Same 26 - Ai Vola Tabu (Vakadewa Makawa Vakavoutaki 2021)（FRV21）

Na Masu ni Tamata Vinaka A nei Tevita.

1I Jiova, mo ni lewai au,

ni'u a muria lako na noqu yalododonu,

ka'u sa vakararavi talega vei Jiova;

ka'u na sega ni tidara.

2Mo ni vakadikevi au, Jiova, ka vakatovolei au;

vakatovolea na noqu ivi kei na yaloqu.

3Ni sa tu ga e mataqu na nomuni yalololoma,

ka'u sa muria lako talega na nomuni dina.

4Au na sega ni tiko vata kei ira na tamata lasulasu,

ka'u na sega talega ni lako vata kei ira era dauveivakaisini;

5au sa cata nai soqosoqo ni tamata caka ca,

ka'u na sega ni tiko vata kei ira nai valavala ca.

6Au na vuluvulu ni ka'u sa sega ni cala,

ka'u na vakavolivolita vakakina na nomuni cabocabo-ni-soro, i Jiova,

7me'u vakarogoya voli e na domo ni vakavinavinaka,

ka tukuna kecega na nomuni cakacaka e veivakurabuitaki.

8I Jiova, au sa vinakata na vale ko ni sa dautiko kina,

kei na yasana sa tiko kina na nomuni ukuuku.

9Mo ni kakua ni kauta vata na yaloqu kei ira na tamata ca,

se na noqu bula kei ira na tamata era dauveivakamatei,

10sa tiko e na ligadra na ca,

ka sa sinai na ligadra i matau e nai solisoli ni veivaqumi.

11Ia koi au, ka'u na muria lako na noqu yalododonu;

ni vakabulai au, ka lomani au mai.

12Sa tu ga na yavaqu e na vanua vinaka;

ka'u na vakavinavinaka vei Jiova e nai soqosoqo.