1Ia sa soqona vata na nodra veimataivalu ko ira na kai Filisitia me ra ia nai valu. A ra sa soqoni vata yani ki Soko, ka nei Juta, ka ra sa tiko e na maliwa i Soko kei Aseka mai Efesi-tamimi.
2A ra sa soqoni vata ko Saula kei ira na Isireli ka la'ki tiko e na buca ko Ela, ka tuvai valu me donui ira na kai Filisitia.
3Ko ira na kai Filisitia era sa tiko e na dua na yasa ni ulunivanua, kei ira na Isireli era sa tiko e na yasa kadua ni ulunivanua, ka sa tu e na kedra maliwa na buca.
4A sa qai lako yani mai na nodra i tikotiko na kai Filisitia e dua na tamata daubolebole, ko Koliaci na yacana, na kai Kaca, a kena balavu e ono veimama na kiupiti.
5A sa daramaka nai sala parasa e uluna, ka sa vakaisulu e nai sulu ni valu; ia na kena bibi ni sulu e lima na udolu na sikeli parasa.
6A sa vakaivava parasa ko koya, ka sa dua nai sasabai parasa e nai usouso ni domona.
7Na kau ni nona moto sa vaka na nona kau na dautalitali, kei na kena bibi na mata ni nona moto sa ono na drau na sikeli kaukamea; ka sa liu vei koya e dua sa colata nai sasabai.
8A sa tu ko koya, ka kaila yani ki na nodra mataivalu na Isireli, ka kaya vei ira, “Dou sa lako mai me tuvai valu e na vuku ni cava? Au sega li ni kai Filisitia koi au, ia koi kemudou na tamata nei Saula? Dou digitaka mada e dua na nomudou tamata, ka me lako sobu mai vei au.
9Kevaka sa rawata ko koya me keirau vala ka vakamatei au, ia keimami na qai qaravi kemudou. Ia kevaka ka'u sa gumatua vua ka vakamatei koya, dou na qai neimami tamata, ka dou na mai qaravi keimami.”
10A sa kaya ko koya na kai Filisitia, “Au sa bolei ira edaidai na nodra veimataivalu na Isireli. Solia mada mai vei au e dua na tamata, me keirau vala kaya.”
11Ia ni sa rogoca ko Saula kei ira kecega na Isireli na vosa oqo ni kai Filisitia, era sa yalolailai ka rere vakalevu.
12Ia sa dua na cauravou ko Tevita, na luvei Jese na kai Efiraca mai Peceliema e Juta, o koya ka sa le walu na luvena tagane. E na dela ni gauna i Saula, a sa qase sara ko koya ka toro cake na nona yabaki.
13Ko iratou na lewe tolu na luve i Jese eratou qase duadua eratou a la'ki muri Saula ki nai valu; na yacadratou na luvena tolutolu oqo ko Iliavi na ulumatua, na kenai karua ko Epinatapi, kei na kenai katolu ko Sama.
14A sa gone duadua vei iratou ko Tevita. A ratou a muri Saula ko iratou na lewe tolu eratou qase cake,
15ia sa veilakoyaki voli ga mai vei Saula ko Tevita, me dauvakania tiko na sipi nei tamana mai Peceliema.
16E na loma ni vasagavulu na siga, a sa dautoro mai ko koya na kai Filisitia e na mataka kei na yakavi me dauvakaraitaki koya voli.
17A sa kaya ko Jese vei Tevita na luvena, “Mo kauta mada vei iratou na tuakamu e dua na efa sila tavu oqo, kei nai buli madrai oqo e tini, ka kauta vakatotolo sara ki nai tikotiko ni valu kivei iratou na tuakamu.
18Mo kauta vata talega yani na uma jisi oqo e tini vei koya na nodratou turaganivalu ni udolu. Qai raici iratou mai na tuakamu se ratou sa vakacava tiko, ka kauta mai vei iratou eso nai vakadinadina.”
19Ia ko Saula, kei iratou, kei ira kecega na Isireli, era sa tiko e na buca ko Ela, ka ra vala tiko kei ira na kai Filisitia.
20A sa sou e na mataka ko Tevita, ka laiva na sipi vua e dua nai vakatawa, ka lako, ka kauta na ka e vakarota vua ko Jese. Ka sa yaco ki na nodra i tikotiko e na gauna era sa lako tiko yani kina ki nai valu me ra vala, ka ra sa vakarewa kaila tiko mei ia nai valu.
21A rau sa tuvaivalu oti ko ira na Isireli kei ira na kai Filisitia, na mataivalu e dua me veiqaravi tu kei na mataivalu kadua.
22A sa laiva na nona i kaukau ko Tevita vei koya sa dauvakatawa nai yaya, ka cici ki nai valu, ka tarogi iratou na tuakana se ratou bula vinaka tiko se segai.
