Isikeli 36 - Ai Vola Tabu (Vakadewa Makawa Vakavoutaki 2021)（FRV21）

Na Veivakacegui ni Kalou e na Vanua ko Isireli

1“Ia ko iko, na luve ni tamata, mo ia tale na parofisai ki na veiulunivanua ni Isireli, ka kaya, Na veiulunivanua ni Isireli, dou rogoca na vosa i Jiova.

2Sa kaya vakaoqo na Turaga ko Jiova: Ni sa kaya vei kemudou ko ira na meca, ‘Ue!’ kei, ‘Na vanua cecere makawa sa qai noda me da taukena’,

3o koya oqo mo parofisai kina, ka vaka ne, Sa kaya vakaoqo na Turaga ko Jiova: Ni ra sa vakacacani kemudou, ka tilomi kemudou e na veiyasana, mo dou nodra vanua na veimatanitu sa vo, ni dou sa cavuti tiko e na gusudra na dauvosa, ka vakarogocataki vei ira na tamata;

4o koya oqo, koi kemudou na veiulunivanua ni Isireli, dou rogoca kina na vosa ni Turaga ko Jiova: Sa kaya vakaoqo na Turaga ko Jiova ki na ulunivanua, kei na ulu-ni-koro, ki na uciwai, kei na veibuca, ki na veitikina lala kei na veikoro sa biu, oqori ka vakacacani, ka sa ka ni veivakalialiai vei ira na kena vo ni veimatanitu sa tiko vakavolivoliti kemudou;

5o koya oqo sa kaya kina na Turaga ko Jiova: E na noqu vuvu katakata ka'u sa vosataka vakaidina kina na ca vei ira na kena vo ni veimatanitu, kei Itomi kecega, era sa vota na noqu vanua me nodra ni ra reki e na vu ni yalodra, ka beca e na vu ni lomadra, me biuta ga me vakacacani.

6O koya oqo, mo parofisaitaka kina na vanua ni Isireli, ka kaya ki na ulunivanua, kei na ulu-ni-koro, kei na uciwai, kei na veibuca, Sa kaya vakaoqo na Turaga ko Jiova; Raica, koi au, ni'u a vuvu ka cudru, ka'u a vosa kina, ni dou sa vakamaduataki vei ira na veimatanitu;

7o koya oqo sa kaya kina na Turaga ko Jiova: Au sa yalataka ni ko ira na veimatanitu era sa tiko vakavolivoliti kemudou era na vakamaduataki sara.

8“Ia koi kemudou, na veiulunivanua ni Isireli, dou na tubura na nomudou tabanikau, ka dou na vuataka na vuamudou vei ira na noqu tamata na Isireli; ni ra sa voleka ni lako mai.

9Raica, sai au ka totaki kemudou, ia ka'u na lesu tale vei kemudou, ka dou na wereci ka kaburaki kina;

10ia ka'u na vakalewevuqataka na nomudou lewe-ni-vanua, na vale kece sara i Isireli. Ena tawa talega na veikoro, ka vakavale na veitikina lala.

11Ia ka'u na vakalevutaka vei kemudou na tamata kei na manumanu; ka ra na tubu ka vakaluveni. Ka'u na vakaitaukeitaki kemudou tale me vaka na nomudou tiko eliu, ka kitaka na ka mo vinaka cake kina ka ca na nomudou tiko eliu. Ia dou na kila ni sai au ko Jiova.

12Io, ka'u na lewa na tamata me ra lakovi kemudou tikoga—na noqu tamata na Isireli—ka ra na taukeni iko, ia ko na nodra vanua, ka ko na sega tale ni vakaluveniyalitaki ira.

13Sa kaya kina vakaoqo na Turaga ko Jiova: Baleta ni ra sa kaya vei iko, ‘Ko iko na vanua sa daukania na nomu tamata, ka sa dauvakaluveniyalitaka na nomu veimatanitu’,

14o koya oqo ko na sega tale kina ni daukania na nomu tamata se vakaluveniyalitaka na nomu veimatanitu, sa kaya na Turaga ko Jiova.

15Au na sega talega ni vakarogoya tale vei iko na kedrai rogorogo ca na veimatanitu, ko na sega ni bitaki tale e na nodra veivakalialiai na veimataqali ko na sega tale ni vakabalea na nomu veimatanitu, sa kaya na Turaga ko Jiova.”

Na Vakavoui nei Isireli

16Ka sa yaco tale vei au na vosa i Jiova, ka vaka:

17“Ko iko na luve ni tamata, ni ra a tiko e na nodra vanua ko ira na vale i Isireli, era sa vakadukadukalitaka e na nodra i tovo kei na nodra i valavala. Na nodra i valavala e mataqu sa vaka na nona tawa savasava na yalewa sa tawase e na vuku ni nona mate-ni-vula.

