1Dou rogoca na vosa sa tukuna ko Jiova vei kemudou na vale i Isireli.
2Sa kaya vakaoqo ko Jiova,
“Dou kakua ni vulica na nodra i valavala na veimatanitu,
ia mo dou kakua talega ni taqaya e nai vakatakilakila ni lomalagi;
ni ra sa taqaya kina na veimatanitu.
3Ni sa ka lasu na nodra i valavala na tamata;
ni sa dua sa taya mai veikau e dua na kau,
na cakacaka ni liga ni matai e na matau;
4era sa vakaiukuukutaka e na siliva kei na koula;
era vakadeitaka e nai vako kei nai tukituki,
me kakua ni yavala.
5Sa vaka na balabala na kena tu donu,
ia ka sa sega ni vosa;
sa daucolati tu,
ni ra sa sega ni lako rawa.
Kakua ni dou rerevaka na ka oqori;
ni sa sega na ca era cakava rawa,
ka sa sega talega ni rawa vei ira me ra cakava na vinaka.”
6Ni sa sega e dua me vakataki kemuni, Jiova;
sa levu koi kemuni, ka sa levu na yacamuni e na kaukauwa.
7 Vtaki 15.4 Ko cei me na sega ni rerevaki kemuni na Tui ni veimatanitu?
Ni sa kilikili kei kemuni;
io vei ira kece na vuku e na veivanua,
kei na nodra veimatanitu kecega,
sa sega e dua me vakataki kemuni.
8Ia era sa yalosese vata ka lialia ga;
na kau sai vakavuvuli ni ka lasu.
9Nai botani siliva sa kau mai Tasisi,
kei na koula mai Ufasi.
Era sa cakacaka ni matai, kei na liga i koya na matai ni koula;
sa ka karakarawa ka lokaloka na nodra i sulu;
era sa nodra cakacaka kecega na tamata vuku.
10Ia ko Jiova ga na Kalou dina ko koya;
na Kalou bula kei na Tui sa sega ni mudu.
Ni sa cudru ko koya, ena sautaninini ko vuravura,
ia na veimatanitu ena sega ni vosota rawa na nona cudru.
11Mo dou kaya vei ira vakaoqo, “A kalou era sa sega ni bulia na lomalagi kei na vuravura era na rusa tani yani mai na dela i vuravura, ka mai na ruku i lomalagi talega.”
A Sere ni Vakavinavinaka vei Jiova12Sa bulia na vanua ko koya e na nona kaukauwa,
ka vakataudeitaki vuravura e na nona vuku,
ka tevuka yani na lomalagi e na nona yalomatua.
13Ni sa tabalaka na domona, sa levu na rorogo ni wai mai lomalagi,
a sa vakuvuya cake ko koya na kabukabu mai na vu-ni-lagi;
sa cakava na livaliva kei na uca,
ka sa kauta mai na cagi mai na nona lololo.
14Sa vakasesei tani na tamata kecega mai na vuku;
sa vakamaduataki na matai kecega e na matakau ceuceu;
ni sa ka lasu sara na nona matakau e vakawaicalataki,
ka sa sega nai cegu e tiko kina.
15Sa ka lasu ga oqori, na cakacaka dauveivakalialiai;
e na gauna era cudruvi kina era na rusa.
16Sa sega ni vakakina na nodra i votavota na Jekope,
ni sa bulia na ka kecega ko koya;
ia ko ira na Isireli, era sa dua nai votavota sa taukena ko koya;
ko Jiova-ni-lewevuqa na yacana.
Sa Roro Voleka na Gauna ni Veivakabobulataki17Mo kumuna na nomu i yaya e na vanua,
ko iko na lewe ni koro vakabai!
18Ni sa kaya vakaoqo ko Jiova,
“Raica, koi au, ka'u na rabotaki ira tani na lewe-ni-vanua
me vakadua ga oqo,
ka'u na vakararawataki ira,
me ra kunea sara.”
19Ulei na noqu mavoa!
Sa ka rarawa na noqu yaviti.
Ia koi au ka'u a kaya, “E dina sa ka ni veivakararawataki oqo,
ia ka'u na vosota ga.”
20A noqu valelaca sa vakacacani,
a kena dali kecega sa cavuka;
era sa lako tani vei au ko ira na luvequ,
ka ra sa yali;
sa sega e dua me birika tale na noqu valelaca,
se rubeca na kenai lati.
21Ni ra sa yalosese mai ko ira nai vakatawa,
ka ra sa sega ni qarai Jiova;
o koya oqo era na sega kina ni tamata yaco,
ia na nodra qele ni sipi kecega ena dui vakasavi.
22Rogoca, e dua na rorogo! Sa lako tiko mai!—
e dua na ue levu mai na vanua mai na vualiku
me vakalalataka na veikoro vaka-Juta,
ka me qara ni jekeli.
23Kemuni Jiova, au sa kila, ni sa sega ni vu mai vua na tamata na nona sala,
sa sega ni vu mai vua na tamata sa lako tu me lewa na nona i lakolako.
24Mo ni vakadodonutaki au, Jiova, e na lewa vinaka,
me kakua e na nomuni cudru, de ko vakarusai au sara.
25Mo ni sovaraka na nomuni cudru katakata ki na veimatanitu era sa sega ni kilai kemuni,
kei na veiyavusa sa sega ni masuta na yacamuni;
ni ra sa kani ira na Jekope, ka tilomi ira, ka vakaoti ira,
ia na nodra i tikotiko era sa vakalalataka.
Who We AreWhat We EelieveWhat We Do
2025 by iamachristian.org,Inc All rights reserved.
