Sakaraia 7 - Ai Vola Tabu (Vakadewa Makawa Vakavoutaki 2021)（FRV21）

Sa Vunauca ko Sakaraia na Lolo Veivakaisini

1Ia e nai kava ni yabaki i Taraiasi na tui, sa yaco na vosa i Jiova vei Sakaraia e nai kava ni siga e nai kaciwa ni vula, ko ya ko Kisiliu.

2Ia ko ira na lewenivanua mai Peceli era sa talai rau ko Saresa kei Rekemi-meleki, kei na nodrau tamata, me ra vakamamasu vei Jiova,

3ka vosa talega vei ira na bete era tiko e na vale i Jiova-ni-lewevuqa, kei ira na parofita, ka kaya, “Me keitou ia tiko li na tagi e nai kalima ni vula, ka tawasei keitou, me vaka na ka keitou sa dui cakava e na veiyabaki e vuqa oqo?”

4Sa qai yaco vei au na vosa i Jiova-ni-lewevuqa, ka vaka:

5“Mo kaya vei ira kece na lewe-ni-vanua, kei ira na bete, ka vaka, ‘Ni dou a lolo ka tagi e nai kalima ni vula kei na kenai kavitu, e na yabaki e vitusagavulu ko ya, dou sa lolo li vei au, io vei au?

6Ia ni dou sa kana, ka ni dou sa gunu talega, dou sa sega li ni kana ka gunu me yaga walega vei kemudou?

7Sa sega li ni kena vosa oqo ka vunautaka ko Jiova e na gusudra na parofita eliu, ni sa tawa tiko ka sa sautu ko Jerusalemi, kei na kena veikoro e vakavolivolita, ka ni sa tawa tiko na yasayasa vakaceva kei na buca?’ ”

Na Talaidredre ki nai Vakaro ni Kalou sa Cudruvi

8A sa yaco na vosa i Jiova vei Sakaraia, ka vaka,

9“Sa kaya vakaoqo ko Jiova-ni-lewevuqa: Dou ia ga na veilewai dodonu, ka mo dou dui ia nai valavala vakayalovinaka ka loloma vua na kai nona;

10ia dou kakua ni vakasaurarataka na yada, kei na luveniyali, kei na kai tani, kei na dravudravua; ia mo dou kakua ni dui nanuma ca e na lomamudou vua na kai nona.”

11Ia era sa bese ga ni vakarorogo, ka ra vuki vakanadaku, ka ra sogota na daligadra, me ra kakua ni rogoca.

12Era sa vakaukauwataka na lomadra me vaka na vatu qiwa, me ra kakua ni rogoca na vunau, se na vosa sa solia ko Jiova-ni-lewevuqa e na nona Yalo Tabu vei ira na parofita eliu me ra tukuna. A sa yaco kina na cudru levu mai vei Jiova-ni-lewevuqa.

13“A sa yaco, me vaka ni'u a kaci, ka ra sa bese ni rogoca; sa ra kaci vaka talega kina ko ira, ia ka'u sa bese ga ni rogoca,” sa kaya ko Jiova-ni-lewevuqa,

14“ka'u a caginataki ira tani yani ki na veimatanitu kece era a sega ni kila. Ia sa lala laivi tu na vanua, me sega ni lakovi, ni ra sa vakavuna na kena lala tu na vanua sa dauvinakati.”