1A ra sa soqona vata yani na nodra mataivalu kecega ki Efeki ko ira na kai Filisitia. Ka ra sa la'ki tiko ko ira na Isireli mai na dua na mata-ni-wai mai Jesireli.
2Ia ni ra sa lako tiko yani vakayayadrau ka vakayayaudolu na nodra turaga na kai Filisitia, ka sa muri voli mai dakudra ko Tevita kei ira na nona tamata kei Akisa,
3a ra sa taroga ko ira na turaga ni kai Filisitia, “Na cava era kitaka tiko eke ko ira na Iperiu oqo?” A sa kaya ko Akisa vei ira na turaga ni kai Filisitia, “E sega beka ni ko Tevita oqo, na tamata i Saula na tui Isireli, o koya sa mai tiko vei au e na veisiga oqo, se na veiyabaki oqo? Ia ka'u sa sega ni kunea vua e dua na ka ca mai na siga sa vuki kina, ka yacova na siga oqo.”
4Ia era sa cudru ga vua ko ira na turaga ni kai Filisitia. A ra sa kaya vua ko ira na turaga ni kai Filisitia, “Mo vakalesuya tale na tamata oqori, me la'ki lesu ki na nona tikina ko sa lesi koya kina. Ia me kakua ni lako sobu kei keda ki nai valu, de sa vuki me noda meca ni sa ia tiko nai valu. Ena vakaduavatataki koya kei na nona turaga beka vakaevei ko koya oqo? Sa sega li e na uludra na tamata oqo?”
51Samu 18.7; 21.11E segai beka ni ko Tevita ga oqo, o koya era sa veisausau kina ni ra sa ia na meke, ka kaya,
‘Sa mokuta na veiudolu ko Saula,
kei na veiudolu vakatini ko Tevita’?”
6Sa qai kacivi Tevita ko Akisa, ka kaya vua, “Me vaka sa bula ko Jiova, ko sa tamata yalodina, ka sa vinaka vei au na nomu daulako vata kei au e nai valu. Au sa sega ni kunea e dua na ca vei iko mai na siga ko a lako mai kina vei au, ka yacova na siga oqo. Ia, era sa sega ga ni vinakati iko ko ira na turaga.
7Mo qai lesu kina oqo; ka mo lako e na vakacegu; mo kakua ni kitaka e dua na ka me vakayalocataki ira kina na turaga ni kai Filisitia.”
8A sa kaya vei Akisa ko Tevita, “Ia ka cava ka'u sa cakava? Ka cava ko sa kunea vei au na nomuni tamata mai na siga ka'u a mai tiko kina e matamuni, ka yacova na siga oqo, me'u kakua kina ni lako me'u vala kei ira na nona meca na noqu turaga na tui?”
9A sa vosa ko Akisa, ka kaya vei Tevita, “Au sa kila ni ko sa vinaka vei au, me vaka e dua na agilosi ni Kalou. Ia era sa kaya ko ira na turaga ni kai Filisitia, ‘Ena sega ni lako cake kei keda ki nai valu ko koya.’
10O koya oqo mo qai sou kina e na mataka kei ira na nona tamata na nomu turaga era a lako vata mai kei iko. Ia ni dou sa yadra cake ga e na mataka, ni sa rarama vei kemudou na vanua, dou lako sara yani.”
11A sa sou e na mataka ko Tevita, ko koya kei ira na nona tamata, me lako yani e na mataka, me lesu ki na nodra vanua na kai Filisitia. Ia era sa lako cake ki Jesireli ko ira na kai Filisitia.
Who We AreWhat We EelieveWhat We Do
2025 by iamachristian.org,Inc All rights reserved.
