2 Samuela 10 - Ai Vola Tabu (Vakadewa Makawa Vakavoutaki 2021)（FRV21）

Vakadrukai ko Ira na Luve i Amoni kei na Kai Siria(1 Veigauna 19.1-19)

1Sa oti na ka oqo, sa qai mate na nodra tui na luve i Amoni, ka sa tui ko Anuni na luvena me kenai sosomi.

2Ka sa kaya ko Tevita, “Au na caka vinaka vei Anuni na luve i Neasi, me vaka ka caka vinaka vei au ko tamana.” A sa talai ira kina na nona tamata ko Tevita me vakacegui koya e na vuku i tamana. Ni ra sa lako nai talaki i Tevita ki na nodra vanua na luve i Amoni,

3a ra sa kaya ko ira na nodra turaga na luve i Amoni vei Anuni na nodra turaga, “O sa nanuma beka ni sa dokai tamamu ko Tevita ni sa tala kina eso me ra mai vakacegui iko? Sa sega beka ni talai ira na nona tamata vei iko ko Tevita me ra mai yamata e na koro, ka raica vakavinaka, ka me ra qai vuaviritaka?”

4A sa qai tauri ira kina na tamata i Tevita ko Anuni, ka toroya vakaveimama na kumidra, ka kotiva vakalekaleka na nodra i sulu, io ki dibidra, ka vakatalai ira yani.

5Ni sa tukuni oqo vei Tevita, a sa talaki ko koya me tavaki ira, ni ra sa madua vakalevu ko ira na tamata. A sa kaya na tui, “Dou tiko ga mai Jeriko ka me tubu mada na kumimudou, ka dou qai lako tale mai.”

6Ni ra sa raica na luve i Amoni ni ra sa velavela vei Tevita, a ra sa talaki na luve i Amoni ka voli ira mai na kai Siria mai Peci-riopi, kei na kai Siria mai Sopa, e le rua na oba (20,000) na tamata sa taubale, kei na dua na udolu na tamata mai vua na tui Meeka, ka le tinikarua na udolu na tamata mai Isi-topi.

7A sa rogoca ko Tevita, ka sa talai Joape kei ira na mataivalu qaqa kecega.

8Ka ra sa curu yani ko ira na luve i Amoni, ka tuvai ira na nona mataivalu mai nai curucuru ni matamata-ni-koro, ia era sa tiko vakataki ira ga e na vanua galala ko ira na kai Siria mai Sopa, kei Riopi, kei Isi-topi, kei Meeka.

9Ia ni sa raica ko Joape ni ra sa tuvaivalu vei koya e matadra ka vakakina mai dakuna talega, a sa digitaka ko koya eso vei ira na tamata digitaki ni Isireli, ka tuvai ira me ra sota kei ira na kai Siria.

10A sa soli ira na tamata sa vo vei Apisai na tacina, me tuvai ira me ra sota kei ira na luve i Amoni.

11Ka sa kaya ko koya, “Kevaka sa gumatua vei au ko ira na kai Siria, mo qai mai vukei au mai; ia kevaka sa gumatua vei iko ko ira na luve i Amoni, ka'u na la'ki vukei iko yani.

12Mo kaukauwa ga, ia me daru gumatua e na vukudra na noda tamata, kei na veikoro ni noda Kalou, ka me cakava ga ko Jiova na ka sa vinaka vua.”

13Sa qai toro yani ko Joape kei ira na tamata era sa tiko vata kaya, me ra vala kei ira na kai Siria, ka ra sa dro tani mai vua.

14Ia ni ra sa raica ko ira na luve i Amoni ni ra sa dro na kai Siria, era sa qai dro tani talega mai vei Apisai, ka ra sa la'ki curu ki na koro. A sa lesu mai ko Joape mai nai valu kei ira na luve i Amoni, ka lako ki Jerusalemi.

15Ia ni ra sa raica na kai Siria ni ra sa druka e matadra na Isireli, era sa soqoni vata.

16A sa talaki ko Etareseri ka kauti ira mai na kai Siria era tiko mai tai kadua ni Uciwai. A ra sa lako mai ki Elami, ka sa liutaki ira ko Sopaki na kavetani ni valu i Etareseri.

17A sa tukuni vei Tevita, a sa vakasoqoni ira vata na Isireli kecega ko koya, ka lako yani ki tai kadua ni Joritani, ka yaco ki Elami. A ra sa tuva nai valu vei Tevita ko ira na kai Siria ka ra sa veivala kaya.

18A ra sa dro tani ko ira na kai Siria mai vei ira na Isireli; a sa vakamatea ko Tevita e le vitu na drau na lewe ni nodra qiqi-ni-valu na kai Siria, kei na tamata sa vodo ose e le vasagavulu na udolu, a sa mokuti Sopaki na kavetani ni nodra i valu, a sa mate mai kea ko koya.

19Ia ni ra sa raica ko ira na tui kecega era qaravi Etareseri ni ra sa moku e matadra na Isireli, era sa veisorosorovi kei ira na Isireli, ka qaravi ira. A ra sa rere na kai Siria ni vukei ira tale na luve i Amoni.