23Ia ni ratou sa veivosaki tiko, raica, sa lako mai ko koya na qaqa, na kai Filisitia mai Kaca, ko Koliaci na yacana, mai na nodra mataivalu na kai Filisitia, ka cavuta na vosa ni bolebole vata ga e liu. Ka sa rogoca ko Tevita.
24Ia ko ira kecega na Isireli, ni ra sa raica na tamata oqo ko Koliaci, era sa drotaki koya ka ra sa rere vakalevu.
25A ra sa kaya na Isireli, “Dou sa raici koya na tamata oqo sa lako cake mai, se segai? Sa lako vakaidina mai ko koya me bolei ira na Isireli. Ia na tamata ena vakamatei koya ena vakavutuniyautaki koya vakalevu ko koya na tui, ka na solia na luvena yalewa vei koya, ka na vakayacora me tu galala na vale i tamana e Isireli.”
26A sa taroga ko Tevita vei ira na tamata sa tu voleka vua, ka kaya, “A cava na ka sa na caka vua na tamata sa na vakamatea na kai Filisitia oqo, ka kauta tani nai rogorogo ca mai vei ira na Isireli? Ka tamata mai vei ko la na kai Filisitia tawa cili oqo, me mai bolea na nona mataivalu na Kalou bula?”
27A ra sa kaya vakaoqo vua ko ira na tamata, “Ena caka vakakina vakaoqo ki vua na tamata sa vakamatei koya.”
28A sa rogoca ko Iliavi, na tuakana ka ulumatua, ni sa vosa ko koya vei ira na tamata. Sa qai waqa na cudru i Iliavi vei Tevita, ka kaya, “A cava ko a lako sobu mai kina ki ke? Ia ko sa laiva vei cei na sipi ka vica wale oqori mai na vanua lala? Au sa kila na nomu siosio, kei na kena ca ni yalomu, ni ko sa lako sobu mai mo mai sarava nai valu.”
29Ka sa kaya ko Tevita, “A cava beka ka'u sa cakava? Ko ya e dua walega na taro.”
30Ka sa qai vuki tani mai vua ki na dua tale na tamata, ka cavuta na taro vata ko ya; a ra sa sauma lesu tale vua ko ira na tamata me vaka ga na nodra vosa eliu.
31Ia ni sa rogo na vosa ka vosataka ko Tevita, era sa tukuna vei Saula; a sa talaki vua ko koya, me lako mada mai.
32A sa kaya vei Saula ko Tevita, “Me kakua ni yalolailai e dua na tamata e na vukuna. Koi au na nomuni tamata au na lako, ka vala kaya na kai Filisitia oqo.”
33A sa kaya vei Tevita ko Saula, “O na sega ni rawata mo tucake e matana na kai Filisitia oqo, mo drau vala kaya, ni ko se cauravou gone sara, ia ko koya sa tamata dauvala mai na gauna ka cauravou kina.”
34Ia sa kaya vei Saula ko Tevita, “Koi au na nomuni tamata au a dauvakatawana voli na sipi nei tamaqu. Ni sa lako mai e dua na laione, se dua na bea, ka kauta tani e dua na luve ni sipi mai na qele ni sipi,
35ka'u a vakacemuria, ka mokuta, ka vakabula na luve ni sipi mai na gusuna. Ka kevaka e golevi au mai, ka'u dautaura na kumina, ka yavita, ka vakamatea.
36Na nomuni tamata sa vakamatea ruarua oti na laione kei na bea, kei na kai Filisitia tawa cili oqo ena vaka e dua vei rau, ni sa beca ko koya na nona mataivalu na Kalou bula.”
37A sa kaya talega ko Tevita, “Ko Jiova, o koya ka vakabulai au mai na liga ni laione, kei na liga ni bea, ena vakabulai au ko koya mai na ligana na kai Filisitia oqo.” A sa kaya vei Tevita ko Saula, “Mo lako, ka me tiko vata kei iko ko Jiova!”
38A sa vakaisulutaki Tevita ko Saula e na nona i sulu vakaivalu. A sa vakaisalataki koya e nai sala ni valu parasa ka vakadaramaka vua nai sulu ni valu kaukamea.
39A sa vauca ko Tevita na nona i seleiwau e taudaku ni nona i sulu, ka sa dredre ni taubale e na gauna e tovolea me lako kina, ka ni sa sega ni matau vua. A sa kaya vei Saula ko Tevita, “Au sa sega ni lako rawa e na ka oqo; ni'u sa sega mada ni vakatovolea.” A sa luvata tani ko Tevita.
