Sere i Solomoni 8 - Ai Vola Tabu (Vakadewa Makawa Vakavoutaki 2021)（FRV21）

1Mo vakataki koya mada ga na taciqu,

ko koya ka sucuma na sucu i tinaqu!

Ni'u na kunei iko e tautuba, ka'u na qai reguci iko,

io, ka'u na sega ni beci kina.

2Ka'u na tuberi iko,

ka kauti iko ki na vale nei tinaqu,

sa na vakavulici au ko koya.

Ka'u na vagunuvi iko e na waini boi vinaka,

na dra ni noqu pomekaraneti.

3A ligana i mawi sa na kenai nono ni uluqu,

ia na ligana i matau ena mokoti au.

4Au sa vakaroti kemudou, na goneyalewa ni Jerusalemi,

mo dou kakua ni yavalata, se vakayadrati koya ka'u sa lomana,

ka me vakatau mada ga vua.

Ai Kaono ni SereVeitokani

5Ko cei sa lako cake mai oqo mai na vanua lala,

ka sa raviti koya sa lomana?

Yalewa

Au a vakayadrati iko mai na ruku ni vu ni moli.

Sa vakasucumi iko mai kea ko tinamu;

sa taratara mai kea ko koya ka vakasucumi iko.

6Mo tabaki au me vaka na mama ki lomamu,

io, me vaka na mama ki ligamu;

ni sa gumatua me vaka na mate na loloma,

ka gagadre kaukauwa me vaka nai bulubulu.

A kena qilaiso sa qilaiso waqa,

na yameyame ni buka sa ka rerevaki.

7Sa na sega ni bokoca rawa na loloma na wai e vuqa,

ena sega talega ni luvuca rawa na waluvu.

Kevaka ena solia na tamata nai yau kece e nona vale mei sosomi ni loloma,

sa na beci sara ga.

Veitokani

8Sa dua na tacidaru lailai,

ka sa sega na sucuna.

A cava me daru ia e na vukuna na tacidaru,

e na siga ena duguci kina?

9Kevaka e bai vatu ko koya,

edaru na tara e delana na vale siliva cecere;

ia kevaka e sogo ni katuba ko koya,

edaru na vakalatia e na papa sitari.

Yalewa

10Koi au ka'u sa bai vatu,

ia na sucuqu sa vaka na vale-cecere:

Au a qai vaka e dua,

Sa vinakati e matana.

Tagane

11Sa dua na nona loga-ni-vaini ko Solomoni mai Peali-amoni;

ka sa lisitaka vei ira eso nai vakatawa;

me ra dui kauta mai e dua na udolu na tiki ni siliva sai voli ni kena vuata.

12A noqu loga-ni-vaini, o koya sa noqu dina, sa no mai;

me nomu, Solomoni, e dua na udolu,

ka rua na drau me nodra nai vakatawa ni vuata.

13Ko iko sa dautiko e na veiwere,

era sa vakarorogo ki na domomu nai tokani;

mo vakarogoya talega kivei au.

Yalewa

14Mo kusarawa, ko iko ka'u sa lomana,

ia mo vaka na kaseli,

se na luve ni dia

e na veiulunivanua ni kau boi vinaka!