Dauveilewai 5 - Ai Vola Tabu (Vakadewa Makawa Vakavoutaki 2021)（FRV21）

Na Sere nei Tepora

1Sa qai ia na sere e na siga ko ya ko Tepora kei Baraki na luve i Epinoami, ka kaya:

2“Ni sa liutaki ira na Isireli ko ira na turaga,

ka ra sa soli ira vakarawarawa na tamata,

dou vakavinavinaka vei Jiova!

3“Mo ni rogoca, na tui; dou vakatu daligamudou na goneturaga;

au na sere vei Jiova, io koi au,

au na sere vei Jiova, na Kalou ni Isireli!

4“I Jiova, ni kemuni a lako tani mai Sia,

ni kemuni a lako tani vakaturaga mai na vanua ko Itomi,

sa tavuki ko vuravura,

ka sa vakatautau ko lomalagi,

io, sa vakatauca talega na uca na veio.

5 Lako 19.18 Sa waicala na veiulunivanua e na mata i Jiova,

io, ko Saineai ko ya e na mata i Jiova na Kalou ni Isireli.

6“E na gauna i Samikari na luve i Anaci,

e na gauna i Jaeli, sa sega ni lakovi na veisalatu,

a ra sa lako vakatikitiki tani ko ira era dauveilakoyaki tu.

7Sa sega e dua me lewa e Isireli, sa sega ga,

ka yacova na noqu tubu, koi au ko Tepora,

ka yacova na noqu tubu me'u dua na tinadra na Isireli.

8Era digitaka eso na kalou vou,

sa qai kabai na matamata-ni-koro.

Sa kune li e dua nai sasabai se moto

vei ira na le oba vakava (40,000) ni Isireli?

9Au sa lomani ira na turaga ni Isireli,

o ira era sa gu mai vei ira na tamata.

Dou vakavinavinaka vei Jiova.

10“Dou vakarogoya, oi kemudou sa dauvodoka na asa vulavula,

oi kemudou sa dautiko me ia na veilewai,

oi kemudou talega sa daulako tu e na sala.

11Ni ra sa sega ni rorogo ko ira na dauvanavana e na tikina sa dautaki kina na wai;

era na veitukutukunitaka mai kea na cakacaka loloma i Jiova,

io, na nona cakacaka loloma sa lewai ira na Isireli.

“Era sa qai lako sobu ki na veimatamata-ni-koro na tamata nei Jiova.

12“Yadra mai, yadra mai, i Tepora!

Yadra mai, yadra mai, lagata na sere!

I Baraki, mo ia, ka liutaki ira yani na nomu bobula,

ko iko na luve i Epinoami.

13E na gauna ko ya sa lako sobu mai ko ira na turaga sa vo;

sa lako sobu mai e na vukuqu ko ira na tamata i Jiova, me vorati ira na qaqa.

14Era sa lako sobu mai vei ira na Ifereimi, ko ira era sa tiko mai Amaleki;

sa muri kemudou ko ira na Penijamini, e na kedra maliwa na nomudou tamata;

mai vei ira na Mekiri, era sa lako sobu era sa daulewa,

ka mai vei ira na Sevuloni, ko ira sa taura nai titoko i koya sa dauia na wiliwili;

15ia sa to vata kei Tepora ko ira na turaga mai vei ira na Isakari,

sa tautauvata ko ira na Isakari, kei Baraki;

era sa cici yani me ra muri koya ki na buca.

Mai na nodra veisoniwai na Rupeni,

sa ka levu nai naki ni lomadra.

16A cava ko sa tiko kina mai na bai ni sipi,

mo rogoca kina na tagi ni qele ni sipi?

Mai na nodra veisoniwai na Rupeni

sa ka levu na nodra dikeva na lomadra.

17Sa tiko mai tai kadua ni Joritani ko ira na Kiliati;

a cava sa tiko kina e na veiwaqa ko ira na Tani?

Sa tiko mai matasawa ko ira na Aseri,

ka tiko ga e na nodra toba.

18Era sa bolea na mate ko ira na Sevuloni,

kei ira talega na Navitalai, e na veitiki-ni-vanua cecere.

19“Era sa lako mai na tui, era sa vala;

era sa qai vala na tui Kenani,

mai Tenaki ki na wai mai Mikito;

era sa sega ni taura nai lavo me kenai sau.

20Era sa vala ko ira mai lomalagi,

era sa veivala kei Sisera na kalokalo e na nodra lako tu e na nodra gaunisala.

21Sa daveni ira yani na uciwai ko Kisoni,

na uciwai makawa ko ya, na uciwai ko Kisoni.

O iko na yaloqu, mo tayabe yani e na kaukauwa!

22“Sa qai mavoa sara na ququ ni ose,

ni ra sa cici vakusakusa, ni ra sa cici vakusakusa ko ira na nodra qaqa.

23“Dou kaya: Me rusa ko Merosi, sa kaya na agilosi i Jiova,

dou kaya: Me rusa sara ko ira na lewe ni koro ko ya;

ni ra sa sega ni lako mai me veivuke kei Jiova,

me veivuke kei Jiova ka me ra veivala kei ira na qaqa.

24“Sa na kalougata vei ira na yalewa ko Jaeli,

na wati Eperi na Kenaiti,

sa kalougata vei ira na yalewa era sa tiko e na valelaca.

25Sa kere wai ko koya, sa solia vua ko koya na wai-ni-sucu,

sa kauta mai ko koya na kena bata e na bilo vakaturaga.

26Sa dodoka na ligana ki nai vakadei ni vale laca,

kei na ligana i matau ki na nodra i tukituki na matai;

sa tukilaka nai vako ki na ulu i Sisera, ka vorolaka,

io, sa coka me basika na nona kanavalavala.

27Sa cuva ko koya ki yavana,

sa bale, sa koto no;

sa cuva ki na yavana ko koya, sa bale;

e na tikina ka cuva kina, sa bale mate kina.

28“Sa iro yani e nai sogo cicila ko koya,

sa kaci mai nai sogo cicila, na tina i Sisera,

A cava sa berabera kina na nona qiqi-ni-valu?

A cava sa berabera kina na yava ni nona qiqi-ni-valu?

29Era sa kaya vua ko ira na kena marama vuku,

io, sa kaya talega ko koya,

30‘Era se sega li ni kunea nai toki-ni-valu ka veivotayaka?—

Me dua se rua na goneyalewa vei ira na tagane yadua;

me dua nai toki-ni-valu e bena e na vukui Sisera,

e dua nai toki-ni-valu e bena ka veivolavolai,

o koya sa cula vakamatai e na yasana ruarua, me ra taubena ko ira sa gumatua?’

31“I Jiova, me ra rusa vakakina na nomuni meca kecega!

Ia ko ira na nomuni i tokani me ra sa vaka ga na mata-ni-siga ni sa lako cake e na nona lagilagi.”

A sa tiko vakacegu na vanua ka yabaki vasagavulu.