Jope 14 - Ai Vola Tabu (Vakadewa Makawa Vakavoutaki 2021)（FRV21）

Tomana ko Jope na Vosa: Sa Toro Voleka ko Mate ki na Tamata Yadua

1“A tamata ka sa sucu mai vua na yalewa

sa vica walega na nona siga ka sa ni sinai e na rarawa.

2Sa se cake mai ko koya me vaka na senikau ka sa mira tale yani,

sa dro talega me vaka nai yaloyalo, ka sa sega ni tudei.

3Sa daugoleva beka na matamuni e dua sa vakaoqo?

Ko ni sa ka kauti au mai me'u veilewai vata kei kemuni?

4Ko cei e na rawa ni kauta mai e dua na ka savasava mai na ka sa sega ni savasava?

Sa sega sara e dua.

5Ni sa lokuci tu na nona siga,

ka sa tu vei kemuni nai wiliwili ni nona vula,

ka kemuni sa lesia oti talega na kenai yalayala me kakua ni sivia,

6mo ni gole tani mada mai vua, me vakacegu ko koya,

me vakaotia mada na nona siga, me vaka na tamata sa voli na nona cakacaka.

7“Ni sa tiko na nona i nuinui na kau,

kevaka sa ta sobu, ena tubu tale,

ena sega talega ni mudu na kena tubucoke mai.

8E dina ga ni daubula dede na wakana e na qele,

ka daumate na vuna e na soso,

9ia ena tubu cake tale mai ni sa boica na wai

ka vakatubura na tabana me vaka na kau sa tei.

10Ia sa mate ga na tamata, ka sa takali yani;

io sa ciba na tamata, ka sa evei ko koya?

11Me vaka sa dauyali na wai mai na drano,

ka sa dau-di ka maca na uciwai,

12sa vakakina na tamata era sa dui koto sobu ka sega ni tucake tale;

me yacova mada ni sa yali ko lomalagi, era na sega ni yadra

se vakaturi cake mai na nodra moce.

13Mo ni vunitaki au mada e nai bulubulu,

ka tabonaki au, me oti mada na nomuni cudru,

ka lokuca vei au e dua na siga, ka nanumi au!

14Kevaka sa ciba na tamata, ena bula tale ko koya?

Au na waraka na siga kecega sa loku vei au,

me yaco mada na noqu vakamataliataki.

15Ko ni na kaci mai, ka'u na rogo yani vei kemuni;

ko ni na vinakata na cakacaka ni ligamuni.

16Ia oqo ko ni sa wilika nai cavucavu ni yavaqu,

ka sega ni daunanuma na noqu i valavala ca.

17Sa dregati e loma ni taga na noqu talaidredre,

ia ko ni sa cula kina na noqu i valavala ca.

18“Sa yaco dina me ka wale na ulunivanua sa lutu sobu;

a vatu talega, sa biu tani mai na kena yasana;

19sa solota na vatu na wai;

na kui kaukauwa sa savata tani na ka sa tubu mai na kuvu-ni-qele;

ko ni sa vakarusa kina na vakanuinui ni tamata.

20Ko ni sa gumatua tikoga vua, ka sa takali ko koya;

ko ni sa vakatanitaka na matana, ka vakatalai koya yani.

21Sa vakarokorokotaki mai ko iratou na luvena, ka sa sega ni kila ko koya;

a ratou sa vakasivoi, ka sa sega ni kila ko koya.

22A sa vakila ga ko koya na mosi ni yagona,

ka sa tagi walega e na vukuna.”