Jope 6 - Ai Vola Tabu (Vakadewa Makawa Vakavoutaki 2021)（FRV21）

Tukuna ko Jope: Sa Donu Vinaka na Noqu Kudru

1Sa vosa ko Jope, ka kaya,

2“Me vakarautaki mada na kena bibi na noqu rarawa,

ka me biu e nai vakarau ni bibi na veika ca sa yacovi au!

3Ni sa qai bibi vakalevu ka mamada na nuku ni wasawasa;

o koya oqo ka'u sa rui vosa vakariri kina.

4Ni sa lau ki lomaqu na gasau i Koya sa Kaukauwa;

sa gunuva na yaloqu na kena gaga;

sa tuvai valu kivei au na ka rerevaki mai vua na Kalou.

5Sa tagi beka na asa kila ni sa tu na kena co,

se via tagi na bulumakau ni sa kana tiko?

6Sa laukana rawa beka na ka velavela ni sa sega ni vakamasima,

se kamikamica na weli ni yaloka?

7Na lomaqu sa bese ni gadreva me tarai ira;

sa qai yaco me vaka na kakana velavela vei au.

8“Me vakayacori mada na noqu kerekere,

ka solia mada na Kalou na ka ka'u sa gadreva;

9ka me na yalovinaka mada vua na Kalou me vakarusai au,

me sereka na ligana, me muduki au tani!

10Au na qai vakacegu rawa;

io, au na qai vakaukauwataki au e na rarawa, me kakua ni vosota ko koya;

ni'u a sega ni vunia na vosa i Koya sa Yalosavasava.

11A cava na noqu kaukauwa, me'u wawa tiko?

Se cava na noqu i cavacava, me'u via vakabalavutaka kina na noqu bula?

12A noqu kaukauwa na kaukauwa beka ni vatu,

se sa parasa beka na lewequ?

13Sa sega beka ni sa yali vei au na veivuke,

ka sa kau tani vei au na vuku dina?

14“Ko koya sa kana rarawa e dodonu me lomani koya na nona i tokani;

io vei koya de sa biuta na rerevaki Koya sa Kaukauwa.

15Eratou sai valavala vakailasu na wekaqu me vaka na soniwai,

eratou sa vaka na soniwai e dautakali yani,

16sa vuvu e na vuku ni wai sa cevata tu,

sa vuni talega kina na uca-vulavula.

17Oqori sa yali ni sa katakata mai;

ni sa cilavi siga, sa takali sara mai na kenai tikotiko.

18Sa lesu tani na sala ni kenai davedave;

sa yaco ga me segai, me yali sara.

19Era sa vakasaqara ko ira nai vavakoso lewe ni sala mai Tima,

era sa waraka ko ira na lewe ni sala mai Sipa.

20Era sa madua ni ra a vakararavi kina;

era sa lako mai kina, a ra sa taqaya.

21Ni dou sa qai vaka na ka wale;

dou sa raica ni'u sa biu sobu, ia dou sa rere.

22Au sa kaya beka, ‘Dou kauta mai vei au e dua nai loloma’?

Se, ‘Dou solia vei au e dua na ka ni veivaqumi mai na nomudou i yau’?

23Se, ‘Dou vakabulai au mai na liga ni meca’?

Se, ‘Dou voli au mai na ligadra na dauveivakasaurarataki’?

24“Dou vakavulici au, ka'u na tiko lo;

dou vakatakila vei au na ka ka'u sa cala kina.

25A ka kaukauwa vakaidina na vosa vakadodonu!

Ia ka cava beka na betena na nomudou veivunauci?

26Dou sa nanuma beka ni dou rawa ni vunauca na vosa,

me vaka beka ni sa cagi wale ga na vosa sa cavuta ko koya sa rarawa na lomana?

27Sa na bau rawa vei kemudou mo dou vakawiri madigi e na vukudra na luveniyali,

ka ia na veivolitaki me baleta na nomudou i tau.

28“Ia oqo, dou yalovinaka mada ka raici au mai;

ni'u na sega ni vosa lasu e matamudou.

29Dou vuki lesu, ka me kakua ni vakayacori e dua na ka cala.

Dou vuki lesu oqo, ni sa sega na cala me'u beitaki kina.

30Sa tiko beka na ka tawa dodonu e yamequ?

A gusuqu beka sa sega ni kila rawa na ka e ca?