1 Cesalonaika 2 - Ai Vola Tabu (Vakadewa Makawa Vakavoutaki 2021)（FRV21）

Na Cakacaka i Paula Mai Cesalonaika

1Ni dou sa kila, na veiwekani, ni neitou laki tiko vei kemudou, a sa sega ni ka walega.

2Caka 16.19-24; 17.1-9Ia ni keitou a vakararawataki mada eliu, ka vakacacani sara mai Filipai, me vaka dou sa kila, keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou e na maliwa ni veivorati.

3Ni sa sega sara ni ia na neitou i vakaro e na veivakacalai, se na yalo tawa-savasava, se na veivakaisini,

4ia ni sa vinakati keitou na Kalou me keitou lesi me vunautaka nai tukutuku-vinaka, keitou sa vosa vakakina; sa sega ga me keitou vakalomavinakataka na tamata, ia me vakalomavinakataki ga na Kalou, o koya sa lewa na yalo i keitou.

5Ni dou sa kila keitou sa sega sara ni vosa vakaveicavilaki, se ia na kocokoco e nai lawaki rairai vinaka, ka sai vakadinadina na Kalou.

6Keitou sega talega ni qara me ra dokai keitou ko ira na tamata, se koi kemudou, se ko ira na tamata tani, ka dina ga ni keitou a veivakacolati beka e na vuku ni keitou sai apositolo i Karisito.

7Ia keitou a yalovinaka e na kemudou maliwa, me vaka na daumeimei ni sa susugi ira na luvena.

8Ia sa vakakina, ni keitou sa yalololoma sara vei kemudou, keitou sa vinakata me solia vei kemudou nai tukutuku-vinaka ni Kalou, ia ka sega ni koya walega, a neitou bula talega, ni keitou sa lomani kemudou vakalevu.

Era na Vakararawataki Kemuni na Wekamuni

9Ni dou sa nanuma, na veiwekani, na neitou daucakacaka kei na neitou oca ni keitou sa daucakacaka tiko e na bogi kei na siga, me keitou kakua sara kina ni vakabibitaki kemudou, ni keitou sa vunautaka vei kemudou nai tukutuku-vinaka ni Kalou.

10Dou a raica dina, kei na Kalou talega, ni sa savasava ka dodonu ka sega ni cala na neitou i valavala e na kemudou maliwa, oi kemudou sa vakabauta.

11Ni dou sa kila keitou sa vakarota vei kemudou ka vakamasuti kemudou ka vakadreti kemudou yadua, me vaka na tamana vei ira na luvena,

12mo dou ia nai valavala sa kilikili kei ira sa nona na Kalou, o koya sa kacivi kemudou ki na nona matanitu kei na vanua vakaiukuuku.

13E na vuku ni ka oqo keitou sa vakavinavinaka tikoga kina vua na Kalou, ni gauna dou a vakabauta kina na vosa ni Kalou dou a rogoca mai vei keitou, dou sa sega ni vakabauta me vaka e vosa ni tamata, ia me vaka ga na kena dina, na vosa ni Kalou, a ka oqori sa cakacaka yaco talega vei kemudou sa vakabauta.

14Caka 17.5Ni dou a mai vakadamurimuri ira na veisoqosoqo lewe ni lotu ni Kalou mai Jutia era sa tu vata kei Karisito Jisu, oi kemudou na veiwekani, ni dou a vosota na veika ca mai vei ira na kai nomudou, me vaka era sa vosota mai vei ira na Jiu,

15Caka 9.23,29; 13.45,50; 14.2,5,19; 17.5,13; 18.12o ira era a vakamatea na Turaga ko Jisu kei ira talega na parofita, ka ra sa vakacacani keitou. Era sa sega ni vakalomavinakataka na Kalou, ka ra sa veicati talega kei ira kecega na tamata

16ni ra sa tarovi keitou ni keitou sa vosa vei ira era sa sega ni lotu me ra bula kina. Era sa vakasinaita tikoga kina na nodra i valavala ca; ia sa yaco vei ira na cudruvi me ra sa ca sara.

Na Gagadre i Paula me Sikovi Cesalonaika Tale

17Ia koi keitou, ni keitou sa tawasei tani mai vei kemudou na veiwekani e na dua na gauna lekaleka—sa vakayago ga ka segai ni vakayalo— keitou sa gumatua sara kina ka gadreva vakalevu me da veiraici e na matana votu.

18O koya oqo keitou a via lako yani kina vei kemudou—oi au ko Paula ka'u a sasaga vakavica—ia ka sa vakataotaka na neitou sala ko Setani.

19Ia ka cava na neitou i nuinui se marau, se neitou i sala ni reki? Sa sega li ni koi kemudou e na mata ni noda Turaga ko Jisu e na nona lako tale mai?

20Ni sai kemudou na vu ni neitou lagilagi kei na vu ni neitou reki.