1Ia ko Pasuri na luve i Ima na bete, ko koya na turaga sa liu e na vale i Jiova, sa rogoca ni sa parofisaitaka na ka oqo ko Jeremaia.
2A sa cudruvi Jeremaia na parofita ko Pasuri, ka vesuki koya e nai vesu kau sa tu mai na Matamata-ni-koro cecere i Penijamini, sa volekata na vale i Jiova.
3Ia e na mataka, sa qai sereki Jeremaia ko Pasuri mai nai vesu kau. Sa qai kaya vua ko Jeremaia, “Ko Jiova sa sega ni vakatoka na yacamu ko Pasuri, ko Mekorimisapipi ga.
4Ni sa kaya vakaoqo ko Jiova: Raica, au na lewa mo ka rerevaki vei iko, vei ira kece talega na wekamu. Ia era na bale e nai seleiwau ni nodra meca, ko na raica e matamu talega. Ia ko ira na Juta kecega ka'u na solia ki na liga i Tui Papiloni, ena kauti ira vakabobula ki Papiloni, ka vakamatei ira e nai seleiwau.
5Ia ka'u na solia na kaukauwa kecega ni koro oqo, kei na kena cakacaka kecega, kei na kena ka talei kecega, io, na nodra i yau kece talega na tui Juta ka'u na solia ki na liga ni nodra meca, a ra na tokitaka, ka taura, ka kauta ki Papiloni.
6Ia ko iko, Pasuri, kei ira kece era tiko e na nomu vale, dou na la'ki vakabobulataki. Ia dou na yaco ki Papiloni, ka dou na mate talega kina, ka dou na bulu kina, ko iko, kei ira kecega na wekamu, ko sa parofisaitaka kina na ka lasu.”
Na Vakatukutuku i Jeremaia vei Jiova7Kemuni Jiova, ko ni sa rawai au sara,
ia ka'u sa rawai dina sara kina;
ko ni sa kaukauwa vei kedaru,
ka ko ni sa gumatua mai.
Au sa dredrevaki e na veisiga,
era sa vakalialiai au kecega.
8Ia ni'u a qai vosa, ka'u sa qoqolou,
ka'u sa kacivaka, “Nai valavala kaukauwa kei na veivakacacani;”
ka ni sa yaco na vosa i Jiova
me ka ka'u sa rogo ca kina,
ka dredrevaki kina e na veisiga.
9Au a qai kaya, “Au na sega ni cavuti koya,
se vosa tale e na yacana.”
Ia na nona vosa, sa tu e lomaqu me vaka na bukawaqa,
sa sogo tu e na suiqu,
ia ka'u sa oca ni'u kinoca,
ka sega ni'u rawata.
10Ni'u sa rogoca na nodra vosa ca na lewe vuqa,
sa vakavolivoliti au na rere.
Era kaya, “Dou vakacacani koya! Me da vakacacani koya!”
Ko ira kece na wekaqu
era sa vakaraica na noqu bale, ka kaya,
“Ena vakatagarogaroi beka ko koya,
me keimami na qai rawai koya,
ka vakayacora na neimami cudru vua.”
11Ia ko Jiova ga sa tiko vata kei au
me vaka e dua na tamata qaqa ka rerevaki;
o koya oqo era na tarabe kina era sa vakacacani au,
ka ra na sega ni gumatua.
Era na madua vakalevu,
ni ra na sega ni cakacaka yaco.
A nodra madua sa sega ni mudu
ena sega ni guileca.
12Ia, koi kemuni Jiova-ni-lewevuqa, ko ni sa vakatovolea na yalododonu,
ka dikeva na ivi kei na loma ni tamata;
me'u raica mada na nomuni cudruvi ira,
ni ka'u sa tukuni au vei kemuni.
13Dou sere vei Jiova,
dou vakavinavinaka vei Jiova!
Ni sa vakabula na yalona na dravudravua
mai na ligadra na daucaka ca.
14 Jope 3.1-19 Me ca na siga
ka'u a sucu kina!
Me kakua ni kalougata na siga
sa vakasucumi au kina ko tinaqu!
15Me ca na tamata
ka kaya vei tamaqu,
“Sa sucu e dua na luvemu tagane,”
ka vakamarautaki koya sara kina.
16Ia na tamata ko ya me sa vaka ga na veikoro
ka vukica ko Jiova, ka sega ni veivutuni;
ia me rogoca ko koya na kaila e na mataka,
kei na qoqolou e na siga levu,
17ni sa sega ni vakamatei au ko koya e na siga ka'u sa sucu kina;
me sa noqu i bulubulu ga ko tinaqu,
io na ketena me sa colati au tikoga.
18A cava ka'u sa lako mai kina mai na kete
me'u kunea na oca kei na rarawa,
me vakaoti ga kina na noqu siga e na madua?
Who We AreWhat We EelieveWhat We Do
2025 by iamachristian.org,Inc All rights reserved.
