Vakatekivu 31 - Ai Vola Tabu (Vakadewa Makawa Vakavoutaki 2021)（FRV21）

Sa Dro Tani mai vei Lepani ko Jekope

1A sa rogoca ko Jekope na nodratou vosa na luve i Lepani tagane ni ratou kaya, “Ko Jekope sa kauta tani na ka kecega nei tamadatou; a sa vakaiyau vakaoqo mai nai yau nei tamadatou.”

2A sa raica ko Jekope na mata i Lepani ni sa duatani mai vua, ka sega ni vaka eliu.

3Sa qai kaya vei Jekope ko Jiova, “Mo lesu tale ki na nodra vanua na nomu qase, vei ira talega na wekamu; ia ka'u na tiko vata kei iko.”

4A sa veitalaki ko Jekope ka kacivi Raijeli kei Lia me rau lako ki na vanua era tiko kina na nona qele ni manumanu,

5ka sa kaya vei rau, “Au sa raica na matana na tamamudrau, ni sa qai duatani mai vei au ka sa sega ni vaka eliu. Ia sa tiko vata kei au na Kalou nei tamaqu.

6Ia koi kemudrau, drau sa kila ni'u sa qarava e na noqu i gu kece na tamamudrau;

7ia sa vakaisini au na tamamudrau, ka sa vukica vakatini na qau i sau, ia sa sega ni vakatarai koya na Kalou me vakacacani au.

8Kevaka sa kaya vakaoqo, ‘Me kemui sau na kena sa tavukadiridiri,’ sa qai vakasucuma walega na manumanu na ka sa tavukadiridiri; ia kevaka sa kaya vakaoqo, ‘Me kemui sau na kena sa volakoso,’ sa ra qai vakasucuma walega na manumanu na ka sa volakoso.

9Ia sa kauta tani vakaoqo na Kalou na nona manumanu na tamamudrau, ka solia vei au.

10Ia sa yaco e nai tabayabaki sa ra kunekune kina na manumanu, ka'u a ta cake, ka kunea e na tadra, ka raica, na sipi tagane ka rikata na sipi sa vola koso, se tavukadiridiri, se veivolavolai.

11A sa kaya vei au e na tadra ko koya na agilosi ni Kalou, ‘I Jekope,’ ka'u a kaya, ‘Koi au saka oqo!’

12A sa kaya, ‘Mo ta cake mada, ka raica, na sipi tagane kecega sa rikata na sipi sa volakoso, se tavukadiridiri, se veivolavolai; ni'u sa kunea na ka kecega sa cakava vei iko ko Lepani.

13 ka sa vakanamata ki na Ulunivanua ko Kiliati.

Vakamuri Jekope ko Lepani

22E na kenai katolu ni siga, a sa tukuni vei Lepani ni sa dro ko Jekope.

23A sa qai vakasoqoni ira vata na wekana ka cici muri koya ka bogi vitu me yacova ni sa toboki koya mai na Ulunivanua ko Kiliati.

24Ia sa rairai oti mai na Kalou kivei Lepani na kai Siria e na tadra e na bogi, ka sa kaya vua, “Mo qarauni iko mo kakua ni vosataka na ka vinaka se na ka ca vei Jekope.”

25A sa mani lako siviti Jekope ko Lepani. Ia oqo sa birika na nona valelaca ko Jekope e na vanua veiulunivanua, ka ratou keba voli ko Lepani kei iratou na wekana mai na Ulunivanua ko Kiliati.

26A sa kaya vei Jekope ko Lepani, “A cava ko sa cakava? Ko sa veidabuitaki au, ka kauta tani na luvequ yalewa me vaka era sa bobula e nai seleiwau.

27A cava ko a dro vakavuni kina, ka cakacaka vaqaseqase vei au, ka sega ni bau tukutuku vei au? E vinaka vei au me'u a vakatalai iko yani e na marau kei na meke, e na lali kei na api.

28Ia ka cava ko sega ni vakatara kina me'u bau reguca ka vakamoce vei iratou na luvequ tagane kei na luvequ yalewa? Sa rui ka lialia na ka ko sa kitaka oqo.

29Sa tu vei au na kaukauwa me'u vakacacani kemudou; ia na Kalou i tamamudou sa vosa vei au e na bogi e na noa, ka sa kaya, ‘Mo qarauni iko mo kakua ni vosataka na ka vinaka se na ka ca vei Jekope.’

30Sa dodonu ga kina mo lako ni ko sa gadreva vakaukauwa mo lesu ki na vale i tamamu, ia ka cava ko sa butakoca kina na noqu kalou?”

31A sa vosa vei Lepani ko Jekope, ka kaya, “Ni ka'u a rere, ni'u sa nanuma de ko na kauti rau vakaukauwa tani mai vei au na luvemu yalewa.

32Ko koya ko sa kunea vua na nomu kalou me kakua ni bula. E na matadra na nodaru tamata, mo dusia na veika sa nomu ka sa tiko vei au, ka mo kauta yani.” A sa sega ni kila ko Jekope ni sa butakoca ko Raijeli.

