1Sa qai mudu na nodratou vosa tiko vei Jope ko iratou na tamata tolutolu oqo, ni sa vakadonui koya tiko.
2Sa qai waqa mai na cudru i Ilaiu na luve i Parakeli na luve i Pusa, mai na vuvale i Rami. A sa waqa na nona cudru vei Jope baleta ni sa vakadonui koya tikoga ka sa sega ni vakadonuya na Kalou.
3A sa waqa talega na nona cudru vei iratou na nona i tokani tolutolu, ni ratou sa vakacalai Jope tiko, ka sa sega ni vakadinadinataka rawa.
4Ko Ilaiu oqo sa qai waraka tiko me vosa vei Jope, ni ratou sa qase vua.
5Ia ni sa kunea ko Ilaiu ni sa sega nai sau ni taro mai na gusudratou na turaga tolutolu ko ya, sa qai waqa mai na nona cudru.
6A sa qai vosa ko Ilaiu na luve i Parakeli na luve i Pusa, ka kaya:
“Koi au ka'u sa gone wale,
ia koi kemudou dou sa qase sara;
o koya oqo ka'u a tarovi au kina
ka rere ni vakatakila vei kemudou na lomaqu.
7Au a kaya, ‘Me vosa mada ko ira na uabula,
ka me vakatavuvulitaka na vuku ko ira sa yabaki vuqa.’
8Ia na yalo ga ka tiko e na loma ni tamata,
nai cegu i Koya sa Kaukauwa, sa solia na yalomatua.
9Sa sega ni ko ira sa qase sara era sa vuku,
se ko ira sa uabula ka ra sa daukila na lewa dodonu.
10O koya ka'u a kaya kina, ‘Dou vakarorogo mai vei au;
ka'u na vakatakila talega na lomaqu.’
11“Raica, ka'u a waraka na nomudou vosa,
ka'u a vakatudaliga ki na nomudou i vakavuvuli,
ni dou a qara na ka mo dou kaya.
12Ia ka'u a vakarorogo vei kemudou,
ka raica, sa sega e dua vei kemudou sa vakatakila rawa ni sa cala ko Jope,
se sauma lesu rawa na nona vosa.
13Qarauna de dou kaya, ‘Keitou sa kunea na vuku;
sa rawa ni biuti koya sobu na Kalou, ka segai na tamata.’
14Sa sega ni bau vosataki au ko koya,
ka'u na sega talega ni sauma vua na nomudou vosa.
15“Eratou sa kidroa, eratou sa sega ni vosa tale;
Sa sega na vosa me ra kaya.
16Ka me'u wawa tiko, ni ratou sa sega ni vosa,
ni ratou sa tiko lo, ka sega ni vosa tale?
17Koi au talega, ka'u na tukuna na noqu i tavi;
koi au talega, ka'u na vakatakila na lomaqu.
18Ni sa sinai sara vei au na vosa;
sa uqeti au na yalo sa tiko e lomaqu.
19Raica, na ketequ sa vaka na waini sa sogo deivaki;
sa vaka na bola-ni-waini vou sa voleka ni kacabote.
20Ka'u na vosa, me'u yalo vakacegu kina;
ka'u na dalaga ka me'u sauma mada.
21Au na sega ni vakaduiduitaka e dua na tamata
se vosa vakaveicavilaki ki vua e dua.
22Ni'u sa sega ni kila nai tovo ni veicavilaki—
de na qai muduki au vakadua na noqu Dauveibuli!
Who We AreWhat We EelieveWhat We Do
2025 by iamachristian.org,Inc All rights reserved.