18Ia ka'u a sovaraka kina na noqu cudru vei ira e na vuku ni dra era sa vakadavea e na vanua, e na vuku talega ni nodra matakau era sa vakadukadukalitaka na vanua.

19Ia ka'u a dui vakasevi ira kina na veimatanitu tani, ka ra sa duibiubiu ki na veivanua. Io ka'u a lewai ira me vaka na nodra i valavala kei na nodra cakacaka.

20Ia ni ra dui yaco ki na veimatanitu tani, era dui lakova, era sa vakacacana na yacaqu tabu, ni sa kainaki e na vukudra, “Ko ira oqo na tamata i Jiova, ia era sa lako tani mai na nona vanua.”

21Ia ka'u a vosota ga e na vuku ni yacaqu tabu, o koya era sa vakacacana ko ira na vale i Isireli e na veimatanitu tani, era dui yaco yani kina.

22“O koya oqo mo kaya kina ki na vale i Isireli, Sa kaya vakaoqo na Turaga ko Jiova: Sa segai e na vukumudou, na vale i Isireli, ka'u sa cakava kina na ka oqo, au cakava ga e na vuku ni yacaqu tabu, o koya dou sa vakacacana e na veimatanitu tani, dou sa dui yaco kina.

23Ia ka'u na vakatabuya na yacaqu levu, o koya ka vakacacani e na veimatanitu tani, o koya dou a vakacacana e na kedra maliwa; ka ra na kila na veimatanitu ni sai au ko Jiova, sa kaya na Turaga ko Jiova, ni'u sa vakatabui vei kemudou e matadra.

24Ni'u na kauti kemudou mai na veimatanitu tani, ka vakasoqoni kemudou mai na veivanua kecega, ka kauti kemudou ki na nomudou vanua.

25Au na qai kureitaka vei kemudou na wai makare, dou na qai savasava, ka'u na vakasavasavataki kemudou mai na nomudou dukadukali kecega, kei na nomudou matakau kecega.

26Isi 11.19,20Au na solia talega vei kemudou na yalo vou, io ka'u na vakacuruma ki na lomamudou na yalo vou. Au na kauta tani talega mai vei kemudou na yalo vatu ka solia vei kemudou na yalo vakalewe.

27Ka'u na vakacuruma ki na lomamudou na yaloqu, ka vagolei kemudou mo dou muria na noqu vunau, ia dou na vakabauta na noqu lewa ka cakava.

28Dou na tikotiko talega e na vanua ka'u a solia vei ira na nomudou qase; ia dou na vakabauti mo dou noqu tamata, koi au talega ka'u na yaco me'u nomudou Kalou.

29Ia ka'u na vakabulai kemudou mai na nomudou dukadukali kecega. Ka'u na kaciva na sila, ka vakalevutaka, ka sega ni vakayacora tale vei kemudou na dausiga.

30Au na vakalevutaka talega na vuanikau dauvua, kei na lewe ni were, mo dou kakua tale ni vakarogocataki e na veimatanitu e na vuku ni dausiga.

31Dou na qai vakananuma na nomudou i valavala ca, kei na nomudou cakacaka sa sega ni vinaka, ia dou na vakasisilataki kemudou vakataki kemudou e na vuku ni nomudou caka ca kei na nomudou i valavala vakasisila.

32Dou kila mada, ni ka'u sa sega ni cakava na ka oqo e na vukumudou, sa kaya na Turaga ko Jiova; dou madua ka taqaya e na vuku ni nomudou i valavala, koi kemudou na vale i Isireli.

33“Sa kaya vakaoqo na Turaga ko Jiova: E na siga ka'u sa vakasavasavataki kemudou kina mai na nomudou i valavala ca kecega, ka'u na qai vakaitaukeitaki kemudou e na veikoro, ka na tara tale na koro e na veitikina lala.

34Ia na vanua sa lala ena wereci tale, ia eliu sa lala sara ga e matadra kece era sa lako voli kina.

35Era na qai kaya, A vanua oqo ka lala sa qai yaco me vaka na were ko Iteni; kei na veikoro sa vakacacani ka lala ka rusa sa qai viribaiti, ka sa tawa tale.

36A ra na kila na kena vo ni veimatanitu sa tiko vakavolivoliti kemudou ni sai au ko Jiova ka'u sa tara na koro ka rusa, ka tea tale na vanua ka lala. Koi au ko Jiova ka'u sa kaya, ka'u na cakava talega.

37“Sa kaya vakaoqo na Turaga ko Jiova; Ia me ra masuti au ko ira na vale i Isireli, me'u cakava vei ira na ka oqo; au na vakalewevuqataki ira na tamata me ra dua nai soqosoqo levu;

38me vaka na qele ni sipi tabu, me vaka na qele ni sipi mai Jerusalemi e na kena solevu tabu, ena tawa vakakina na veikoro lala e nai soqosoqo levu ni tamata. Ka ra na kila ni sai au ko Jiova.”