2 Veigauna 34 - Ai Vola Tabu (Vakadewa Makawa Vakavoutaki 2021)（FRV21）

Sa Tui Juta ko Josaia(2 Tui 22.1-2)

1 Jere 3.6 Sa yabaki walu ko Josaia ni sa buli me tui, ka sa lewa mai Jerusalemi ka yabaki tolusagavulu ka dua.

2A sa caka dodonu ko koya e na mata i Jiova, ka muria nai valavala i Tevita na tamana, ka sega ni gole ki nai matau se ki nai mawi.

Sa Saqata na Qaravi Kalou Tani ko Josaia

3A sa vakatekivu ko koya me vakasaqara na Kalou i Tevita na tamana, e nai kawalu ni yabaki ni nona lewa, ni sa gone tiko. Ia e na kenai katinikarua ni yabaki, sa vakatekivu me vakasavasavataki Juta kei Jerusalemi mai na veiyasana cecere, kei na kalouyalewa ni veikau, kei na matakau ceuceu, kei na matakau sa vakawaicalataki.

42Tui 21.3; 2Vei 33.3A ra sa basuraka sobu e matana na nodra i cabocabo-ni-soro na Peali, ka sa taya sobu ko koya na matakau ka toka e cake e deladra; ka sa vurumemeataka na kalouyalewa ni veikau, kei na matakau ceuceu, kei na matakau sa vakawaicalataki, ka cakava me kuvu-ni-soso, ka vakamiraka e dela ni nodra i bulubulu era vakacaboisoro kivei ira.

51Tui 13.2A sa vakama na suidra na bete e dela ni nodra i cabocabo-ni-soro, ka vakasavasavataki Juta kei Jerusalemi.

6Ka sa kitaka vakakina e na nodra veikoro na Manasa, kei Ifereimi, kei Simione, ka yaco ki Navitalai, io, e na kena veitikina sa rusa.

7Ia ni sa oti na nona basuraka sobu na veicabocabo-ni-soro kei na kalouyalewa ni veikau, ka tukilaka oti na matakau ceuceu me vaka na nuku, ka taya sobu oti na matakau kecega e na veiyasana kecega ni nodra vanua na Isireli, sa qai lesu ko koya ki Jerusalemi.

Sa Kunea ko Ilikaia na Bete nai Vola ni Vunau

8Ia e na kenai katinikawalu ni yabaki ni nona lewa, ni sa vakasavasavataka oti na vanua, kei na vale-ni-soro, sa talai Savani na luve i Asalaia, kei Meesea na turaga ni koro, kei Joa na luve i Joasa o koya ka dauvola na ka ni matanitu, me ratou vakavinakataka na vale i Jiova na nona Kalou.

9Ia ni ra sa lako mai vei Ilikaia na bete levu, era sa solia nai lavo ka kau ki na vale ni Kalou, era a kumuna vata ko ira na Livai nai vakatawa-ni-katuba, mai vei ira na Manasa kei Ifereimi, mai vei ira kece talega na kedra vo na Isireli, mai vei ira kece talega na Juta kei Penijamini; era sa qai lesu ki Jerusalemi.

10Ka ra solia kivei ira na tamata cakacaka sa nodra i tavi me vakaraica na vale i Jiova, ia ko ira oqo era solia kivei ira na tamata cakacaka era sa cakacaka e na vale i Jiova, me vakavinakataka na vale.

11Io, sa soli kivei ira na matai kei ira era sa tara vale, me ra volia na veivatu sa ta, kei na kau ni veisema, kei na soka ni veivale sa vakacataka ko ira na tui Juta.

12A sa cakava vakadodonu na cakacaka ko ira na tamata. Ka sa vakaraici ira ko Jeaci kei Opetaia, oi rau na Livai, mai vei ira na luve i Mirari, kei Sakaraia, kei Mesulame, mai vei ira na luvedra tagane na Koaca, me ratou kusava. Ka so tale vei ira na Livai, ko ira kecega sa vuku e na ka ni sere e domo vinaka,

13era sa vakaraica talega na tamata era sa daucolacola, era sa vakaraici ira kece talega ka cakava na cakacaka kecega sa caka; ka mai vei ira na Livai sa lesi eso na vunivola, kei ira na turaga, kei ira nai vakatawa ni matamata-ni-koro.

14Ia ni ra sa kauta mai ki tautuba nai lavo sa kau ki na vale i Jiova, sa kunea ko Ilikaia na bete nai vola ni vunau i Jiova ka solia ko Mosese.

15A sa tukuna ko Ilikaia vei Savani na vunivola, ka kaya, “Au sa kunea nai vola ni vunau e na vale i Jiova;” ka sa solia nai vola ko Ilikaia vei Savani.

16A sa kauta nai vola ko Savani vei koya na tui, ka sa kaya talega vua na tui, “Na ka kecega sa vakaroti vei ira na nomuni tamata, era sa cakava tiko.

