1Ia e na vuku ni ka sa vakacabori ki na matakau, eda sa kila “sa tu vei keda kecega na vuku.” Na vuku sa vu ni viavialevu, a loloma ga sa vu ni vakatataki cake.
2Ia kevaka e dua sa nanuma sa kila e dua na ka, sa sega ni kila na ka me vaka e dodonu me kila.
3Ia kevaka e dua sa lomana na Kalou, sa kilai vua ko koya.
4E na vuku ni kana ka sa vakacabori ki na veimatakau, eda sa kila “sa ka wale duaduaga e vuravura na matakau,” a “sa dua bauga na Kalou ka sega tale e duatani.”
5Io, sa dina sa tu na veika sa vakatokai me kalou, mai lomalagi se e vuravura—me vaka ni ra sa lewe vuqa na “kalou” ka lewe vuqa talega na “turaga”—
6ia vei keda sa dua bauga na Kalou, na Tamada, ka sa vu mai vei koya na ka kecega ka da sa bula ga koi keda mai vei koya, ka sa dua bauga na Turaga, ko Jisu Karisito, ka sa caka e na vukuna na ka kecega ka da sa bula ga koi keda e na vukuna.
7Ia ka sa sega ni kila kecega na tamata na i tukutuku oqo. Io, sa so era sa nanuma sa dina na matakau, ka ra sa kania me vaka sa vakacabori ki na matakau; kei na nodra lewa-e-loma, ni sa malumalumu, sa dukadukali kina.
8“Ia na kakana sa sega ni ka me da vinaka kina vua na Kalou.” Ia kevaka eda sa kana, eda sa sega kina ni vinaka cake; kevaka eda sa sega ni kana, eda sa sega kina ni ca sobu.
9Ia mo dou raica vinaka de yaco na nomudou veitalia vakaoqo me ka era tarabe kina ko ira era sa malumalumu.
10Ia kevaka e dua sa raici iko sa tamata vuku ni ko sa tiko e na vale ni matakau mo kana, ena qai sega li ni doudou cake kina na loma i koya sa malumalumu me kania na veika sa vakacabori ki na matakau?
11Ia na nomu vuku ena vu ni nona rusa na wekada sa malumalumu, sa mate kina na Karisito.
12Ia ni dou sa cala vakaoqo, vei ira na veiwekani, ka vakacacana na lomadra sa malumalumu, dou sa cala vei Karisito.
13O koya oqo, kevaka sa tarabe na wekaqu e na kakana, au na sega sara ni kania na lewe ni manumanu ka tawa mudu, de tarabe e na vukuqu na wekaqu.
Who We AreWhat We EelieveWhat We Do
2025 by iamachristian.org,Inc All rights reserved.
