Same 51 - Ai Vola Tabu (Vakadewa Makawa Vakavoutaki 2021)（FRV21）

A Masu ni Kere Veivosoti kei na Veivakasavasavataki Vua nai liuliu ni sere. A Same i Tevita, ni sa lako mai vua ko Necani na parofita, ni sa cala ko Tevita vata kei Pacisepa.

1Ni yalololoma vei au, na Kalou,

me vaka na nomuni loloma tudei;

me vaka na levu ni nomuni yaloveivosoti,

mo ni kauta tani na noqu i valavala ca.

2Mo ni vakasavasavataki au sara mai na noqu caka cala,

ka vuya laivi vei au na noqu i valavala ca.

3Ni'u sa vakatusa na noqu talaidredre,

ka sa tu ga e mataqu e na veisiga na noqu i valavala ca.

4 Roma 3.4 Vei kemuni, io, vei kemuni duaduaga, ka'u sai valavala ca,

ka cakava e matamuni na ka ca,

mo ni vakadonui ni kemuni sa vosa

ka sega ni cala ni kemuni sa lewa.

5Raica, ka'u a sucu vata mai kei na ca,

ka sa kunekunetaki au ko tinaqu e nai valavala ca.

6Raica, ko ni sa vinakata na ka dina mai na vu ni yalo;

ia mo ni vakavukui au e na tikina e loma.

7Mo ni vakasavasavataki au e na isopi, ka'u na qai savasava;

vui au, ka'u na qai vulavula vakalevu ka vakalailai na uca-vulavula.

8Vakayacora vei au me'u rogoca na ka ni marau kei na reki;

me reki rawa kina na suiqu ko ni sa vorolaka.

9Ni tabonaka na matamuni mai na noqu i valavala ca,

ka kauta tani na noqu caka cala kecega.

10Ni bulia e lomaqu na yalo e savasava, na Kalou,

ka vakavouya e lomaqu na yalo sa dodonu ka dei.

11Ni kakua ni vakasevi au mai na matamuni,

ka mo ni kakua ni kauta tani vei au na nomuni Yalo Tabu.

12Ni vakasuka tale kivei au na reki sa vu mai na nomuni veivakabulai,

ka tokoni au e na yalo sa gumatua tiko.

13Au na qai vakavulica vei ira na daucaka-cala na nomuni sala,

ka ra na saumaki mai vei kemuni ko ira na tamata i valavala ca.

14Mo ni vakabulai au mai nai sau ni dra, na Kalou,

Oi kemuni na noqu Kalou ni veivakabulai,

ena qai seretaka vakadomoilevu na nomuni yalododonu na yamequ.

15Kemuni na Turaga, mo ni dolava na tebenigusuqu,

ena qai vakacaucautaki kemuni na gusuqu.

16Kemuni sa sega ni vinakata me'u vakacaboisoro;

se'u na cakava, ko ni sa sega talega ni rekitaka nai soro kama.

17Ai soro vua na Kalou na yalo sa raramusumusu;

a yalo sa ramusu, ka bibivoro, ko ni na sega ni cata, na Kalou.

18Mo ni caka vinaka ki Saioni e na nomuni yalololoma;

mo ni viria na bai kei Jerusalemi,

19kemuni na qai taleitaka na veisoro e dodonu,

e nai soro kama kei nai soro sa vakamai taucoko;

ka ra na qai vakacabori na bulumakau e na nomuni cabocabo-ni-soro.