33A sa qai curu ki na valelaca i Jekope ko Lepani, kei na valelaca i Lia, kei na nodrau valelaca na vada, ka sa sega ni kunea. A sa biuta mai na valelaca i Lia ka la'ki curuma na valelaca i Raijeli.

34Ia ko Raijeli sa kauta eliu na matakau ka vunia e nai dabedabe ni kameli, ka sa dabe tiko e delana. A sa vakasaqara e na veitiki ni valelaca taucoko ko Lepani, ka sa sega ni kunea.

35A sa kaya vei tamana ko koya, “Mo ni kakua ni cudruvi au na noqu turaga ni'u sa sega ni tucake rawa e matamuni, ni sa tauvi au tiko na mate vakayalewa.” A sa vakasaqara ko koya, ia sa sega ni kunea na matakau.

36A sa qai cudru ko Jekope ka vosavosa Lepani. A sa kaya vua, “A cava na noqu cala? A cava na noqu i valavala ca, ko sa cici muri au kina vakaca?

37Ia ko sa dikeva kece na noqu i yaya, sa dua beka nai yaya ni nomu vale ko sa kunea? Mo viritura mada e matadratou na wekamu, kei na wekaqu, me ra vakatulewa vei kedaru.

38Sa qai yabaki ruasagavulu na noqu tiko vata kei iko; a nomu sipi yalewa kei na nomu me yalewa sa sega ni lutudole, kei na sipi tagane ni nomu qele ni sipi ka'u sa sega ni kania.

39A ka sa dresulaki mai na manumanu kila ka'u sa sega ni kauta vei iko; au a sauma ga koi au; ko a tarogi au kina, se butakoci e na siga se na bogi.

40Ia sa vakaoqo vei au: sa kani au na katakata e na siga, kei na liliwa e na bogi; ka sa yali vei au na moce.

41Au a yabaki ruasagavulu e nomu vale; au a qaravi iko ka yabaki tinikava e na vuku ni luvemu yalewa ruarua, ka yabaki ono e na vuku ni nomu manumanu, ia ko a veisautaka vakatini na kequ i sau.

42Kevaka me a sega ni tiko vata kei au na Kalou ni noqu qase, na Kalou i Eparaama, ko koya sa rerevaka talega ko Aisake, ke rairai ko a vakatalai au wale tu e na liga lala. Ia sa raica na noqu rarawa na Kalou, kei na oca ni ligaqu, ka vunauci iko e na bogi e na noa.”

Rau Veiyalayalati ko Jekope kei Lepani

43A sa kaya vei Jekope ko Lepani, “Ko iratou na yalewa oqo era sa noqu yalewa, ko iratou na gone era sa noqu, ko ira na manumanu oqo era sa noqu manumanu, ka sa noqu na ka kecega ko sa raica. Ia na cava me'u qai kitaka edaidai vei iratou na yalewa oqo, se vei ira na luvedra era sa vakasucuma?

44Ia oqo, me daru veiyalayalati mada koi kedaru; ka me dua kina vei kedaru na kenai vakadinadina.”

45A sa taura e dua na vatu ko Jekope, ka vakaduria cake me vatu ni vakananumi.

46A sa kaya ko Jekope vei ira na wekana, “Dou kumuna mai na vatu.” A ra sa kumuna na vatu ka binia vata me dua na suva; ka ra sa kana vata e na yasa ni suva.

47A sa vakayacana ko Lepani ko Jikari-saetuca, ia ko Jekope sa vakayacana ko Kaleti.

48A sa kaya ko Lepani, “Na suva oqo sa kenai vakadinadina vei kedaru edaidai.” O koya oqo sa vakatokai kina na yacana ko Kaleti,

49kei Misipa, ni sa kaya ko koya, “Me qai yadravi iko kei au matua ko Jiova ni daru sa veitawasei ka dui tiko tani.”

50Kevaka ko sa vakararawataki rau na luvequ yalewa, se ko sa vakawati kei na yalewa tani mei kuri ni luvequ yalewa, sa sega na tamata vei kedaru, ia na Kalou sa i vakadinadina e na kedaru maliwa.

51Sa qai kaya vei Jekope ko Lepani, “Raica na suva oqo, ka raica na duru ka'u sa viritura e na vukudaru.

52Sai vakadinadina na suva oqo, ka sai vakadinadina na duru oqo, ni'u na sega ni sivia na suva oqo me'u lako vei iko, ka ni ko na sega ni sivia talega na suva oqo kei na duru oqo mo lako vakaca mai vei au.

53Na Kalou i Eparaama kei na Kalou i Neori, na Kalou ni nodrau qase, me lewa mada vei kedaru.” A sa bubului ko Jekope e na vukui koya sa rerevaka ko Aisake na tamana.

54Sa qai vakacabora nai madrali ko Jekope mai na ulunivanua, ka sa kacivi iratou na wekana me ra kana vata. A ra sa kana, ka moce e na bogi e na vanua veiulunivanua.

55A sa duri cake e na mataka caca ko Lepani, ka sa reguci ira na makubuna kei na luvena yalewa, ka sa vosavakalougatataki ira. A sa qai lako yani ko Lepani ka lesu ki na nona vanua.