2 Korinica 5 - Ai Vola Tabu (Vakadewa Makawa Vakavoutaki 2021)（FRV21）

Na Vale Vakavuravura kei na Vale Vakalomalagi

1Ni keitou sa kila, kevaka sa rusa na neitou vale vakavuravura o koya sa vakacevaceva, sa dua na neitou mai vua na Kalou, a vale sa sega ni caka e na liga, sa sega ni rusa rawa, mai lomalagi.

2Io keitou sa vutugu e na yago oqo, ni keitou sa gadreva sara tiko me vakaisulutaki e na neitou vale mai lomalagi—

3ke sa vakakina, ni keitou sa vakaisulu, keitou na sega ni kune me keitou luvawale.

4Ni keitou sa tiko e na vale vakacevaceva oqo, keitou sa vutugu ga, ni keitou sa bitaki—ni keitou sa sega ni via luvata tani oqo, ia me keitou vakasulumi tale, me rawa kina ni tiloma na veika sa mate tu na bula.

5Ia sai koya na Kalou sa vakarautaki keitou ki na ka oqo, o koya sa solia talega vei keitou na Yalo Tabu me kenai sevu.

Keitou sa Yaloqaqa Tikoga

6O koya oqo keitou sa yalo doudou tikoga kina. Keitou sa kila, ni keitou sa tiko e na yago, keitou sa tawase kei na Turaga—

7ni keitou sa lako voli e na vakabauta, ka segai e na raica.

8Io, keitou sa yalo doudou tiko, ka keitou sa vinakata cake me keitou tawase kei na yago ka tiko vata kei na Turaga.

9O koya oqo ni kevaka keitou sa tiko e na yago se sa tawase tani, sa neitou i naki me keitou vinaka ga vua.

10Roma 14.10Ni da na rairai koi keda kecega e na mata ni tikotiko ni veilewai nei Karisito, me ra dui taura na tamata yadua nai sau ni veika sa caka e na yago, se vinaka se ca.

Na Cakacaka ni Veivakaduavatataki

11Ia ni keitou sa kila na veivakarerei ni Turaga, keitou sa vakamasuti ira na tamata; ia keitou sa vakaraitaki vua na Kalou; au sa dinata talega ni keitou sa vakaraitaki e na nomudou lewa-e-loma.

12Ia keitou sa sega ni tukuni keitou tale vei kemudou, ia keitou sa solia ga vei kemudou na ka mo dou rekitaki keitou kina, me so kina na ka mo dou kaya vei ira sa dokai ira e na ka vaka rairai walega ka sa segai e na ka ni yalo.

13Ia kevaka keitou sa sesewa, sa ka ga vua na Kalou; kevaka keitou sa yalomatua, sa ka ga e na vukumudou.

14Ni sa rawai keitou sara na loloma i Karisito, ni keitou sa lewa vakaoqo: kevaka sa mate e dua e na vuku ni tamata kecega, era sa mate kecega;

15ka sa mate ko koya e na vuku ni tamata kecega, me ra kakua ni bula tiko me yaga vei ira ga, ko ira era sa bula, me ra yaga ga vua sa mate e na vukudra ka tucake tale.

16O koya oqo keitou sa qai sega tale ni doka e dua na tamata e na vuku ni ka vakayago. E dina ga keitou a dokai Karisito e na vuku ni ka vakayago, ia keitou sa qai sega tale ni dokai koya kina.

17Ia kevaka sa tu vata kei Karisito e dua na tamata, sa qai buli vou. Sa lako tani na veika makawa; raica, sa yaco me vou na ka kecega!

18A sa vu mai vua na Kalou na ka kecega, o koya sa vakaduavatataki keda kei koya e na vuku i Karisito, ka sa solia vei keitou na cakacaka ni veivakaduavatataki;

19me vakaoqo, sa ia na Kalou me vakaduavatataki vuravura vei koya ga e na vuku i Karisito, ka sa sega ni wilika vei ira na nodra i valavala ca; ka sa solia vei keitou nai tukutuku ni veivakaduavatataki.

20Keitou sa yaco kina me mata i Karisito, me vaka sa vakamasuti kemudou na Kalou e na gusu i keitou; keitou nai sosomi kei Karisito, keitou sa vakamamasu, mo dou vakaduavatataki kei na Kalou.

21O koya sa sega vua na cala sa qisia ko koya mei soro ni noda i valavala ca, me vakayacori kina vei keda na veivakadonui ni Kalou e na vukuna.