Vakatakila 16 - Ai Vola Tabu (Vakadewa Makawa Vakavoutaki 2021)（FRV21）

Na Bilo ni Cudru ni Kalou

1Ia ka'u a rogoca e dua na domo levu mai na valenilotu, sa kaya vei iratou na agilosi e le vitu, “Dou lako, ka sovaraka yani na bilo e vitu ni cudru ni Kalou ki vuravura.”

2 Lako 9.10 A sa lako na kenai matai, a sa sovaraka na nona bilo ki vuravura; a sa tauvi ira na tamata na vidikoso ca e rarawa sara, o ira sa tu kina nai vakatakilakila ni manumanu, kei ira sa vakarokoroko ki na nona matakau.

3Ia nai karua ni agilosi sa sovaraka na nona bilo ki na wasawasa, ka sa vuki kina me vaka na dra ni tamata mate, ka sa mate na ka kecega sa bula voli e na wasawasa.

4 Lako 7.17-21; Same 78.44 Ia nai katolu ni agilosi sa sovaraka na nona bilo ki na veiuciwai kei na veivurevure-ni-wai; a ra sa vuki kina me dra.

5Ia ka'u a rogoca na agilosi ni veiwai ni sa kaya,

“Oi kemuni na yalododonu, o ni sa bula edaidai, o ni a bula eliu, o ni sa yalosavasava,

ni kemuni sa lewa vakaoqo.

6Ni ra sa vakadavea na dra ni tamata yalosavasava kei na dra ni parofita ko ira oqo,

ko ni sa qai solia vei ira na dra me ra gunuva.

Sa dodonu me vakakina vei ira!”

7Ia sa duatani tale ka'u a rogoca mai nai cabocabo-ni-soro, sa kaya,

“E vaka ga oqo, na Turaga na Kalou Kaukauwa,

sa dina ka dodonu na nomuni lewa!”

8Ia nai kava ni agilosi sa sovaraka na nona bilo e na mata-ni-siga; a sa soli vua me vakamaqesataki ira na tamata e na bukawaqa.

9A ra sa qesa na tamata ni sa katakata vakalevu, a ra sa vosavakacacataka na Kalou, o koya sa lewa rawa na veimate ca oqo. A ra sa sega ni veivutuni me ra vakarokorokotaki koya.

10 Lako 10.21 Ia nai kalima ni agilosi sa sovaraka na nona bilo ki nai tikotiko ni manumanu; a sa butobuto na nona matanitu; a ra sa katia na yamedra e na vuku ni rarawa,

11ka vosavakacacataka na Kalou ni lomalagi e na vuku ni nodra rarawa kei na nodra vidikoso, a ra sa sega ni veivutunitaka na nodra i valavala.

12 Aisea 11.15 Ia nai kaono ni agilosi sa sovaraka na nona bilo ki na uciwai levu ko Uferetisi; a sa di kina na kena wai, me caramaki na nodra sala na tui mai na tokalau.

13Ia ka'u a raica e le tolu na yalo velavela eratou sa vaka na boto, eratou sa lako mai na gusu ni gata levu, mai na gusuna talega na manumanu, mai na gusuna talega na parofita vakailasu.

14Ni ratou sa yalo ni tevoro ko iratou, eratou sa kitaka na cakacaka mana, a ratou sa lako yani vei ira na tui ni veivanua kei vuravura taucoko, me vakasoqoni ira vata ki nai valu ni siga dina ko ya ni Kalou Kaukauwa.

15Maciu 24.43,44; Luke 12.39,40; Vtaki 3.3

(“Raica, au sa lako mai me vaka na daubutako. Sa kalougata ko koya sa vakatawa, a sa taura tiko na nona i sulu, de lako voli ka luvawale, ia ka ra raica na nona luvawale.”)

162Tui 23.29; Saka 12.11A ratou sa vakasoqoni ira vata e na vanua na yacana e na vosa vaka-Iperiu ko Amaketone.

17Ia nai kavitu ni agilosi sa sovaraka na nona bilo e na macawa; a sa rogo mai na domo levu, mai na valenilotu mai lomalagi, mai nai tikotiko-vakaturaga, a sa kaya, “Sa caka oti.”

18Vtaki 8.5; 11.13,19A sa rogo na domo ni vosa, kei na kurukuru, ka tibi na livaliva; a sa tavuki vakalevu na vanua, sa sega ni vakakina mai nai vakatekivu ni nodra tiko e vuravura na tamata, ka me tavuki vakaukauwa, ka vakalevu vakakina.

19Aisea 51.17A sa tawase vakatolu na tikina na koro levu, ia sa bale na veikoro e na veivanua; a sa mai vakananumi ko Papiloni na koro levu e na mata ni Kalou, me soli kina na bilo ni waini ni nona cudru waqawaqa.

20Vtaki 6.14A sa dro tani yani na veiyanuyanu kecega, ia na veiulunivanua sa sega ni kune.

21Lako 9.23; Vtaki 11.19A sa lutuki ira na tamata na uca-cevata levu mai lomalagi, a kena bibi e dua na taledi; a ra sa vosavakacacataka na Kalou ko ira na tamata e na vuku ni mate ca ni uca-cevata, ni sa ka levu sara na mate ca oqo.