40A sa qai taura ga e ligana na nona i titoko, ka sa digitaka e lima na vatu mulo mai na uciwai, ka tugana ki na taga ni vakatawa ni sipi sa kauta ko koya, io e na nona taga. Ka sa taura e ligana na nona i rabo, ka sa toro yani vua na kai Filisitia.
41A sa lako mai na kai Filisitia ka toro volekati Tevita, ka sa liutaki koya mai na tamata ka daukauta voli na nonai sasabai.
42Ia ni veiraiyaki voli na kai Filisitia ka raici Tevita, sa beci koya, ni sa cauravou lailai walega ko koya, ka sa damudamu, ka matavinaka.
43A sa kaya vei Tevita na kai Filisitia, “Koi au beka na koli, ni ko sa lako mai vei au ka vakaititoko walega?” Ka sa vatonaki Tevita na kai Filisitia e na vosa minimini ni nona kalou.
44A sa kaya vei Tevita na kai Filisitia, “Lako mai vei au, ka'u na qai solia na lewemu ki na manumanu vuka kei na manumanu ni vanua.”
45Ia sa qai kaya vua na kai Filisitia ko Tevita, “Ko sa lako mai vei au ka vakaiseleiwau, ka vakamoto, ka vakaisasabai; ia koi au, ka'u sa lako mai vei iko e na yaca i Jiova-ni-lewevuqa, o koya na Kalou ni nodra mataivalu na Isireli, o koya ko sa beca.
46E na siga oqo ena soli iko ko Jiova ki na ligaqu, ia ka'u na yaviti iko, ka tamusuka laivi na ulumu. Au na solia talega na yagodra na mataivalu ni kai Filisitia e na siga oqo ki na manumanu vuka, kei na manumanu kila ni vanua, me ra kila ko ira kecega na kai vuravura ni tiko na nodra Kalou na Isireli,
47ka me ra kila talega kina ko ira nai vavakoso taucoko oqo ni sa sega ni ia na veivakabulai ko Jiova e nai seleiwau kei na moto. Ni sa nei Jiova nai valu, ka na soli kemuni ko koya ki na ligaimami.”
48Ia ni sa toso yani na kai Filisitia me sota vata kei Tevita, a sa cici kusarawa ko Tevita ki na buturara ni valu me tavaki koya kina na kai Filisitia.
49A sa daramaka na ligana ko Tevita ki na taga, ka taura mai kina e dua na vatu, ka rabotaka, ka lauta na yadrena na kai Filisitia. A sa coba na vatu ki yadrena, ka sa bale vakatoboicu ki na qele.
50 2Samu 21.19 A sa gumatua ko Tevita vei koya na kai Filisitia e nai rabo kei na vatu, ka mokuta na kai Filisitia, ka vakamatea. A sa sega nai seleiwau e na liga i Tevita.
512Samu 21.19A sa qai cici ko Tevita, ka la'ki tucake e delai koya na kai Filisitia; ka sa taura na nona i seleiwau, ka ucuna mai na kena taga, ka vakamatei koya; ka qai tamusuka laivi kina na uluna.
Ia ni ra raica na kai Filisitia ni sa mate na nodra qaqa, era sa dro.
52A ra sa ia ko ira na Isireli kei ira na Juta, ka kaila, ka cicimuri ira na kai Filisitia, ka yacova na buca kei na matamata-ni-koro ni Ekironi. Ia era sa bale e na sala ki Seereimi, io ka yacovi Kaca, kei Ekironi, ko ira na kai Filisitia era vakamavoataki.
53A ra sa tale mai na nodra muri ira na kai Filisitia, ko ira na Isireli, ka kauta nai toki mai na nodra i tikotiko.
54A sa taura na ulu ni kai Filisitia ko Tevita, ka kauta ki Jerusalemi; ia sa biuta na nona i yaragi e na nona valelaca.
55Ia ni sa raici Tevita ko Saula ni sa la'ki tavaka na kai Filisitia ko koya, sa kaya ko koya vei Epineri na kavetani ni valu, “I Epineri, a luve i cei na cauravou oqo?” A sa kaya ko Epineri, “Me vaka ni ko ni sa bula, kemuni na tui, au sa sega ni kila.”
56A sa kaya na tui, “Mo vakataroga mada, se sa luve i cei na cauravou oqo.”
57Ia ni sa lesu mai ko Tevita e na nona mokuta oti na kai Filisitia, sa tuberi koya ko Epineri, ka kauta vei Saula, ni se taura tu e ligana na ulu i koya na kai Filisitia.
58A sa kaya vua ko Saula, “A luve i cei ko iko, gone tagane?” A sa kaya ko Tevita, “Na luvena na nomuni tamata ko Jese, na kai Peceliema.”
Who We AreWhat We EelieveWhat We Do
2025 by iamachristian.org,Inc All rights reserved.
