Isikeli Nai Vakamacala Taumada - Ai Vola Tabu (Vakadewa Makawa Vakavoutaki 2021)（FRV21）

Nai Vakamacala TaumadaA tiko vakabobula mai Papiloni ko Isikeli na parofita ni bera ni bale ko Jerusalemi kei na gauna a vakarusai oti kina ena 586 BSK. A sa vagolei na nona vosa vei ira era a tiko vakabobula mai Papiloni kei ira na tiko mai Jerusalemi. Nai Vola i Isikeli e rawa ni wasewasei vakaono me vakaoqo: (1) Na Kaci ni Kalou vei Isikeli me parofita; (2) Na veivakasalataki vei ira na tamata me baleta na lewa ni Kalou vei ira ka vakakina na kena sa voleka mai na bale kei na vakarusai nei Jerusalemi; (3) Nai tukutuku i Jiova me baleta na nona lewa vei ira na veivanua era a vakararawataki ira ka vagolei ira vakatani na nona tamata; (4) Na vakacegui nei Isireli ni sa rusa oti ko Jerusalemi kei na yalataki ni gauna vinaka sa voleka mai; (5) Na parofisai me baleta na vakarusai nei Koki; (6) Na raivotu e raica ko Isikeli me baleta na vakavoutaki tale ni Valenisoro kei na nona vanua.Ko Isikeli e dua na turaga ka sa titobu sara na nona vakabauta ka levu na veika e dau vakasamataka. E vuqa na nona vakanananu titobu sa dau basika mai ena raivotu, ka vuqa na nona i tukutuku sa dau dusimaki mai nai vakatakilakila eso sa matanataki. Sa vakabibitaka vakalevu ko Isikeli na kena gadrevi me vakavoui na lomada kei na yaloda, kei na noda kauwai na tamata yadua ni da na tarogi ena vuku ni noda dui cala eda sa vakayacora. A sa tukuna talega o koya na nona vakanuinui ni na vakataudeitaki tale nai tovo ni bula ena nona vanua. Ena nona i tutu vakabete ka parofita talega, a sa kauwaitaka sara kina vakalevu na veika me baleta na Valenisoro kei na kena gadrevi na bula dodonu ka savasava.Na Lewe ni VolaNa kacivi nei Isikeli 1.1—3.27

Nai tukutuku ni veivakarusai baleti Jerusalemi 4.1—24.27

Na lewa ni Kalou ki na veivanua 25.1—32.32

Na yalayala ni Kalou vei ira na nona tamata 33.1—37.28

Na parofisai ni veivakarusai baleti Koki 38.1—39.29

Na raivotu ni Valenisoro kei na vanua ena gauna mai muri 40.1—48.35