

sa vakarua, ia ka'u na sega ga ni kuria tale.”

Na Bolebole ni Kalou vei Jope

6Sa qai vosa tale vei Jope ko Jiova mai na covulaca, ka kaya:

7“Mo vauca mada vakatagane na tolomu;

ka'u na vakatarotarogi iko, ia mo vakatakila mai vei au.

8Ko sa via vakatawayagataka beka na noqu lewa?

Ko sa via vakacalai au, mo dodonu kina ko iko?

9A ligamu beka sa vaka na liga ni Kalou,

ka ko sa kurukuru rawa beka e domomu me tautauvata kaya?

10“Mo vakaiukuukutaki iko mada e na ka vakaturaga kei na vakarokoroko;

ka vakaisulutaki iko e nai ukuuku kei na lagilagi.

11Mo sovaraka mada na katakata ni nomu cudru,

ka raici ira yadua sa viavialevu ka vakayalomalumalumutaki ira.

12Mo raici ira kecega era sa viavialevu, ka vakalailaitaki ira sobu;

ka buturaki ira nai valavala ca e na nodra i tikotiko.

13Mo vunitaki ira vata e na kuvu-ni-soso;

vauca na matadra e na vuravura e ra.

14Ka'u na qai vakadinadina vei iko

ni sa rawa ni vakabulai iko na ligamu i matau.

15“Raici Biemoci mada,

ko koya ka'u sa bulia me vaka ga na noqu buli iko;

sa daukana co ko koya me vaka na bulumakau.

16Sa tiko e tolona na nona kaukauwa,

kei na nonai gu sa tiko e na ua ni ketena.

17Sa cakava na buina me dodonu ka kaukauwa me vaka na sitari;

na masela e na viciko ni sagana sa tobe vata.

18Na kaukauwa ni suina sa vaka na paipo parasa,

kei na yavana sa vaka na duru kaukamea.

19“Ko koya ka sa i sevu ni cakacaka cecere ni Kalou—

ko koya ga ka sa bulia ena rawa ni vorata tale e nai seleiwau.

20Ni sa vakatubura na kena kakana na veiulunivanua

e na vanua era sa dauqito voli kina na manumanu kila kecega.

21Sa davo koto e na ruku ni kau rugurugua,

e na ruku ni gasau kei na lolobo.

22Sa vakarurugi koya na yaloyalo ni kau rugurugua;

sa tu voliti koya na wilou mai na wai drodro.

23Raica, ni sa vuabale na uciwai, sa sega ni rere ko koya;

sa yatedei ga ni sa drodro sara mai na Joritani ki na gusuna.

24Ena rawai koya beka e dua e nai qila,

se na cula rawa na ucuna e nai cori?