2 Veigauna 7 - Ai Vola Tabu (Vakadewa Makawa Vakavoutaki 2021)（FRV21）

Sa Rogoca na Kalou na Masu i Solomoni(1 Tui 8.62-66)

1 Vsoro 9.23-24 Ia ni sa tinia ko Solomoni na nona masumasu, sa lutu sobu mai lomalagi na bukawaqa, ka sa kania nai soro kama kei nai madrali; ka sa vakasinaita na vale na serau i Jiova.

2A sa sega ni curu rawa ki na vale i Jiova ko ira na bete, ni sa vakasinaita na vale i Jiova na serau i Jiova.

31Vei 16.34; 2Vei 5.13; Esera 3.11; Same 100.5; 106.1; 107.1; 118.1; 136.1; Jere 33.11Ia ni ra sa raica ko ira kecega na Isireli ni sa lako sobu na bukawaqa, kei na serau i Jiova, e na dela ni vale, era sa bale vakatoboicu ki na soso, e na rara vatuvatu, a ra sa lotu, ka vakavinavinaka kivei Jiova, ka vaka,

“Sa vinaka ko koya,

ni sa tawa mudu na nona loloma.”

4Sa ra qai vakacabora nai soro ko koya na tui kei ira kecega na tamata, e na mata i Jiova.

5A sa vakacabora ko Solomoni na tui nai soro, e rua na oba ka rua na udolu (22,000) na bulumakau, ka tinikarua na oba (120,000) na sipi. A ra sa vakatabuya na vale ni Kalou ko koya na tui kei ira kecega na tamata.

6A ra sa kitaka na nodra i tavi ko ira na bete; ko ira talega na Livai era sa taura nai vakatagi rogo vinaka vei Jiova ka sa vakarautaka ko Tevita na tui me ia kina na vakavinavinaka kivei Jiova—ni sa sega ni mudu na nona loloma—e na gauna e dauvakacabora kina ko Tevita na nona vakavinavinaka e na nona veiqaravi. A ra sa uvu davui e matadra ko ira na bete, ka sa wavu tu ko ira kecega na Isireli.

7Sa vakatabuya talega ko Solomoni na lomanibai e na mata ni vale i Jiova, ni sa vakacabora mai kea ko koya nai soro kama, kei na uro ni soro ni veivinakati, ni sa lailai nai cabocabo-ni-soro parasa sa cakava ko Solomoni me vakacabori kina nai soro kama, kei nai madrali laukana, kei na uro.

8Ia, e na gauna ko ya, sa ia na solevu ko Solomoni, kei ira vata kaya na Isireli kecega, ka bogi vitu, e dua nai soqosoqo levu sara, sa vakatekivu mai nai curucuru ki Emaci ka yacova na uciwai ni Ijipita.

9Ia, e na kenai kawalu ni siga, era sa ia na soqosoqo tabu, ni sa bogi vitu na nodra vakatabuya nai cabocabo-ni-soro, ka bogi vitu na solevu.

10Ia e na kenai karuasagavulu ka tolu ni siga e nai kavitu ni vula, sa talai ira yani na tamata ko koya ki na nodra veivale laca, ka sa reki ka marau na yalodra, e na vuku ni ka vinaka sa cakava ko Jiova kivei Tevita, kei Solomoni, kei ira na Isireli na nona tamata.

Na Veiyalayalati ni Kalou kei Solomoni(1 Tui 9.1-9)

11A sa tara vakaoti ko Solomoni na vale i Jiova, kei na vale-ni-tui. Kei na ka kecega sa gadreva ko Solomoni me cakava e na vale i Jiova, kei na nona vale, sa vakayacora vakavinaka.

12A sa rairai vei Solomoni e na bogi ko Jiova, ka kaya vua, “Au sa rogoca oti na nomu masu, ia ka'u sa digitaka na tikina oqo me noqu ka me vale me ia kina nai soro.

13Kevaka ka'u sa sogoti lomalagi me sega kina ni tau na uca, se'u vakarota na vodre me kania na vanua, se'u tala na mate levu ki na kedra maliwa na noqu tamata;

14kevaka era sa vakayalomalumalumutaki ira ko ira na noqu tamata era sa kacivi e na yacaqu, ka masu, ka golevi au, ka vuki tani mai na nodra i valavala ca; au na qai rogoca mai lomalagi, ka vosota na nodra i valavala ca, ka vakabula na nodra vanua.

15Ena yadra tiko na mataqu, ka qara tu na daligaqu ki na masu sa ia e na vanua oqo.

16Ia au sa qai digitaka ka vakatabuya na vale oqo, me tiko kina na yacaqu ka tawa mudu. Ia ena tikotiko ga kina na mataqu kei na lomaqu.

17Ia ko iko, kevaka ko na lako voli e mataqu, me vaka sa lako voli ko Tevita na tamamu, ka kitaka na ka kecega me vaka na noqu vosa kecega vei iko, ka vakabauta na noqu i lesilesi kei na noqu lewa;

181Tui 2.4au na qai vakataudeitaka nai tikotiko vakaturaga ni nomu matanitu, me vaka na veiyalayalati au a kitaka kei Tevita na tamamu, ni'u a kaya, ‘Ena sega ni mudu vei iko na tamata me nodra tui na Isireli.’

19“Ia kevaka dou sa vuki tani, ka biuta na noqu i lesilesi, kei na noqu vunau ka'u sa tauca e matamudou, ka dou sa lako ka qarava na kalou tani, ka soro vei ira;

20au na qai cavuivuvutaki ira mai na vanua au a solia vei ira; ia na vale oqo, ka'u sa vakatabuya oti ki na yacaqu, au na biuta tani e mataqu, ia ka'u na cakava me vakaibole ca ka me vakasiusiutaki e na veimatanitu kecega.

21Ia na vale oqo, sa cecere tu, ena ka ni veivakurabuitaki vei ira na tamata yadua era lako voleka kina; era na kaya kina ko ira, ‘E na vuku ni cava beka e kitaka kina vakaoqo ko Jiova ki na vanua oqo, kei na vale oqo?’

22Ia ena qai kainaki, ‘Ni ra a biuti Jiova na nodra Kalou na nodra qase, o koya ka kauti ira tani mai na vanua ko Ijipita, ka ra a vakabauta na kalou tani eso, ka soro kina, ka qarava. E na vuku ni ka oqo sa vakayacora kina vei ira ko koya na ca kecega oqo.’ ”