Same 38 - Ai Vola Tabu (Vakadewa Makawa Vakavoutaki 2021)（FRV21）

Na Masu ni Vakatutusa me Kerei na Veivakabulai A Same i Tevita, me i soro ni veivakananumi.

1I Jiova, kakua ni vunauci au e na nomuni cudru,

se cudruvi au e na nomuni cudru waqawaqa.

2Ni sa coba sara ki lomaqu na nomuni gasau,

ka sa bibi vei au na ligamuni.

3Sa sega na tiki ni yagoqu sa bula

e na vuku ni nomuni cudru;

Sa sega ni vakacegu na suiqu

e na vuku ni noqu i valavala ca.

4Ni sa uasivia cake na uluqu na noqu caka ca;

me vaka nai colacola bibi ka'u sa sega ni colata rawa.

5Sa bona ka vakanana na noqu vidikoso

e na vuku ni noqu lialia;

6au sa rarawa sara; au sa vakalairoro vakalevu;

au sa tagi lako e na siga ka bogi mai.

7Ni sa robota na toloqu na mate vakasisila,

ka sa sega na tiki ni yagoqu sa bula.

8Au sa malumalumu ka musulaki sara;

au a vutugu ni sa daurarawa na yaloqu.

9I Jiova, sa tu e matamuni na ka kecega ka'u sa gadreva;

ka sa sega ni vuni vei kemuni na noqu vutugu.

10Sa tatatukituki na utoqu, ka sa yali yani na noqu kaukauwa;

kei na rarama ni yaloka ni mataqu—sa takali talega mai vei au.

11Ko ira na noqu i tau kei nai tokani era sa la'ki tu tani mai na noqu mate ca,

ka sa la'ki duri tu vakayawa na wekaqu voleka.

12A ra sa birika nai cori ko ira sa qarai au me'u mate;

ia ko ira talega era sa segata me'u ca era vosavakacacataki au,

ka ra vakanananu ki na ka lasu e na tiki ni siga kecega.

13Ia koi au, ka'u sa vaka na didivara, ka'u sega ni rogoca;

ka vaka na galu sa sega ni dalaga.

14Ia ka'u sa vaka e dua sa sega ni rogoca rawa,

Ka sa sega e na gusuna na veivunauci.

15Ni'u sa nuitaki kemuni ga, Jiova;

o ni na rogoci au, na Turaga na noqu Kalou.

16Ni'u sa kaya, “Me ra kakua ga ni rekitaki au,

ko ira era sa vakalevulevui ira vei au ni sa tidara na yavaqu!”

17Ni'u sa voleka ni bale sobu,

ka sa tu ga e mataqu na noqu rarawa.

18Au sa vakatusa na noqu i valavala ca;

ka'u sa rarawataka na noqu caka cala.

19Ni ra sa tamata bula na noqu meca, ka ra sa kaukauwa,

ia ko ira era sa cati au ka sega na vuna era sa le vuqa mai.

20O ira talega era kitaka na ka ca mei sau ni ka vinaka

era noqu meca baleta ni ka'u sa muria na ka vinaka.

21I Jiova, ni kakua ni biuti au!

Kemuni na noqu Kalou, ni kakua ni tu vakayawa vei au!

22Mo ni kusarawa mo ni vukei au mai,

Kemuni na Turaga, na noqu i vakabula!