Vakatekivu 29 - Ai Vola Tabu (Vakadewa Makawa Vakavoutaki 2021)（FRV21）

Sa Yaco kivei Lepani ko Jekope

1Sa qai lako tu yani ko Jekope, ka yacova na nodra vanua ko ira mai na tokalau.

2A sa rai yani, ka raica, sa dua nai keli-wai e na tiki ni vanua ko ya, ka raica, sa tolu na qele ni sipi sa koto voleka kina; ni ra sa dauvagunuva na qele ni sipi mai nai keli-wai ko ya. A sa sogo na gusu ni keli-wai e na dua na vatu levu.

3Ni ra sa dausoqoni vata ki kea na qele ni sipi kecega, era sa dauvaqiqica tani na vatu mai na gusu ni keli-wai, ka vagunuva na sipi, ka qai vakasuka tale na vatu ki na kena tikina ki na gusu ni keli-wai.

4A sa kaya vei ira ko Jekope, “Kemudou na wekaqu, dou sa lako mai vei?” A ra sa kaya, “Koi keitou oqo mai Karana.”

5A sa kaya vei ira, “Dou sa kilai Lepani na luve i Neori, se segai?” A ra sa kaya, “Keitou sa kila.”

6A sa kaya vei ira, “E bulabula vinaka tiko, se segai?” A ra sa kaya, “Io, sa bulabula vinaka, ka raica, sa lako tiko mai oqo ko Raijeli na luvena yalewa kei na nona sipi.”

7A sa kaya ko koya, “Raica, sa siga levu toka, ka se bera na gauna me soqoni vata kina na manumanu. Dou vagunuva mada na sipi, ka la'ki vakania.”

8A ra sa kaya, “E dredre, me ra soqoni vata kece mada na qele ni sipi, ka vaqiqici tani na vatu mai na gusu ni keli-wai; keitou qai vagunuva na sipi.”

9Ni sa veivosaki tiko kei ira, sa lako mai ko Raijeli kei na sipi nei tamana; ni sa dauvakatawa ko koya.

10Ia ni sa kunei Raijeli ko Jekope, ko koya na luve i Lepani na gane i tinana, kei na sipi nei Lepani na gane i tinana, sa qai toro ko Jekope, ka vaqiqica na vatu mai na gusu ni keli-wai, ka vagunuva na qele ni sipi nei Lepani na gane i tinana.

11A sa reguci Raijeli ko Jekope, ka tabalaka na domona, ka tagi.

12A sa tukuna vei Raijeli ko Jekope ni sa taci tamana, ka ni sa luve i Repeka; a sa cici yani ko koya, ka tukuna vei tamana.

13Ia ni sa rogoca ko Lepani nai tukutuku kei Jekope na luve i ganena, sa qai cici yani me la'ki veitata kaya, a sa mokota, ka reguca, ka kauti koya ki na nona vale. A sa mani tukuna vei Lepani na ka kecega oqo.

14A sa kaya vua ko Lepani, “Sa dina sara ni ko sa suiqu ka lewequ vakaidina!” A sa tiko kaya me vula dua.

Cakacaka vei Lepani ko Jekope ena Vukui Raijeli kei Lia

15A sa kaya vei Jekope ko Lepani, “Me vaka ni ko sa wekaqu, e dodonu li mo qaravi au walega ka sega ni saumi? Mo tukuna mada vei au se cava me kemui sau?”

16A sa le rua na luvena yalewa ko Lepani; a yacai koya e qase ko Lia, ka yacai koya e gone ko Raijeli.

17Sa mata malumu ko Lia, ia ko Raijeli sa yago vinaka ka matavinaka.

18A sa vinakati Raijeli ko Jekope; a sa kaya kina, “Au na qaravi iko ka yabaki vitu me noqu ko Raijeli na luvemu ka gone.”

19A sa kaya ko Lepani, “E vinaka me'u soli koya vei iko, ka ca me'u soli koya ki vua e dua tale na tamata; mo tiko vata ga kei au.”

20A sa qaravi koya ko Jekope ka yabaki vitu me nona kina ko Raijeli, ka sa vaka sa bogi vica walega vua e na vuku ni nona vinakati koya vakalevu.

21A sa qai kaya vei Lepani ko Jekope, “Mo solia mada mai na watiqu, ni sa oti na noqu gauna ni cakacaka, ka me'u la'ki curu vua.”

22A sa vakasoqoni ira vata kina na tamata kecega e na yasana ko ya ko Lepani, ka cakava e dua na magiti.

23Ia e na yakavi, sa tuberi Lia na luvena ka kauti koya vei Jekope; a rau sa veiyacovi kaya.

24(A sa soli Silipa na nona vada ko Lepani kivei Lia na luvena, me la'ki nona vada.)

25Ia ni sa kida cake na mataka, raica, sa tu ko Lia! Ka sa kaya ko Jekope vei Lepani, “A cava oqo ko sa cakava vei au? Au a sega li ni qaravi iko me watiqu ko Raijeli? A cava ko sa qai vakaisini au kina vakaoqo?”

26A sa kaya ko Lepani, “Oqo e sega ni kenai valavala e na neimami vanua, me soli eliu ko koya e gone, ka soli e muri ko koya e qase.

27Mo vakaotia mada na kena macawa vei koya oqo, keitou na qai soli koya talega ko ya vei iko, e na vuku ni nomu na cakacaka vei au me vitu tale na yabaki.”

28A sa kitaka vakakina, ko Jekope, ka vakaotia na kena macawa; ka sa soli Raijeli na luvena ko koya vua me watina.

29(A sa soli Pila na nona vada ko Lepani kivei Raijeli na luvena, me nona vada.)

30A sa curu talega vei Raijeli ko Jekope, ka sa taleitaki Raijeli vakalevu cake mai vei Lia. A sa qaravi Lepani ka vitu tale na yabaki.

Ko Iratou na Luvei Jekope

31Ni sa raica ko Jiova ni sa sega ni lomani ko Lia, a sa vakarawarawataka vua me vakasucu; ia sa yava ga ko Raijeli.

32A sa kunekune ko Lia, a sa vakasucuma na luvena tagane, a sa vakayacani koya ko Rupeni; ni sa kaya, “Sa raica dina ko Jiova na noqu rarawa; o koya oqo sa na qai lomani au na watiqu.”

33A sa kunekune tale, ka vakasucuma na gonetagane; a sa kaya, “Ni sa rogoca ko Jiova ni'u a cati, sa solia kina vei au na gone tagane talega oqo”; ka sa vakayacani koya ko Simione.

34A sa kunekune tale, ka vakasucuma na gonetagane; a sa kaya, “Sa na qai semati vei au oqo na watiqu, ni'u sa vakasucuma e le tolu na luvena tagane”; ka sa vakayacani koya kina ko Livai.

35A sa kunekune tale, a sa vakasucuma na gonetagane; a sa kaya, “Au na qai ia na vakavinavinaka vei Jiova”; ka sa vakayacani koya kina ko Juta; ka sa qai cegu na nona vakaluveni.