17A ra sa kumuna vata nai lavo sa kune e na vale i Jiova, a ra sa solia oti ki na ligadra era sa vakaraici ira, kei na ligadra na tamata cakacaka.”

18Sa qai tukuna vua na tui ko Savani na vunivola, ka kaya, “Sa solia kivei au ko Ilikaia na bete e dua nai vola.” A sa wilika ko Savani vua na tui.

19Ia ni sa rogoca na vosa ni vunau ko koya na tui, sa dresulaka na nona i sulu.

20Sa qai vakarota na tui kivei Ilikaia, kei Eaikami na luve i Savani, kei Apitoni na luve i Maika, kei Savani na vunivola, kei Asaia e dua na nona tamata na tui, ka kaya,

21“Dou lako, dou tarogi Jiova e na vukuqu, e na vukudra talega era sa vo tu e Isireli kei Juta, se sa vakaevei na vosa ni vola sa kune. Ni sa levu na cudru i Jiova sa sovaraki mai vei keda, ni ra sa sega ni vakabauta na vosa i Jiova ko ira na noda qase, me ra cakava na ka kecega sa volai e nai vola oqo.”

Sa Gadrevi nai Vakasala i Ulita na Parofita Yalewa

22A sa lako ko Ilikaia, kei ira mai vua na tui, kivei Ulita na parofita yalewa na wati Salumi, na luve i Tikiva ka tagane, na luve i Asira ka tagane, ai vakatawa ni sulu (sa tiko na yalewa oqo mai Jerusalemi e nai karua ni yasana) ka ra sa vosa vei koya me vakakina.

23A sa kaya vei iratou ko koya, “Sa kaya vakaoqo ko Jiova na nodra Kalou na Isireli: Dou tukuna vua na tamata ka talai kemudou kivei au,

24Sa kaya vakaoqo ko Jiova: Raica, au na vakayacora na ca ki na koro oqo, kivei ira talega na lewe ni koro oqo, io, na vosa ni veivakarusai kecega sa volai e nai vola era sa wilika vua na tui Juta.

25Ni ra sa biuti au, ka vakama na ka boi vinaka vei ira na kalou tani, me ra vakacudrui au e na cakacaka kecega ni ligadra; e na vuku ni ka oqo, ena sovaraki kina na noqu cudru ki na koro oqo, ka na sega ni bokoci.

26Ia e na vukuna na tui Juta, o koya ka talai kemudou me tarogi Jiova, dou kaya vakaoqo vua, Sa kaya vakaoqo ko Jiova na Kalou ni Isireli e na vuku ni vosa ko sa rogoca oti.

27Ni sa malumalumu na lomamu, ia ko a vakayalomalumalumutaki iko e na mata ni Kalou, ni ko a rogoca na nona vosa ka baleta na koro oqo, kei ira na lewena, ka sa vakayalomalumalumutaki iko e mataqu, ka dresulaka na nomu i sulu, ka tagi e mataqu; au sa qai rogoci iko talega, sa kaya ko Jiova.

28Raica, au na vakauti iko vei ira na nomu qase, ia ko na kau ki na nomu i bulubulu e na vakacegu, ka na sega ni raica na matamu na ka ca kecega au na vakayacora ki na yasana oqo, kivei ira talega na lewena.” A ra sa kauta na vosa vua na tui.

Sa Vakavoutaki Tale na Veiyalayalati(2 Tui 23.1-20)

29Sa qai talaki na tui, ka vakasoqoni ira vata na qase kecega ni Juta kei Jerusalemi.

30A sa cabe cake na tui ki na vale i Jiova, kei ira vata kaya na nodra tagane kecega na Juta, kei ira na kai Jerusalemi, kei ira na bete, kei ira na Livai, kei ira kecega na tamata, ko ira na lelevu kei ira na lalai. A sa wilika ko koya e na daligadra na vosa kecega ni vola ni veiyalayalati sa kune e na vale i Jiova.

31A sa tu na tui e na nona i tutu, ka cakava na veiyalayalati e na mata i Jiova, ka me muri Jiova ga, ka vakabauta na nona vunau, kei na nona i vakaro, kei na nona i lesilesi, e na lomana taucoko, kei na yalona taucoko, me vakayacora na vosa ni veiyalayalati sa volai e nai vola oqo.

32A sa vakauqeti ira kecega era sa tiko e Jerusalemi kei Penijamini me ra vakabauta. A ra sa cakava ko ira na kai Jerusalemi, me vaka na veiyalayalati ni Kalou, na Kalou ni nodra qase.

33A sa kauta tani ko Josaia na ka vakasisila kecega mai na nodra vanua kecega na Isireli, ka vakauqeti ira kecega era sa tiko e Isireli me ra qarava, io, me ra qaravi Jiova na nodra Kalou. Ka ra sa sega ni lako tani me ra kakua ni muri Jiova, na Kalou ni nodra qase, e na nona gauna kecega.