1Ni sa kila ko Motekai na ka kecega sa caka, sa dresulaka na nona i sulu ko Motekai, ka vakaisulutaka nai sulu taga ka sa vakadravusa, ka lako yani ki loma ni koro, ka tagi vakadomoilevu ka vakararawa;
2ka lako sara mai ki na nona matamata-ni-koro na tui, ni sa tabu me curu e dua ki na matamata-ni-koro ni tui ni sa vakaisulu taga.
3Ia e na veiyasana kecega, sa yaco kina nai vakaro ni tui kei na nona i lesilesi, sa ra tagi vakalevu kina ko ira na Jiu, ka ra sa lolo, ka tagi yaso, ka qoqolou; ka lewe vuqa era sa davo e nai sulu taga kei na dravusa.
4A ra sa mai tukuna vei Esiteri ko ira na nona vada kei ira na nona mata. Sa qai rarawa vakalevu na yalona na ranadi; a sa vakauta ko koya nai sulu me vakasulumi Motekai, ka me kau tani mai vua na nona i sulu taga, ia sa sega ni taura ko koya.
5Ia ko Esiteri sa qai kacivi Etaki, e dua vei ira na nona mata na tui, ka lesia ko koya me qaravi koya na ranadi, a sa tukuna vua me la'ki taroga vei Motekai, na ka oqo, ka cava na vuna.
6A sa lako yani ko Etaki vei Motekai ki na salatu ni koro, e donuya na matamata-ni-koro ni tui.
7A sa tukuna vua ko Motekai na ka kecega sa yaco vua, kei na levu ni lavo sa yalataka ko Amani me solia ki na nona valeniyau na tui me kenai sau ni nodra vakarusai na Jiu.
8Sa solia talega vua nai vola ni vakaro sa caka mai Susa me vakarusai ira, me vakatakila vei Esiteri, ka me sereka vua, me vakaroti koya talega me la'ki curu vua na tui, me vakamasuti koya, ka kerekere vua e na vukudra na kai nona.
9A sa lako ko Etaki ka tukuna vei Esiteri na vosa i Motekai.
10A sa vosa vei Etaki ko Esiteri, ka tauca vua e dua nai vakaro vei Motekai, ka vaka,
11“Era sa kila ko ira kece na nona tamata na tui, kei ira na tamata e nona yasana kece na tui ni kevaka sa lako vua na tui ki nona yasana e loma e dua, se tagane se yalewa, ni sa sega ni kacivi, sa dua ga na kena lewa e na vukuna—me sa vakamatei, ia ena qai bula ga ko koya sa dodoka vua ko koya na tui na nonai titoko koula. Ia koi au, sa qai bogi tolusagavulu oqo ka'u se sega mada ni bau kacivi me'u lako vua na tui.”
12A sa tukuni vei Motekai na vosa i Esiteri.
13A sa qai kaya ko Motekai me tukuni vei Esiteri, “Mo kakua ni nanuma ni ko na dro bula e na vale-ni-tui, ka mo sega kina ni vakataki ira kece na vo ni Jiu.
14Ia kevaka ko sa galu sara e na gauna oqo, ena qai yaco na veisereki kei na bula vei ira na Jiu mai na dua na yasana tani, ia ena vakarusai ga ko iko kei na vale i tamamu. Ia ko cei e kila? De ko sa na yaco beka mo ranadi e na vuku ni gauna oqo?”
15Sa qai kaya ko Esiteri me ra tukuna vei Motekai,
16“Mo lako, mo vakasoqoni ira vata kece na Jiu era tiko e Susa, ka mo dou lolovaki au, ia mo dou kakua ni kana se gunu e na bogi se na siga, ka bogi tolu. Koi au talega kei iratou na noqu goneyalewa keitou na lolo talega. Ia ka'u na qai lako ga vua na tui, ka dina ga ni sa sega ni donu vakalawa oqo; ia kevaka ka'u na mate, au na mate ga.”
17A sa lako yani ko Motekai ka kitaka me vaka na ka kecega ka vakarota vua ko Esiteri.
Who We AreWhat We EelieveWhat We Do
2025 by iamachristian.org,Inc All rights reserved.
